MIN NDA A MIN ZLUB’U D’A NGAF TAD’ID’A
Sabat ma tuk tad’a
1 Moise mi tok Israel-lâ pet, mi dazi ala: Wana ni vama Ma didina mi he vuna kam á led’ina: 2 Agi lagi sunda burâ karagaya, wani bur ma kid’iziyana agi tinim iram vamu; ni bur ma sabat ma tuk tad’a. Agi tinim iram vam yam Ma didina. Sama lara pî ma le sunda kurâ, a mba tchum mbeyo. 3 Kur bur ma sabatna agi tchugugi akud’a kur givin magina d’i.
He d’a hawa d’a yam minda hi zlub’ud’id’a
4 Moise mi de zlad’a mi Israel-lâ kua ala: Wana ni vama Ma didina mi he vuna kama: 5 Agi pad’agi vun ahle magina mi Ma didina. Suma pet suma a nga ki hur ma djivinina a mba ki he d’a hawa d’a teteng nga azi pad’at mi Ma didina ndata, nala, lora, kawei ma hapma, kawei ma hleuna, 6 baru d’a botlozid’a ki d’a hleu d’a sisila ki d’a hleu d’a kekenga ki d’a luluî d’a lalavata, tumus b’ogeina, 7 bak gamlâ ma a tchorom hleud’ina, bak azar ma aduk mbina kä ma a yum ala dofênina kagu kasiyana, 8 mbul ma yam lalambina, mbul ma his ma djivi ma a tolom aduk mbul ma a vom yam suma á tinizi ki irazi vazina ki dubang ma his djivid’a ma ngala, 9 ahina onisa kahina d’a ding nga guzut kal teglesa yam baru d’a efod’a ki d’a didik ka yam ma ngol ma ngat buzunid’a mi.
10 Ar suma d’al suma adigagina pet a mbeï le sun nda Ma didina mi he vuna kata, 11 nala, zlub’u d’a ngaf tad’a ki baru d’a tchil la teteng nga kata ki vama zlubuttchi katna, kawei mat ma vunam gundina, agu mat ma bebed’ena, karangâli matna, agu mat ma murgulina ki kawei mam ma ad’um kä na, 12 zandu’â hAlonina kagu ma murguli ma hlum ki na, zandu’â vunam ma duka, baru d’a ka ira, 13 tabul ma a tchuk avungôna kama ki karangâli mama kahle mam suma sunda pet kavungô ma a mba tinim avok Ma didinina, 14 agu lalamba kahle mam suma sunda ki lalam mamba ki mbul lalamba, 15 yima ngal dubang ma his djivid’ina ki karangâli mama, mbul ma a vom yam suma á tinizi ki irazi vazina ki dubang ma his djivid’a ma ngala, baru d’a ka ir ra avun zlub’ud’id’a, 16 yima ngal ahle suma ngat buzu suma ngala ki kawei ma iram ndjâ ma hleuna ki karangâli mama kahle mam suma sunda pet ki hal ma ngol ma mbusa ki kawei ma ad’um kä na, 17 baru d’a ka ira hi gulumun ma a gum yam zlub’ud’ina kagu mam ma murgulina ki kawei mam ma ad’um kä na, baru d’a a gat gulumuna yam zlub’ud’id’a, 18 tcheblena hi zlub’ud’ina ki ma hi gulumun ma katna ki ziyo mazina, baru d’a a le ki sunda ata yima kud’orid’a 19 ki baru d’a a tinit irat vat mi ma ngat buzuna Aron-nda ki barud’a hi groma d’a á le ki sun nda ngat buzunid’a.
20 Israel-lâ pet a tcholï woi gen Moise, a iya. 21 Suma pet suma a nga ki hur ma djivi suma tazi lazi djivid’ina, a mba ki he d’a hawa d’a a pad’at vunat mi Ma didinid’a á le ki sunda hi zlub’u d’a ngaf tad’id’a, á le ki sun nda kud’ora, á tchil ki baru d’a a tinit irat vata mi.
22 Andjofâ karopma pet suma huruzi djivid’ina, a mba ki ngangam ma humba ki ma atchina ki ma abona ki ma kela kahle suma a lazi ki lorina pet, a hazi he d’a hawa d’a tak ka a tinit irat vata mi Ma didina. 23 A mba ki baru d’a botlozid’a ki d’a hleu d’a sisila ki d’a hleu d’a kekenga ki d’a luluî d’a lalavata, tumus b’ogeina, bak gamlâ ma a tchorom hleud’ina ki bak azar ma aduk mbina kä ma a yum ala dofênina. 24 Suma pet suma a he kawei ma hapma ki kawei ma hleuna he d’a hawad’a mi Ma didinina a mba ki sed’eziya. Suma pet suma a he agu kasiyana yam sunda hi zlub’ud’ina a mbamzi mi.
25 Arop suma d’alâ pet a tchil baru d’a botlozid’a ki d’a hleu d’a sisila ki d’a hleu d’a kekenga ki d’a luluî d’a lalavata, a mba ki sed’eziya. 26 Arop suma ding suma d’al suma tazi lazi djivid’a yam zla ndatina, a tchil tumus b’ogeina. 27 Suma nglo suma avok Israel-lîna a mba kahina onisa kahina d’a ding nga guzut kal teglesa yam baru d’a efod’a ki d’a didik ka yam ma ngol ma ngat buzunid’a, 28 mbul lalamba ki mbul ma his ma afufuî ma a vom yam suma a tinizi ki irazi vazi kur sundina ki dubang ma his djivid’a ma a ngalama mi. 29 Israel-lâ ki zla tazi pet, andjofâ karop suma huruzi djivid’a á le sun nda Ma didina mi he vuna kat mi Moise-sina, a mba ki he d’a hawa d’a azi hat kur min mazid’id’a mi Ma didina.
Besalel ki Oholiyap a nde le sunda
30 Moise mi de mi Israel-lâ ala: Agi wagiya, Ma didina mi man Besalel Uri gorom ma Hur gorom ngolo ma ad’u andjafâ hi Juda-nina. 31 Alona mi oyôm ki Muzuk ma ned’a ma d’alâ ma wad’ud’a á le sun nda lara ge pet, 32 á nga ahlena, á le sun nda lora ki kawei ma hapma ki kawei ma hleuna, 33 á tchet ahina d’a guzut kal teglesa á b’alat yat kä ki lora, á tchet aguna, á le sun nda d’al la lara ge pet. 34 Ma didina mi hum he d’a hawa d’a d’al ndata d’igi mi hat mi Oholiyap Ahisamak gorom ma ad’u andjafâ hi Dan-nina á had’at mi suma dingâ na. 35 Ma didina mi hazi d’alâ á le sun nda lara ge pet, á ndal ahlena, á tchil baru d’a botlozid’a ki d’a hleu d’a sisila ki d’a hleu d’a kekenga ki d’a luluî d’a lalavata, á landjaf sun nda lara ge pet, á nga ahlena mi.
© Azumeina Bible © Alliance Biblique du Tchad, 1999.
