Sun nda yam suma d’engzengîd’a
1 Ar ang ngop sama mamarâ ad’enga kîk ki, wani ang gigid’em d’igi abung na. Ang giget azungeîna d’igi b’oziyongâ na, 2 arop suma momorogeina d’igi asuyong na, arop suma gureina d’igi b’oziyong suma aropma na kur d’ingêra pet mi.
3 Ang djib’er yam arop suma modono suma gagazina, ang huzi mi. 4 Wani le atchad’a modonod’a nga ki grotna d’oze grot ngolona ni, ang had’azi á le mandar Alona ki simiyêzi avok tua, á hulong wuraka mi simiyêzi kabuyozi ngolo. Wana ni vama djivina avok Alona. 5 Atcha d’a modono d’a gagazi d’a nga kaka vata, nga d’i tin hurut ni yam Alona, nga d’i tchenem andjege ki faleya. 6 Wani atcha d’a modono d’a nga d’i tit yam min matid’a, le ti nga karid’a pî, ti ni matna. 7 Ang hazi vuna yam ahle ndazina, kayam azi ka’î suma bei zlad’a kazina. 8 Wani le sana nga mi ngom simiyêm mbuo, kal pet le nga mi he tena mi suma avo hatama d’uo mi ni, mi noî ni he gagazid’a woyo, tcho mamba kal ma bei he gagazid’ina.
9 Atcha d’a modono d’a a b’irit simiyêt kä kur mbaktumbid’a, ni d’a bizat ndak dok karagayad’a, ni d’a ve mandjufâ avok tud’a, 10 ni d’a suma a le glangâsâ yam sun mat ta djivid’id’a, ni d’a nga d’i ngom grotna djivid’id’a, ni d’a lakoyogeinid’a, ni d’a mbus asem suma hAlonid’ina, ni d’a ndjun suma hohoud’id’a, ni d’a le sunda djivi d’a lara ge pet mi.
11 Wani ang b’ir arop modono suma awâna simiyêzi kur mbaktumba d’i, kayam me le d’od’oka hi hliuna lazi wa ni, a ar Christ seyo, a i ve mandjuf ma dingâ. 12 Sariyad’a mba d’i vaziya, kayam azi ar vun ma hle mazi ma avo’â woyo. 13 Wani azi hat nazulomba, a tit navun azina avun azina. Azi nga hat nazulomba hol li, wani a mbut ni suma tchibet zlad’a ki mbut ira. Azi de nahle suma ndak á ded’a d’uo na. 14 Kayam ndata, an min ala arop suma modono suma awâna a vik andjofâ, a vut grona, a ngom aziyazi mi, kayam a ar lovota mi mei suma djangûna á de zla d’a tchod’a kei d’i. 15 Ki tchetchemba, arop suma modono suma hiuna a ar wa lovot mazi d’a d’ingêra woyo, a nga tit bugol Seitan. 16 Le atcha d’a he gagazid’a nga karop suma modonod’a avo hatad’u ni, ndat tat ndjunuziya, kayam ar aneka yam Toka d’i. Kayam Toka ti ndjun narop suma modono suma gagazina hol.
17 Suma nglo suma a nga le sunda djivid’a avok Tokina, a ndak á fe wuraka yazi mbàmbà, kal pet ni suma a nga he tazi ngola yam wal la tchid’a ki hatina. 18 Kayam mbaktumba hAlonid’a ti dala: Ar ang nik gad’id’a avun amuhlâ ata yima nga mi miret awuna á tod’ina d’i, a b’ir kua ala: Sama le sunda ndak á fe wurak mamba. 19 Ar ang ve kala yam ma ngol ma gol Toka bei suma glangâsâ mbà d’oze hindi d’i. 20 Suma nglo suma gol Toka suma a nga le tchod’ina, ang ngobozi ir suma pet, kayam suma hiuna a mbut mandarâ.
21 An nga ni tcheneng avok Alona, avok Jesus Christ, avok malaika suma Alona mazina mi, ang ngom ahle ndazina bei gigrita, bei le yam ma ding kal ma dingâ ba. 22 Ang b’at tang á tin abong yam sama ding á tinim kur sunda avok Toka atogo zak ki. Ang le darigïd’a ki tchod’a hi sama ding nguo mi, wani ang gol tang ped’et.
23 Ang tche mbina hawa d’i, wani ki süm guguzlud’a do do, kayam hurungû, kayam tugud’ei d’a nga d’i lang teteud’a.
24 Tchod’a hi suma dingîd’a ti nga ni woi pid’ak avok bei kazi sariyad’a kaziya. Wani tchod’a hi suma dingîd’a ti nga d’i tit blogoziya. 25 Hina mi, sun nda djivid’a ti nga ni woi abu pid’agï, wani ta nga woi pid’ak kuo d’a pî ti nga ni ngeid’a d’uo mi.
© Azumeina Bible © Alliance Biblique du Tchad, 1999.
