2 Sunda Hamuleinid’a 16 - Azumeina Bible 1999 (MPG)

Asa nga mi dur ayîna ki Bäsa amul ma Israel-lâ

1 Kur biza d’a dok hindi yam karagaya d’a Asa nga mi tamulid’a, Bäsa amul ma Israel-lâ, mi mba dur ayîna ata suma Juda-na, mi min azì ma Rama-na kayam mi min d’el Asa ki suma Juda-na a buzuk kei abu d’oze a hulong avod’a. 2 Kayam ndata, Asa mi yo kawei ma hapma ki lora suma nga kur gong nga ngom ndjondjoî d’a kur gong nga kud’ora hi Ma didinid’ina ki suma nga kur azì ma amulina, mi sun ki suma mi Ben-Hadat amul ma Siri ma nga kaka Damas-sâ, 3 mi dum ala: Ei djini vunei aduk tei d’igi abung mi djin vunam kabun na. Gola! An sunung sä kawei ma hapma ki lora he d’a hawad’a wana. Ang i but vun ma djin ma ang djinim ki Bäsa amul ma Israel-lîna woyo, kayam mi aran andaga manda.

4 Ben-Hadat mi ve zlad’a hi Asa-d’a, mi sun azigar mam suma nglo suma ad’engâ. A ngruf azì ma Israel-lâ durâ, a dur Ijon ki Dan ki Abel-Mayim kazì ma nglo ma Neftali ma a nga ngom ahlena kuana pet. 5 Kid’a Bäsa mi hum zla ndatid’a, mi ar bei min azì ma Rama-na, mi ar sun mamba bei led’a mi. 6 Amulâ Asa mi yi suma Juda-na ki zla tazi pet. A mba yo ahinad’a kagu ma Bäsa mi togom á min kazì ma Rama-nina, a min ki Geba ki Mispa.

Asa mi ve Hanani ma djok vun Alona dangeina

7 Kur biza ndata, ma djok vun Alona Hanani mi mba gen Asa amul ma Juda-na, mi dum ala: Ang ar zla d’a deng tang ata Ma didina Alo mangîd’a ta, ang deng tang ata amul ma Siri-na, ang he lovota mi azigar suma Siri-na á sut tazi woi abongû. 8 Suma Etiyopi-na ki suma Libi-na zlapa ki pus ma dur ayîna ki suma djang akulumeina a nablaud’a hina mimiyâk kuo zu? Wan pî Ma didina mi hangzi abongû, kayamba ang deng tang atamba. 9 Ma didina iram nga tinda yam andagad’a pet á had’enga mi suma a tin huruzi kam ki hur ma tunina. Zla d’a ang lat wanda ang le ni sun nda lilid’a. Ki tchetchemba, ang mba durî ayîna burâ ki burâ.

10 Asa hurum zal yam ma djok vun máma, mi gum dangeina, kayam hurum mi zal yam zla d’a ma djok vuna mi dumzid’a. Kur biza ndata, Asa mi nde djop vun suma dingâ aduk suma mi.

Amul la te d’a dabid’a hi Asa-d’a

(Gol 1 Amul 15.23-24)

11 Sunda hi Asa d’a avoka ki d’a dananda, a b’irit nga kä kur Mbaktumba hamulei suma Juda-na kamulei suma Israel-lîd’a. 12 Kur biza d’a dok hindi yam zlengâ d’a mam nga mi tamulid’a, mi fe tugud’ei d’a ngola asemu. Kur tugud’ei mamba wan pî, mi hal nga Ma didina d’i, wani mi djop mi dokdor suma nglona. 13 Asa mi mit mi i azulei kä ad’u abuyom ngolo, mi mit ni kur biza d’a dok fid’i yam tu d’a mam nga mi tamulid’a. 14 A tozom kur zul la mam djugud’ot kur Azì ma ngolâ hi David-nid’a, a gum yam azang ma a lum andjaf mbul ma his ma afufuîna teteng atam ma sama yor mbulâ mi yoroma, a ngalam mbul ma his ma afufuîna ngola kal leyo.