Elihu mi de kua ala: Ni nana ba, Alona mi hat suma ge?
1 Elihu nga mi i avogovok mi de mi Job ala:
2 Ang ve tang ndjö, an nga ni vang ad’ud’a,
kayam an nga ki zla d’a ded’a kua yam Alona.
3 An mba ni feï ne manda nata yima deina,
an mba ni de woi yam d’ingêra hAlo ma lanid’a.
4 Gagazi, zla manda nga ni zla d’a kad’a d’i.
Ni sama irat ma ne mamba ndak memetna ba,
mi nga zlapa ki sed’engû.
5 Alona ni ma sib’ika, nga mi gol sa is si,
ni ma sib’ika, mi nga kad’enga á wad’ud’a pet mi.
6 Nga mi tchi suma asa’atna woyo,
nga mi ka ir zlad’a hi suma hohoud’id’a.
7 Nga mi hle iram mbei yam suma d’ingêrâ d’i,
nga mi tinizi amula zlapa kamuleina,
mi tinizi á kak didin
tala a subur taziya d’a.
*
8 Le a djinizi ni ki kindjingâ
d’oze a nga ni kur ndaka ni,
9 nga mi tagazi sun mazid’a
ata yima a hle yazi akulo á kak djangûna ki sed’ema.
10 Nga mi gazi humazi á had’aziya,
nga mi dazi ala a ar sun mazi d’a ata yat tuo d’a woyo.
11 Le azi huma a hulong yazi kä ni,
a mba dap bur mazina ki djivid’a,
a mba dap biza mazid’a ki furîd’a ndjundjum mi.
12 Wani le azi hum nga d’uo ni,
a mba tchazi woi avun ayî ma durâ,
a mba bo woi yam bei we mazid’a mi.
13 Suma tchona a nga zut tazi kur ayîna,
a nga yAlona á ndjunuzi ata yima mi djinizina d’uo mi.
14 A mba bo ni kazungeî taziya,
a mba bo ni d’igi suma batrangâ na mi.
*
15 Wani Alona nga mi prut suma hohoud’a woi kur hohou mazid’a,
nga mi gazi humazi ni ki ndaka mi.
16 Alona mba mi pad’ang ngei kur ndak manga,
mba mi tining ata yima djivi ma bei va mi lang kua ba na,
yam tabul mangâ, mba mi oî kahle suma mbulâ mi.
17 Le ang nga pat zlad’a woi kangî d’igi suma asa’atna na ni,
a mba arang bei tod’a d’i.
18 Ar ayî mangâ mi ing kur lasa d’i,
ar he d’a hawa d’a ngol la a hangzi gumunda ti pugung nguo mi.
19 Tchi mangâ kad’eng manga pet
a ndak á prud’ung ngei abo pupuluka zu?
20 Ar ang djib’er yam andjege
d’a ti yo suma woi ata yazi ma kakid’a d’i.
21 Ang gol tang djivi á hulong ata tchod’a.
Ni kayam ndata ba, ang nga kur ndaka wana.
Kal papad’a hAlonid’a
22 Elihu mi de kua ala:
Gola! Alona nga mi tak kal papa mamba woi kur ad’eng mamba.
Ni nge ba, mba mi we á hat suma d’igi mam na ge?
23 Ni nge ba, mi tagam lovota ge?
Ni nge ba, mi ndak á dum ala: Ang le nga ata yat tuo ge?
24 Ang djib’era, ang he ngola mi sun mam
mba suma a nga suburut ki sawalid’a.
25 Suma pet a wad’u,
a tcholza woi hina dei á gola.
*
26 Gagazi, Alona mi kal ngola,
ei ndak á wäd’u ngol mam ndata d’i;
sana mi ndak á hal ad’u biza mamba d’uo mi.
27 Nga mi tok mbina, nga mi mbud’um a mborogeid’a,
nga mi sum alona mi.
28 D’ugula nga d’i sumï kä yam andagad’a,
nga mi se yam suma mi.
29 Ni nge ba, mi wäd’u tinda hi d’ugulid’a ge?
Ni nge ba, mi wäd’u breî d’a ata yi mam ma kakid’a ge?
30 Gola! Mi ngui tam ki b’o mamba,
mi zlup galilei ma yiyi’â halum ma ngolîna yam kä.
31 Ni kahle ndazina ba, nga mi ka ki sariyad’a yam suma,
nga mi hazi tena ngola kal kazi mi.
32 Mi ve nga wiled’a abomu,
nga mi hat vuna á i ata yima ti i dabi kua na.
33 Nga mi de zla mamba woi ki breîd’a,
d’uwarâ nga mi b’at tam yam mba mamba mi.
© Azumeina Bible © Alliance Biblique du Tchad, 1999.
