Job mi de kua ala: An nga ki ma glangâsâ sä akulo
1 Job mi hulong de kua ala:
2 An hum andjaf zla d’a de d’a hina d’a yan ablaud’a,
agi ni suma b’leng hur suma a b’lak hur sumina.
3 Andjaf zla d’a de mang nga d’igi simetna na d’a,
mba d’i dap mi mindja ge?
Vama mi zalang hurung ata yima ang hulong ki zla d’a ded’ina ni me ge?
4 Ladjï agi vragagi ni blangân anu ni,
an pî ni ndak á de zlad’a d’igi agi na mi.
An mba ni tok zla d’a de d’a hina d’a á dagagiya,
an mba ni kidjik yan ad’ugi mi.
5 An mba ni hagi ad’enga ki zla d’a de d’a avunanda;
zla d’a de d’a mba d’i ndavunanda,
mba d’i b’lengêgi hurugi kur ndak magid’a mi.
*
6 Le an de zlad’a pî, ndak manda nga d’i ban ndi.
Le an ar bei de zlad’a pî,
ndat mba d’i wal lei ki sed’en ni nana ge?
7 Wani ki tchetchemba, Alona mi seyên wa woyo,
mi b’lak wa sum mana woi pet.
8 Iran nda mi lugud’ondjid’a,
nga d’i le glangâsâ kanu,
it mana nga mi tchugun zlad’a kan ala
zlad’a nga kanu.
9 Mi nga mi kizagan ndei kayî mama,
nga mi durun ayîna, nga mi et siyam atanu,
man ma djangûna iram nga d’i d’us atan mi.
10 A ngo vunazi woi atan á liginu,
a nga ngulunu, a nga tumun agozlonu,
a tok tazi kan mi.
11 Alona mi han abo suma tchona,
mi han abo suma asa’atna atogo zak.
*
12 An ni kak kur halasa, mi mba mi b’lagan djib’er manda,
mi van delenu, mi gan kä andaga,
mi mbud’un vama yet yeû mamba.
13 Yeû mamba nga d’i djang geven abo hî abo hî,
mi tchogon fefed’en bei mi wan hohowon ba,
mayawân mi vo kä woi andaga mi.
14 Mi nde kan atogo d’igi grang ma dur ayîna na,
mi durun mbuleina ndjandjar.
15 An tchuk baru d’a ndjondjorod’a atanu,
an pe yan kä aduk andagad’a.
16 Iran tchor gagabei abo tchina,
iran ndi gis gogombol mi.
17 Hina pet pî, abon mi do nga vama tcho d’i,
tchen manda ni yed’et burâ ki burâ.
*
18 Andagad’a, ndak tchan buzuwan ndi,
ar tchi mana suma a humum ata yina pet.
19 Ki tchetchemba, an nga ki ma glangâsâ sä kur akulod’a,
gagazi, sama le glangâsâ kana sä nakulo.
20 Buniyôna a nga lazanu,
wani an nga ni tchi ki simina iran yam Alona.
21 Ar glangâs mana mi kak sama min zlad’a adigami kAlona
d’igi sana nga mi le yam andagad’a ka hî ki ndrama na mi!
22 Kayam bizan nda a ngandjid’a ti dap mi daba,
an nga ni hle lovot ta an ndak á hulongî d’uo d’a.
© Azumeina Bible © Alliance Biblique du Tchad, 1999.
