Vama nde tam á fid’id’ina: Ma ngol ma ngat buzuna Josue
1 Ma didina mi tagan ma ngol ma ngat buzuna Josue ma nga tchola avok malaikana hi Ma didinina. Seitan mi nga tchola yam Josue bigam mba ndjufa á vum ki zlad’a.
2 Malaika máma mi de mi Seitan ala: Ar Ma didina mi ngobongû, ar Ma didin ma man Jerusalem-ma mi ngobongû. Sama wana mi ni d’igi vun adjo ma hlumî woi aduk akud’ina na d’uo zu?
3 Wani Josue mi nga tchola avok malaika máma ki baru ma zozota atamu. 4 Malaika máma mi de mi suma a nga tchola avoroma ala: Agi fogogi baru ma zozota woi atamu.
Bugola, mi de mi Josue ala: An hazang wa tcho manga woyo, an tchugung wa baru ma vun tilâ atang mi.
5 Malaikana mi dazi ala a d’ud’um kadamul la bei zozota ba d’a kamu. A d’ud’um kadamula kamu, a tchugum baru ma bei zozota ba na atam kä ir malaikana mi.
6 Malaikana hi Ma didinina mi de mi Josue ala: 7 Ma didin ma ad’engêm kal petna mi dala:
Le ang nga ge yang kä ad’u gat manda,
le ang nga ngom vun man ma hed’a mi ni,
ang mba kak ma ngolâ yam gong man nda kud’ora
katrang mata,
an mba ni hang yina aduk suma
a nga lan sunda ka wana mi.
Alona mba mi mba kazong mama
8 Ang ma ngol ma ngat buzuna Josue,
ang ki ndrong suma nga kaka avorong wana,
agi humugiya, agi sumala ni vama taka
yam sut ta nga d’i mbad’a na.
An nga ni mba kazong man
ma a yum ala Agu ma hud’ura na.
9 Ma didin ma ad’engêm kal petna mi de kua ala:
Ahina d’a tu d’a an tinit avok Josue wanda,
ira nga kua kid’iziya.
An mba ni b’ir b’ir ra ndak á b’irid’a kua,
an mba ni hle tchod’a hambas ndatid’a woi
kur bur ma tuna mi.
10 Kur bur máma agi nge nge pî
mba mi yi ndrama
ad’u guguzlu mamba d’oze ad’u tulum mama
á kak ki halasa.
© Azumeina Bible © Alliance Biblique du Tchad, 1999.
