Saul mi djop vun suma toka
1 Kur bur máma djop vun ma ngolâ mi nde yam suma toka avo Jerusalem. Azi pet a b’rau woi yayak yam ambas sa Jude-d’a ki Samari. Suma a sunuzina a arî azi hol. 2 Suma ding suma a nga le mandara Alonina a tos Etienne, a tchim ngola.
3 Wani Saul mi pleî suma toka woi ndjandjap. Mi nga mi kal kur azì ma lara ge pet, nga mi yo andjofâ karopma, nga mi tchuguzi dangeina.
WAL LA TCHI D’A YAM AMBAS SA JUDE-D’A
KI D’A SAMARI-D’ID’A
Filip mi tchi wala avo Samari
4 Azi suma a b’rau woina, a nga tchi wal Zla d’a Djivid’a ata yima lara ge pet. 5 Filip mi i kur azì ma ngol ma ding ma Samari-na, nga mi tchazi wala yam Mesi. 6 Ablau suma a nga tokina a hum zla d’a Filip mi dazizid’a ki furîd’a, a wahle suma atchap suma mi lazina. 7 Kayam muzuk ma tcho ma nga kur sumina, mi buzuk kei kur suma ablaud’a ki tchina. Suma gugutud’a ablaud’a ki suma dileîd’a a tchol akulo. 8 Suma kur azì mámina a le furîd’a ngola.
9 Sana nga kua, simiyêm ala Simon. Ni sama nga mi le sun nda mbuta kur azì ma ngol máma adjeuna. Suma Samari-na a nga le atchap kamu, kayam mam tamba nga mi dala mam mi sama ngolâ. 10 Suma pet a humumu, gugureina ki suma nglona mi. A nga dala: Sa máma nad’enga hAlona d’a a yat ala Ta ngola d’a. 11 Azi humumu, kayam mi kak ngola ki sed’eziya. A nga le atchap yam sun mam mba mbuta. 12 Wani kid’a azi he gagazid’a yam Zla d’a Djivi d’a Filip mi tchat walat yam leud’a hAlona ki simiyê Jesus Christ-sa, andjofâ karopma, mi lazi batemba. 13 Simon tamba mi he gagazid’a mi. Kid’a mi le batemba dad’a, mi nga zlapa ki Filip. Kid’a mi wahle suma simat suma nglona kahle suma ndandal suma Filip mi lazina, mi le atchap.
14 Kid’a suma a sunuzi suma Jerusalem-ma a hum ala suma Samari-na a he wa gagazid’a yam zlad’a hAlonid’a na, a sunuzi Pierre azi ki Jean. 15 Kid’a azi mbazïd’a, a tchen Alona yam suma a he gagazid’ina, kayam mi hazi Muzuk ma bei tchod’a ba na. 16 Kayam Muzuk ma bei tchod’a ba na nga bei surop yam sa adigazi tua, a lazi batemba ni ki simiyê Salad’a Jesus hol. 17 Kid’a Pierre azi ki Jean a tin abozi kazid’a, ata yi máma, a ve Muzuk ma bei tchod’a ba na kuruziya.
18 Kid’a Simon mi we Pierre azi ki Jean a tin abozi yam suma a he gagazid’a á ve Muzuk ma bei tchod’a ba na kuruzid’a, mi hal á hazi beged’a. 19 Mi dazi ala: Agi han ad’eng ndata mi, kayam sama lara ma an tin abon kama, mi ve Muzuk ma bei tchod’a ba na kurum mi.
20 Wani Pierre mi dum ala: Ang ba woi ki bege manga, kayam ang djib’er ala á fe he d’a hawad’a hAlonid’a ni ki beged’a! 21 Ang nga ki b’rau d’oze va kur zla ndata d’i, kayam hurung nga d’ingêr avok Alona d’i. 22 Kayam ndata, ang mbut hurung yam tcho manga, ang tchen Salad’a, dam hurum mba mi vat tei yam djib’er ra kurunga kla. 23 Kayam an wala ang nga ki hur ma tchona, tchod’a gang aleina mi.
24 Simon mi hulong dum ala: Agi tchenegi Salad’a kanu, kayam ahle suma agi dazi wana a mba kan ndi.
25 Bugol la Pierre azi ki Jean a le glangâsâ a tchi wala yam zlad’a hi Salad’id’a kata, a hulong Jerusalem. Kur tit mazid’a, a nga tchi wal Zla d’a Djivid’a kur azì ma Samari-na teteng.
Filip azi ki ma Etiyopi-na
26 Wani malaikana hi Salad’ina mi de mi Filip ala: Ang tchol ang i abo ma sutna kur lovot ta Jerusalem mba i Gaza-d’a, kur lovot ta i abageid’a. 27 Mi tchol mi iya. Gol wani, mi we adimbang sama Etiyopi-na nga mi djïya. Ni ma ngol ma ngom beged’a hi Kandasa amul la Etiyopi-d’ina. Mi mba Jerusalem á kud’or Alona. 28 Kid’a nga mi hulong avod’a, mi nga kaka kur pus mama, nga mi ndum mbaktum mba ma djok vun Alona Isai mi b’irita.
29 Muzu’â hAlonina mi de mi Filip ala: Ang hut go gen pus máma.
30 Filip mi ring gevemu, mi hum nga mi ndum kur mbaktum mba ma djok vun Alona Isai mi b’irita. Mi djobom ala: Ang wäd’u vama ang nga ndumum wana ko?
31 Mi hulong dum ala: An we ni nana bei sana tagandji ge? Mi de mi Filip ala mi djak akulo mi kak ki sed’em kur pusâ. 32 Zla d’a mam nga mi ndumut ta kur mbaktumbid’a ba wana:
Mi hle tamî d’igi timi ma a im ata yima ngatina na,
d’igi gor timi ma nga tchola mudjuk avok ma tchawama na,
bei mi mal vunam ba.
33 Ata ge yam mam mba kä d’a,
a kam sariya d’a aboina kamu.
Sama mba ndumum andjavam ni nge?
Kayam a tchum mbei yam andagad’a.
34 Adimbang mi hulong de mi Filip ala: An nga ni djobongû, ma djok vun Alona máma mi de na ni yam nge ge? Ni yam mam tamba, d’oze ni yam sama ding zu?
35 Filip mi mal vunam nde mi tchum wal Zla d’a Djivid’a hi Jesus-d’a kur mbaktum ndata. 36 Kid’a azi nga kur lovota tua d’a, a mbaza avun huruguka. Adimbang mi dum ala: Ang gol mbina wana: Vama d’elen bei le batemba ni me ge?
[37 Filip mi hulong dum ala: Ang le he gagazid’a ki hurung ped’u ni, ang ndak á le batemba.
Sa máma mi hulong dum ala: An he gagazid’a ala Jesus Christ nAlona Goroma.] 38 Mi de mi sama pusâ ala mi tchola. Filip ki adimbang djak a tchuk asezi kä, a i aduk mbina; Filip mi lum batemba. 39 Kid’a azi tup pei akulo aduk mbinid’a, Muzu’â hi Salad’ina mi zlak Filip. Adimbang dok wum bugol luo d’a, wani mi hle lovot mamba ki furîd’a. 40 Wani Filip mi gol wani mi ni avo Azot. Mi i avok gak mi kal Sesare. Kur tit mamba mi tchi wal Zla d’a Djivid’a kur azì ma nglona pet mi.
© Azumeina Bible © Alliance Biblique du Tchad, 1999.
