Ma didina mi ngop sum mama
1 Malaikana hi Ma didinina mi tcholï Gilgal mi mba Bokim, mi de mi Israel-lâ ala: An buzugugï woi avo Ezipte, an mba wa ki sed’egi kur ambas sa an hle vunan kat mabuyogi ngolo ki gun tad’id’a. An dala: An mba ni but vun ma djin ma an djinim ki sed’egina woi dei gak didin. 2 Wani an hagi vuna ala: Ar agi djinigi vunagi ki suma kur ambas sa wandina d’i, agi pleyêgi yi mazi ma teteng ma ngal ahle suma ngat buzuna woyo. Wani agi humun nga vunan ndi. Ni kayam me ba, agi lagi hina ge? 3 Kayam ndata, an nga ni dagiya, an mba ni digizi woi avorogi d’i. Azi mba kak ki sed’egiya, alo mazina mba mi mbut ni dau ma vigigina.
4 Kid’a malaikana hi Ma didinina mi de zla ndata mi Israel-lâ peta, a nde tchina ki delezi akulo. 5 A yi yi máma ala Bokim, a hahle suma ngat buzuna mi Ma didina kua mi.
Matna hi Josue-na
6 Kid’a Josue mi tchuk ablaud’a hi Israel-lâ avod’a, nge nge pî mi i mi hlambas sa a humzi djonid’a. 7 Ablaud’a ti le sunda mi Ma didina kid’a Josue ki suma nglo suma a nga zlapa ki sed’ema a nga ki irazi tua d’a, ni suma a we sun nda nglo d’a Ma didina mi ndagat vunat yam Israel-lîd’a.
8 Josue Nun goroma azongâ hi Ma didinina, mi le bizad’a ni kis kam dogo mi mid’a. 9 A tozom yam andaga d’a a humzi djonid’a avo Timnat-Heres sa yam ahinad’a hi Efraim-mba abo ma norâ hahina d’a Gas-sid’a. 10 Suma kur atchogoi ndatina pet a bo, a i ad’u abuyozi ngolo suma a bona. Suma a vrak blogozi kur atchogoi d’a dingina, a we nga Ma didina d’oze sun nda mi ndagat vunat yam Israel-lîd’a d’uo mi.
SUMA NGLO SUMA AVOK ISRAEL-LÎNA
Israel-lâ a ar Ma didina woyo
11 Israel-lâ a nde le sun nda Ma didina tam nga d’i lum djivi kat tuo d’a, a nga kud’or alo ma a yum ala Bäl-lâ. 12 A ar Ma didina Alona habuyozi ngolo ma buzuguzï woi kur Ezipte-na woyo, a zlap kalo ma tetengâ hi suma a nguyuzina, a nga grif kä avoromu. Ni hina ba, a zal hur Ma didina. 13 A ar Ma didina woyo, a nga kud’or alo ma a yum ala Bäl-lâ kalo d’a a yat ala Asera-d’a mi.
14 Ma didina hurum zal ngola ata Israel-lâ, mi hazi abo suma a hurum ahlena hi sumina, a hurumuziya. Mi guzuzi woi abo mazi suma djangû suma a nguyuzina. Kayam ndata, azi ndak nga á tchol avok mazi suma djangûna d’uo d’a. 15 Ata yima lara ma azi nga i abagei durîna, Ma didina mi arazi abo mazi suma djangûna á lazi tchod’a d’igi mi de na, d’igi mi gunuzi tam na mi. Kayam ndata, azi nga kur hohoud’a ngola. 16 Ma didina mi tinizi suma nglo suma avorozi suma a sud’uzi woi abo suma a nga hurumuzina. 17 Hina pet pî, azi nga hum vun mazi suma a nga avorozina d’i. Kayam azi mbut tazi gaulangâ kalo ma dingâ teteng, a nga grif kä avoromu, a d’es sei atogo zak kur lovot ta abuyozi ngolo suma a ge yazi kä ad’u vun ma hed’a hi Ma didinina a tit kura, a le ni sun nda dinga vaziya. 18 Ata yima Ma didina mi tinizi suma avorozina, Ma didina mi nga zlapa ki ma avorozi máma, nga mi pad’azi woi abo mazi suma djangûna, kid’a ma avorozi máma mi nga ki iramba. Kayam Ma didina mi wazi hohowozi yam zam ta d’a azi nga zamat abo suma a nga lazi ndaka suma a nga djobozi vunazina. 19 Wani kid’a ma avorozina mita, azi hulong a le tcho d’a ding nga kala habuyozi ngolod’a, a zlap kalo ma dingâ teteng, a kud’uromu, a grif kä avorom mi. A ar nga sun mazi d’a tcho ndata d’oze hur mazi ma b’ala ki so vun mazina woi d’i.
Ma didina mi kuk Israel-lâ
20 Ata yi máma Ma didina hurum zal ata Israel-lâ ngola, mi dala: Kayamba andjaf sum ndazina a but vun ma djin ma an djinim kabuyozi ngolona woyo, a ge nga yazi kä ad’u zla manda d’uo d’a, 21 an tanda nga ni dik andjaf suma a ar abo Josue bei dika mi mitna woi avorozi d’uo mi. 22 An arazi hina á kuk Israel-lâ á we na ni a mba tit yam gat manda d’igi abuyozi ngolo a tit kat hina d’oze a tit kat tuo zi ge?
23 Ma didina mi ar andjaf suma mi hazi nga abo Josue d’uo ndazina a kak kur ambasa, mi digizi nga woi atogo zak ki.
© Azumeina Bible © Alliance Biblique du Tchad, 1999.
