Dep pa ged’a hi Paul-la
1 Ni an Paul ma Alona mi yan kur min mamba mi mbud’un ma a sunuma hi Jesus Christ-sâ, zlapa ki wiyeina Sosten.
2 Ami nga b’irimi mbaktum mba wanda mi agi Toka hAlona d’a sä Korente-d’a, suma Alona mi yagi mi mbud’ugi sum mama, mi tinigi iragi vagi zlapa tu ki Jesus Christ-sâ, mi suma pet suma ata yima lara ge pet suma a nga yi simiyê Saleina Jesus Christ-sâ mi. Mam ma ala ni Salazina, ni Saleina mi na. 3 Ar sumad’a ki b’leng nga halasa hAbui Alonid’a ki d’a hi Saleina Jesus Christ-sa a kak ki sed’egid’a.
Ahle suma djivi suma ei fazi yam Christ-sâ
4 An nga ni le mersi mAlo mana teteu kayam suma d’a mi vagizi yam Jesus Christ-sa. 5 Kayam mi mbud’ugi wa suma ndjondjoîna kur ahlena pet zlapa tu ki Christ, nala, zla d’a de d’a lara ge pet ki wad’ud’a. 6 Zla d’a glangâs sa a lat yam Christ-sa ti nga kaka adigagi ngingring. 7 Kayam ndata, he d’a hawad’a hAlonid’a tu pî ti kid’agagi nga agi suma nga djubugi bur ma Saleina Jesus Christ mba mi nde woina d’i. 8 Ni mam ma mba mi hagi ad’enga gak bur ma dabid’a, tala agi kagagi suma bei zlad’a kagi ba kur bur ma mbad’a hi Saleina Jesus Christ-sâ na. 9 Alona ni Ma d’engzeng ma yam vun mam ma hled’ina, ni ma yagi á kagagi zlapa tu ki Goroma Jesus Christ Saleinina.
WAL LA NGA ADUK KRETIYÊNID’A
Wala ti nga aduk suma toka
10 B’oziyona, an nga ni tchenegi ki simiyê Saleina Jesus Christ, ar agi kagagi ki vun ma tuna, ar wala ti kak adigagi d’i, ar agi kagagi zlapa tu ki djib’er ra tud’a ki zla d’a tud’a mi. 11 Kayam b’oziyoi suma avo hi Klowe-na a dan ala huneîd’a ti nga adigagiya. 12 Wana ni vama an min dagizina: Suma dingâ adigagi a nga dahlena teteng ala: An ni ma hi Paul-lâ, ma dingâ ala: An ni ma hi Apolos-sâ, ma dingâ ala: An ni ma hi Pierre-râ, ma dingâ ala: An ni ma hi Christ-sâ mi. 13 Na ni Christ mi wal zu? Na ni an Paul ni mit akulo ata aguna kagi zu? Na ni a lagi batemba ni ki simiyê an Paul zu?
14 An nga ni le mersi mAlona kayam an le nga sa batem adigagi d’i, ni Krispus ki Gayus hol. 15 Hina wani, sama ndak á dala a lagi batemba ni ki simiyênu d’i. 16 Wani gagazi, an le suma avo hi Estefanas-sâ batemba mi. Wani an we nga d’i, dam an le wa sama ding batem kla. 17 Wani Christ mi sunun ná le suma batem mbi, wani mi sunun ná tchi wal Zla d’a Djivid’a. An tchat ni ki ned’a hi sa d’i, kayam matna hi Christ ma ata agu ma b’alina mi mbut vama hawana d’i.
Jesus Christ nad’enga ki ned’a hAlonid’a
18 Kayam wal la tchid’a yam matna hi Christ ma ata agu ma b’alina ni vama lilid’a ir suma a nga ba woina, wani ir ei suma fei sutina, ndat nad’enga hAlonid’a. 19 Kayam ndata, mbaktumba hAlonid’a ti dala:
An mba ni b’lak ned’a hi suma ned’ina woyo,
An mba ni mbut wed’a hi suma wed’a vama hawana mi.
20 Ki tchetchemba, sama ned’a mi nga ni lara ge? Sama hat suma mi nga ni lara ge? Sama tchi tuguyo ma kur atchogoi d’a wandina mi nga ni lara ge? Alona mi tagei nga ala ned’a hi duniya d’a wanda ni lilid’a d’uo zu?
21 Suma duniyad’a yam ne mazid’a a we nga Alona d’i. Kayam ndata, Alona kur ne mamba mi nga hurum á sut suma a he gagazid’a yam wal mami d’a tchi d’a lilid’ina. 22 Wani Juif-fâ a hal á wahle suma atchap suma simata, wani Gre’â a halî ned’a. 23 Wani amiya, ami tchami ni wala Christ ma a b’alam akulo ata agunina. Ir Juif-fâ zla ndata ni vama dap asema, ir andjaf suma dingâ ni vama lilid’a mi. 24 Wani ir suma Alona mi yazi aduk Juif-fâ kandjaf suma dingîna, Christ máma nad’enga ki ned’a hAlonid’a. 25 Kayam lilid’a hAlonid’a ti kal yam ned’a hi sumid’a, amangeî mamba ti kal yam ad’enga hi sumid’a mi.
26 B’oziyona, ar agi djib’eregi yam yi d’a Alona mi yagid’a. Mi yi nga suma suma a nga golozi ala ni suma ned’a na ablaud’a d’i, mi yi nga suma ad’enga ki suma a vud’uzi ata andjaf ma kal teglesîna ngol luo mi. 27 Wani Alona mi man ni suma suma kur duniyad’a a nga golozi ala ni suma lilid’a na á mbut suma ned’a zulona. Mi man suma suma kur duniyad’a a nga golozi ala ni suma amangeîna na á mbut suma ad’engâ zulona mi. 28 Alona mi man vama suma duniyad’a a wum ala ni va d’uo na ki vama azi golom is ala ni va irazi d’uo na á b’lak vama suma a nga golom ala ni vana woyo. 29 Kayam ndata, sa tu pî mi ndak á subur tam avok Alona d’i. 30 Wani Alona mi zlabagi wa tu ki Jesus Christ, mi mbut Christ ne meid’a mi. Ni yam Christ ba, ei mbud’i suma d’ingêrâ avok Alona, mi mbud’i suma hAlonina, mi pad’ei woi mi. 31 Kayam ndata, d’igi mbaktumba hAlonid’a ti de na ala: Sama min subur tama, ar mi subur tamî yam sun nda Ma didina mi lata.
© Azumeina Bible © Alliance Biblique du Tchad, 1999.
