Jowahas azi ki Jojakim ki Jojakin a tamula
(Gol 2 Amul 23.30—24.17)1 Suma kur ambasina a hle Jowahas Josiyas goroma, a tinim amula balum abum avo Jerusalem. 2 Kid’a Jowahas mi kak amulid’a, bizamî dok mbà yam hindi. Mi tamula avo Jerusalem tilâ hindi. 3 Amul ma Ezipte-na mi pad’am mbei kur amula avo Jerusalem, mi tin tara yam suma kur ambasina kawei ma hapma tonna hindi, lora kilona dok hindi mi. 4 Amul ma Ezipte-na mi tin Jowahas wiyema Eliyakim amula yam suma Juda-na ki suma Jerusalem-ma, mi djogom simiyêm ala Jojakim. Neko mi ve wiyema Jowahas, mi i ki sed’em Ezipte.
5 Kid’a Jojakim mi kak amulid’a, bizamî dok mbà yam vahl. Mi tamula avo Jerusalem bizad’a dogo yam tu, mi le sun nda tchod’a avok Ma didina Alo mama.
6 Nebukanezar amul ma Babilon-na mi mba dur ayîna atamu, mi djinim ki kindjing ma kawei ma hleuna, mi i ki sed’em Babilon. 7 Nebukanezar mi yo ahle suma sun suma kur gong nga kud’ora hi Ma didinid’ina, mi tchuguzi sä kur aziyam mamula avo Babilon.
8 Sunda hi Jojakim mba ara ki sun nda ndjendje d’a mi lata kahle suma ding suma a fazi atama, a b’irizi nga kä kur Mbaktumba hamulei suma Israel-lâ kamulei suma Juda-nid’a. Goroma Jojakin mi vrak tamula blangâmu.
9 Kid’a Jojakin mi kak amulid’a, bizamî klavandi . Mi tamula avo Jerusalem tilâ hindi ki burâ dogo, mi le sun nda tchod’a avok Ma didina. 10 Kid’a a mba kur biza d’a awilid’id’a, Nebukanezar mi vum mi i ki sed’em avo Babilon zlapa kahle suma guzuzi kal tegles suma a le ki sunda kur gong nga kud’ora hi Ma didinid’ina, mi tin wiyema Sedekiyas amula yam suma Juda-na ki suma Jerusalem-ma mi.
Amul la ted’a hi Sedekiyas-sa. Hled’a hi Jerusalem-mba
(Gol 2 Amul 24.18—25.21Jer 39.1-10Jer 52.1-27)11 Kid’a Sedekiyas mi kak amulid’a, bizamî dok mbà yam tu. Mi tamula avo Jerusalem bizad’a dogo yam tu. 12 Mi le sun nda tchod’a avok Ma didina Alo mama, mi nga mi hum zla d’a Jeremi ma djok vun Alona nga mi dumzi d’a tcholï avun Ma didinid’a d’uo mi. 13 Mi tchol huneîd’a kamulâ Nebukanezar ma mam mi gun tam avorom ki simiyê Alonina mi. Mi ar zlad’a mi hulongî gen Ma didina Alona hi Israel-lîna ta, mi le ni yam mba ad’enga, mi b’al hurum kiki mi. 14 Suma nglo suma avok suma ngat buzuna kablaud’a a nga le sun nda tcho d’a ata yat tuo d’a kam kua kam kua, a nga tit yam sun nda ndjendje d’a lara ge pet ta andjaf suma dingâ a nga lata, a mbut gong nga kud’ora hi Ma didina d’a mi tinit irat vat avo Jerusalem-mba ndjendjed’a mi. 15 Ma didina Alona habuyozi ngolona mi sunï mam suma sunda atazi yam ablaud’a á gazi humaziya, kayam mam min sut sum mama ki yam ma kaka mi. 16 Wani a nga las suma Alona mi sunuzïna, a gol zla mamba is, a nga san ad’u mam suma djok vuna, gak Ma didina hurum zal ngola yam suma. Ata yi máma a fe nga lovota á sut tazi d’i.
17 Kayam ndata, Ma didina mi sunï amul ma Babilon-na ataziya. Mi tchi azungeî mazina ki mbigeu d’a fiyaka kur gong mazi d’a kud’ora. Alona mi ar nga gor azong ngoze gor wei d’oze mamar roze ma yam abus si, mi hazi woi abo amul ma Babilon-na pet. 18 Nebukanezar mi yo ahle suma sun suma kur gong nga kud’ora hi Ma didinid’a suma nglona ki suma gureina zlapa kahle suma ndjondjoî suma kur gonga hi Ma didinid’ina ki suma hamulîna ki suma hi mam suma sundina pet mi, mi i ki sed’ezi avo Babilon. 19 Suma Babilon-na a ngal gong nga kud’ora hAlonid’a woyo, a to gulumun ma Jerusalem-ma kä woyo, a ngal azì ma amula woyo, a b’lak ahle suma guzuzi kal tegles suma kur azinina woi pepet mi. 20 Nebukanezar mi yo suma a sut tei avun ayînina, mi i ki sed’ezi Babilon, mi mbud’uzi magumei mama ki magumeina hi gromina mi gak a mba kur atchogoi d’a amul ma Perse-na mi mba á te leud’id’a. 21 Ahle ndazina a le ná ndak vun zla d’a Ma didina mi dat avun ma djogom vunama Jeremi-d’a, kayam mi dala: Ambasa mba d’i ar djona gak bizad’a dok kid’iziya, gak ti dap yima ngattchi á tuk tat á ndak vun biza d’a ndat fe nga tuk tad’a kua d’uo d’a mi.
Sirus mi he vuna ala a hulong min gong nga kud’ora
22 Kur biza d’a avok ka Sirus amul ma Perse-na nga mi tamulid’a, Ma didina mi min á ndak vun zla d’a mi dat avun ma djogom vunama Jeremi-d’a, mi zut Sirus amul ma Perse-na mi tchi wala ki delem akulo kur leu mamba, mi b’ir kur mbaktumba ala:
23 Gola! Vama an amul ma Perse-na duma ba wana: Ma didina Alo ma akulona mi han leud’a yam andagad’a pet, mi han vuna ala an minim gong nga kud’ora avo Jerusalem yam andaga d’a Juda-d’a. Suma pet suma a nga adigagi suma ala ni sum mama na, ar azi hulong avo Jerusalem. Ar Ma didina Alo mazina mi kak ki sed’eziya.
© Azumeina Bible © Alliance Biblique du Tchad, 1999.
