David mi ndum Israel-lâ
(Gol 2 Sam 24.1-9)1 Bur tu Seitan mi tchol djangûna ki Israel-lâ, mi zut David á ndumuziya. 2 David mi de mi Jowap ki suma nglo suma avok sumina ala: Agi igiya, agi i ndumugï Israel-lâ, agi tinigi ad’ud’a Berseba dei gak mba avo Dan. Agi mbeï danu, kayam an ni we azi ni ga ge.
3 Jowap mi hulong de mamulâ ala: Ar Ma didina Alo mangâ, mi zul sum mama kam kua kikisa kis! Salana, amul mana, azi pet nazungeî mangâ d’uo zu? Salana, ni kayam me ba, ang hal ndumuzi mbeî ge? Ni kayam me ba, ang mbut Israel-lâ suma tchona ge?
4 Wani vun ma hed’a hamulîna mi kal yam Jowap, mi i tid’ï yam ambas sa Israel-la pet. Bugola, mi hulongî avo Jerusalem. 5 Jowap mi mba, mi he ndumba hi sumid’a mi David. Israel suma a we durîna a ni 1.100.000, suma Juda-na a ni 470.000 mi.
6 Mi ndum nga suma hi Levi-na ki suma hi Benjamin-na d’i, kayam vun ma hed’a hamulîna mi nga ata yam mbi.
Alona mi ngop David yam tcho mamba
(Gol 2 Sam 24.10-17)7 Ahle ndazina a le nga Alona tam djivi d’i; mi ngop Israel-lâ. 8 David mi de mAlona ala: Zla d’a an lat wanda, an le ni tcho d’a ngola. Ki tchetchemba, ang vat hurung ngei kanu, kayam an le ni sun nda lilid’a.
9 Ma didina mi de zlad’a mi Gat ma djogom vunam mbei mi David-na ala: 10 Ang i de mi David ala: Ma didina mi dala: An tining ahle suma an ngobong ki na hindi; ang man tu an mba ni gad’ang kiya.
11 Gat mi mba gen David mi dum ala: Ma didina mi dala: 12 Ang min ni me ge? Ang min ala baktarad’a ti nde yam ambas manga bizad’a hindi, d’oze ang min ala mang suma djangûna a kus kang ki mbigeu d’a fiyaka gak tilâ hindi, d’oze ang min ala an Ma didina ni sunï malaika mana ki mbigeu d’a fiyaka abom ki tugud’ei d’a tchod’a á tchi suma woi yam ambas sa Israel la lara ge pet gak burâ hindi zu? Ki tchetchemba, ang danu; an hulong humba mi ma sununïna.
13 David mi hulong de mi Gat ala: An nga kur tcha tatad’a ngola! An min ndabo Ma didina, kayam we hohou mamba, ti ngola heî. Ar an ndabo suma d’i.
14 Ma didina mi sun tugud’ei d’a tcho d’a tchi matna aduk Israel-lâ. Ti tchi suma 70.000. 15 Alona mi sunï malaika mama á b’lak azì ma Jerusalem-ma. Ata yima mam nga mi b’lagama, Ma didina mi we hina, wani mi nde hat hurum yam b’lak ndata, mi de mi malaika ma tchi mat máma ala: Ndak da’! Ki tchetchemba, ang gabong kä!
Malaikana hi Ma didinina mi nga tchola go ki yima to awuna hi Ornan ma Jebus-sâ.
16 David mi hle iram akulo, mi we malaikana hi Ma didinina, mi nga tchola aduk andagad’a kakulod’a, mbigeu d’a fiyaka nga pata woi abomu, mi mbut iram yam azì ma Jerusalem-ma. Ata yi máma David ki suma nglo suma a tchuk baru d’a dodora atazina, a grif kä ki irazi andaga. 17 David mi de mAlona ala: Ni an ba ni dala a ndum suma d’uo zu? Ni an ba ni so vuna! Wani sum ndazina a le ni me ge? Ma didina Alo mana, ar ang ngobon ni an ki sum mana. Ar ang ngop sum mangâ ki tugud’ei d’a tcho d’a tchi mat ndata d’i.
David mi gus yina yam yima ngal ahle suma ngat buzuna
(Gol 2 Sam 24.18-25)18 Malaikana hi Ma didinina mi de mi Gat ala: Ang i he vuna mi David ala mi i ata yima to awuna hi Ornan-na, mi min yima ngal ahle suma ngat buzuna mi Ma didina.
19 David mi i d’igi Ma didina mi hum vuna avun Gat na. 20 Ornan nga mi to gemena, mi mbut iram mi we malaikana. Grom suma fid’i suma a nga ki sed’ema, a ring a ngei taziya. 21 Kid’a David mi mba go ki Ornan-nda, Ornan mi mbut iram mi we David, mi nde woi ata yima to gemena, mi grif kä ki iram andaga avok David. 22 David mi de mi Ornan ala: Ang han yi mang ma to gemena, kayam an ni min yima ngal ahle suma ngat buzuna mi Ma didina kua. Ang handji ni ki gus sa irata kayambala tugud’eid’a ti ar suma bei tchid’a d’a.
23 Ornan mi de mi David ala: Ang vumu! Salana amul mana, ang le vama hurung minima. Gola! An hang amuzleina wana ni yam he d’a hawa d’a ngala, agu pusâ ki dju’â a nagu ma ngala, awuna ni yam he d’a hawa d’a afuta mi. Wan pet, an hangzi ni mi angû.
24 Wani amulâ David mi de mi Ornan ala: Nga na d’i! An guzumî guza abongû! An nga ni he va mangâ mi Ma didina d’i, an nga ni he vama an guzum nga d’uo na he d’a hawa d’a ngala mi Ma didina Alo mana d’uo mi.
25 David mi he bege lora kikis karagaya mi Ornan yam yi máma. 26 David mi min yima ngal ahle suma ngat buzuna mi Ma didina kamu, mi hahle suma ngat buzu suma ngala kahle suma ngat buzu suma zlap darigïd’a, mi tchen Ma didina mi. Ma didina mi hulongôm humba ni kakud’a. Akud’a ti tcholï akulo yam yima ngal ahle suma ngat buzu suma ngala. 27 Ata yi máma Ma didina mi de mi malaikana ala: Ang hulong mbigeu manga kur aziyad’u.
28 Ata yi máma David mi wala Ma didina mi hulongôm humba kur ambid’a’â hi Ornan ma Jebus-sîna, mi he he d’a hawa d’a ngat buzuna ata yi máma. 29 Wani zlub’u d’a Moise mi vat mi Ma didina sä abagei hur fulîd’a ki yima ngal ahle suma ngat buzu ma a tinim iram vama a sä ni Gabawon. 30 David mi ndak á i á tchen Alona kua d’i, kayam nga mi le mandarâ abo mbigeu d’a fiyaka hi malaikana hi Ma didininid’a.
© Azumeina Bible © Alliance Biblique du Tchad, 1999.
