Sunda hi suma hi Levi-nid’a
1 Wana nandjafâ hi Aron azi ki Moise-sâ ata yima Ma didina mi de zlad’a mi Moise yam ahina d’a Sinai-d’ina:
2 Wana ni simiyê Aron groma: Ma ngolâ a yum ala Nadap; b’oziyoma ni Abihu, Elazar ki Itamar. 3 Wana ni simiyê Aron grom suma a vozi mbulâ kazi á tinizi irazi vazi á le sun nda ngat buzunid’ina. 4 Nadap azi ki Abihu a bo woi avok Ma didina, ata yima a mba kaku d’a dinga avorom hur ful ma Sinai-nina; a vut nga gro d’i. Elazar azi ki Itamar a ar á le sun nda ngat buzuna avok abuzi Aron.
5 Ma didina mi de mi Moise ala: 6 Ang mbeï ki suma hi Levi-na, ang hazi abo ma ngat buzuna Aron, kayam azi le sunda abomu. 7 Azi mba le sunda mi Aron yam ablaud’a hi Israel-lîd’a pet avun zlub’u d’a ngaf tad’a. Azi mba ndak vun sun mazid’a kur yima kak ma a tinim iram vama. 8 Azi mba ngom ahle mam suma sunda, azi mba le sunda yam Israel-lâ kur yima a tinim iram vam máma. 9 Ang he suma hi Levi-na mi Aron azi ki groma. Ar Israel-lâ a tinizi irazi vaziya. 10 Ang de mi Aron azi ki groma a ngom sun nda ngat buzuna djiviya. Le sana ni ma ngat buzuna d’uo ba, mi dod’u ni, agi tchum mbeyo.
11 Ma didina mi de mi Moise kua ala: 12 Ni an ba ni man suma hi Levi-na aduk Israel-lâ á vrak balum gro suma a vut avo’â hi Israel-lîna á kak sum mana. 13 Gro suma a vut avo’â pet a ni mana. Kur bur ma an ni tchi gro suma a vut avo’â hi Ezipte-na woi yam ambas mazid’ina, an tin gro suma a vut avo’â hi Israel-lîna irazi vazi mi anu. Le ni suma d’oze d’uwarâ a ni mana. An ni Ma didina.
A ndum suma hi Levi-na
14 Ma didina mi de mi Moise abagei hur ful ma Sinai-na ala: 15 Ang ndum suma hi Levi-na ad’u andjavazi kad’u adezeziya, ang ndum gro andjofâ tin ad’ud’a ata suma tilizi tutuna ki suma kal tilâ tutuna mi. 16 Moise mi ge yam kä ad’u vun ma hed’a hi Ma didinina, mi ndumuzi d’igi mi hum vuna na.
17 Levi groma simiyêzi ba wana: Gerson, Kehat ki Merari.
18 Wana ni simiyê Gerson groma ad’u adezeziya: Libini ki Simei.
19 Wana ni simiyê Kehat groma ad’u adezeziya: Amram, Jisar, Hebron ki Uziyel.
20 Wana ni simiyê Merari groma ad’u adezeziya: Mali ki Musi.
Wana nadesâ hi suma hi Levi-na ad’u andjavaziya.
21 Suma a tcholï ad’u adesâ hi Libini-na kadesâ hi Simei-na, abuzi ngolo ni Gerson. 22 Gro andjof suma a ndumuzi suma tilizi tutuna ki suma kal tilâ tutuna pet a ni 7500. 23 Adesâ hi Gerson-na mi ve kang mama bugol zlub’u d’a ngaf tad’a abo ma fladegena. 24 Ma ngol ma avok suma hi Gerson-nina ni Eliyasaf Layel goroma. 25 Wani a he sunda hi zlub’u d’a ngaf tad’id’a nabo Gerson groma, nala, barud’a hi yi mat ma a tinim iram vama, baru d’a kat akulod’a pet, baru d’a ka ir ra avunata, 26 barud’a hi gulumunid’a ki baru d’a ka ir ra avunam mba ngui zlub’u d’a ngaf tad’id’a ki d’a ata yima ngal ahle suma ngat buzunid’a pet ki ziyo ma atatna mi.
27 Suma a tcholï ad’u adesâ hi Amram-ma, adesâ hi Jisar-râ, adesâ hi Hebron-na kadesâ hi Uziyel-lâ, abuzi ngolo ni Kehat. 28 Gro andjof suma a ndumuzi suma tilizi tutuna ki suma kal tilâ tutuna pet a ni 8600. Azi ni suma a tinizi á ngom yima a tinim iram vama. 29 Adesâ hi Kehat-na mi ve kang mama bugol zlub’u d’a ngaf tad’a abo ma sutna. 30 Ma ngol ma avok suma hi Kehat-nina ni Elisafan Uziyel goroma. 31 A hazi sun nda ngom zandu’â hAlonina, tabul ma a tin avungôna kama, agu lalamba, yima ngal dubang ma his djivid’ina, yima ngal ahle suma ngat buzuna, ahle suma a le ki sunda kur yima a tinim iram vama kahle suma a lum ki sunuma ki baru d’a ka ir ra kurut krovod’a kahle suma a le ki sunda kurutna pet mi.
32 Elazar ma Aron goromina, ni ma ngol ma yam suma nglona hi suma hi Levi-nina, ni ma nga mi ngom suma a nga ngom yima a tinim iram vamina mi.
33 Suma a tcholï ad’u adesâ hi Mali-na kadesâ hi Musi-na, abuzi ngolo ni Merari. 34 Gro andjof suma a ndumuzi suma tilizi tutuna ki suma kal tilâ tutuna pet a ni 6200. 35 Ma ngol ma avok adesâ hi Merari-nina ni Suriyel Abihayil goroma. Adesâ hi Merari-na mi ve kang mama bugol zlub’u d’a ngaf tad’a abo ma norâ. 36 Suma hi Merari-na a hazi agu ma bebed’ena hi zlub’ud’ina ki kawei ma ad’um kä na, kawei ma lata ma atama, agu ma murguli matna ki kawei ma ad’um kä na kahle mat suma sunda kahle suma atatna pet mi. 37 A hazi agu ma murgulina hi gulumunina pepet ki kawei ma ad’um kä na ki tcheble mama ki ziyo mama mi.
38 Moise, Aron azi ki groma a ve zlub’u mazid’a avun zlub’u d’a ngaf tad’a abo ma yorogona. A nga ngom yima a tinim iram vama yam Israel-lâ. Le sama ding ma nga ni ma ngat buzuna d’uo ba, mi hut go á le sun ndata ni, a tchum mbeyo.
39 Gro andjof suma hi Levi-na pet suma Moise azi ki Aron a ndumuzi ad’u adezezi tin ad’ud’a ata suma tilizi tutuna ki suma kal tilâ tutuna d’igi Ma didina mi hazi vuna na na, a ni 22.000.
Ar a mbut yam gro suma a vud’uzi avo’â
40 Ma didina mi de mi Moise ala: Ang ndum gro andjof suma a vut avo’â hi Israel-lîna, tin ad’ud’a ata suma tilizi tutuna ki suma kal tilâ tutuna mi, ang b’irizi simiyêzi kur mbaktumba. 41 Ang tinin suma hi Levi-na irazi vazi mi an Ma didina balum gro Israel suma a vud’uzi avo’â, ang tinin d’uwarâ hi suma hi Levi-na iram vam balum d’uwarâ hi Israel-lâ ma vut avo’â mi.
42 Moise mi ndum gro Israel suma a vut avo’â pet d’igi Ma didina mi hum vuna na. 43 Gro andjof suma a vut avok suma a ndumuzi ki simiyêzi gagang suma a tin ad’ud’a ata suma tilizi tutuna ki suma kal tilâ tutuna pet a ni 22.273.
44 Ma didina mi de mi Moise ala: 45 Ang tinin suma hi Levi-na irazi vazi mi an Ma didina balum gro Israel suma a vud’uzi avo’â, ang tinin d’uwarâ hi suma hi Levi-nina iram vam mi an balum d’uwarâ hi Israel-lâ ma a vut avo’îna. Suma hi Levi-na ni sum mana, kayam an ni Ma didina. 46 Ang wurak yam gro Israel suma a vut avok suma 273 suma ablawazi d’a kal lei yam suma hi Levi-nid’a, 47 ang yo bege d’a hap pa a ngat á hed’a yam yima a tinim iram vamid’a vavahl kazi gagang; ni bege d’a ndak ir grama dogod’a. 48 Ang he bege d’a hap ndata mi Aron azi ki groma á mbut yam suma ablawazi d’a kal lei yam suma hi Levi-nid’a.
49 Moise mi yo bege d’a hap pa a hat á mbut yam suma ablawazi d’a kal lei yam suma hi Levi-nid’a. 50 Moise mi yo bege d’a hapa hi gro suma a vut avo’â hi Israel-lâ ndata pet ni 1365; ni bege d’a a ngat á hed’a yam yima a tinim iram vamid’a. 51 Moise mi he bege d’a a mbut ki yam sumid’a mi Aron azi ki groma yam vun ma hed’a hi Ma didinina d’igi mam hum vuna na.
© Azumeina Bible © Alliance Biblique du Tchad, 1999.
