I atogo á hurumba, b’at atogo á b’rau ahlena
1 Ma didina mi dan ala: Ang hlahina d’a tchet ta bebed’e d’a ngola, ang b’ir kua djivid’a tetet ala: I atogo á hurumba, b’at atogo á yo ahle suma a yozina. 2 An yo suma glangâs suma iratna mbà ki sed’enu, nala, ma ngat buzuna Uri ki Zakari Berekiya goroma. 3 Bugola, an i zlap kaman nda djok vuna. Ti ve wirâ, ti vut gorâ. Ma didina mi dan ala: Ang tinim simiyêm ala: I atogo á hurumba, b’at atogo á yo ahle suma a yozina. 4 Avok ka gor máma bei mi we á yabum ala Iba d’oze yasum ala Yogo d’a, a mba hurum ndjondjoî d’a Damas-sa kahle suma a yozi avun ayîna avo Samari-na, a mba i ki sed’ezi avok amul ma Asiri-na.
Suma Asiri-na a b’lak yina
5 Ma didina mi dan kua ala:
6 Sum ndazina a noî mbiyo ma Silowe
ma nga mi djang lalama,
a nga le furîd’a yam Resin azi
ki Remaliya goroma.
7 Kayam ndata, an Ma didina
nga ni kak djangûna ki sed’eziya,
mba ni mba kad’enga hi mbiyo alum
ma Efrat-na kaziya,
nala, amul ma Asiri-na ki subur mamba pet.
Alum máma mba mi oî woi ir b’irlim mama,
mba mi wet tei avun gongôd’i mamba papadjang,
8 mba mi kal yam ambas sa Juda-d’a,
mba mi sulul lei avunamu,
mba mi hle yina gak mbang keleng ta.
Ang Emanuel ,
ndja d’a mi ndja abom mbei tetenga,
mba mi oî yam ambas manga.
Nga hurâ handjaf suma ma hawa ya’â
9 Agi andjaf suma, agi eregi ad’ugi akulo,
wani agi mba mbud’ugi mandarâ.
Agi suma sä yam andagad’a dedeid’ina,
agi tinigi humagiya, agi humugiya,
agi minigi tagi á dur ayîna,
wani agi mba mbud’ugi mandarâ.
10 Agi ngagi hurugiya,
wani nga hur magina mba mi mbut ni vama hawa ya’â.
Agi nga dagi zlad’a,
wani zla ndata mba d’i le d’i,
kayam Alona mi nga ki sed’emiya .
Ahina d’a dap asem sumid’a
11 Kid’a Ma didina mi van kabom mi dan ala: Ar ang tit kur lovota hi sum ndazinid’a d’uo d’a, mi dan kua ala: Ang dazi ala:
12 Agi ndjagagi vunagi
ki suma a nga de zla d’a tchod’a
yam suma a nga de zla d’a tchod’a yam gatina d’i,
agi lagi mandara vama azi nga lum mandarama d’i,
agi zlagagi abom mbuo mi.
13 Ma didin ma ad’engêm kal petna tu ba,
agi wagi ala ni Ma bei tchod’a ba na.
Ni mam tu ba, agi lum mandaramu,
ni mam tu ba, agi zlagagi avorom mi.
14 Mam mba mi mbut ni zlub’u d’a a tinit irat vata,
mba mi mbut nahina d’a dap asema mi.
Nahina d’a dap asema yam leud’a hi Israel-lîd’a
ki leud’a hi Juda-nid’a,
mba mi mbut nabeid’a ki dauna
yam suma a nga kaka avo Jerusalem-ma mi.
15 Suma ablaud’a a mba dap asezi kua,
a mba puk kä, a mba kuza,
a mba tchuk kur dauna, mba mi vigiziya.
Ngop pa yam suma a nga hal á we vama nga mi mbanid’a
16 An ngom zla d’a mam dandjid’a kä, an b’al vun vama mi ndandji woina kä aduk man suma hata. 17 An tin hurun ni yam Ma didin ma ngei iram mbei avok suma hi Jakob-mina, an deng tan natam mi. 18 Gola! An ki gron suma Ma didina mi handjina, ami ni vama taka ki vama atchap ma mi tcholï ata Ma didin ma ad’engêm kal pet ma nga kaka yam ahina d’a Siyon-nda aduk Israel-lîna.
19 Suma hiuna a nga dala: Agi tchenegi suma a nga djop ki suma azuleinina ki suma a nga de zlad’a yam vama nga mi mbana suma a nga kud’us tazi d’oze a de zlad’a kä kuruzi krovona. A de kua ala: Suma a ndak á djop alo mazina d’oze á djop suma azuleina yam suma a nga ki irazina d’uo zu? Le a dagi hina ni, 20 agi hulongôzi ded’a ala: Mbeî ei hulongî yam gata ki zla d’a Ma didina mi ndeizi woid’a. Suma a tit nga yam vun ma he máma d’uo na, a mba we yima fod’a ki irazi d’i.
Nduvun nda i’îlika
21 A mba kal kur ambasa ki ndaka ki meid’a.
Fata meid’a tchazid’a, huruzi mba mi zala,
a mba ngul amul mazina kAlo mazina,
a mba mbut irazi akulo.
22 Bugola, a mba gol irazi kä andaga,
a mba we ni hur ma wurana
ki nduvunda ki djop vun ma kalâ,
a mba zud’uzi kä kur nduvun nda i’îlika.
Gor ma a vud’izina
23 Wani nduvunda mba d’i te yam andaga
d’a ti nga kur pupuluka ki tchetchem wandid’a didin ndi.
Kur atchogoi d’a kala
Ma didina mi hulong yam ambas sa Zabulon-nda
ki d’a Neftali-d’a kä.
Wani atchogoi d’a nga d’i mbad’a,
ata yi máma mam mba mi subur ambas ndata
tinï ad’ud’a kur lovot ta hlavun alum ma ngol ma Mediterane-nid’a
gak mba yam ambas sa Galile-d’a handjaf suma dingîd’a
gak mba yam ambas sa sä abo alum ma Jurdê-na woi hid’a mi.
© Azumeina Bible © Alliance Biblique du Tchad, 1999.
