Israel-lâ a dur ayîna ki suma Madiyan-na
1 Ma didina mi de mi Moise ala: 2 Ang i dur suma Madiyan-na á hlatchugul Israel-lâ. Bugola, ang mba mit i ad’u simiyêng kä azuleyo.
3 Moise mi de mi suma ala: Agi yogi suma dur ayîna adigagi á dur suma Madiyan-na á hlatchugula d’igi Ma didina mi min na. 4 Agi sunugi suma dur ayîna dudubu ad’u andjafâ hi Israel-lîna gagang.
5 A yo suma dur ayîna ad’u andjafâ hi Israel-lîna dubu dubu, nala, suma pet ni dudubud’a dogo yam mbà. 6 Moise mi sun suma durâ dudubu ad’u andjafâ gagang zlapa ki Fines ma ngat buzuna Elazar goroma, ni ma nga mi zi ahle suma a tinizi irazi vazina kadif fa a but á durîd’a mi.
7 A i dur ayîna ki suma Madiyan-na d’igi Ma didina mi he vuna mi Moise na, a tchi andjofâ woi pet. 8 A tchi amulei suma Madiyan-na vahl, nala, Evi, Rekem, Sur, Hur ki Reba, a tchi Baläm ma Beyor goromina ki mbigeu d’a fiyaka mi. 9 Suma a yoï arop Madiyan-na zlapa ki grozina magomba, a hurumï d’uwar mazina ki bege mazid’a pet mi. 10 A ngal azì mazi ma nglona woi pet, ki kang mazi ma dur ayîna mi. 11 A buzuk kei kahlena pet suma azi yozi avun ayînina, suma ki d’uwarâ mi. 12 A mba ki magumeina kahle suma a yozï avun ayînina mi Moise azi ki Elazar ma ngat buzuna kablaud’a hi Israel-lîd’a pet, suma a ve nga kangâ hur ful la Mowap pa go kalum ma Jurdê-na d’a ngagad’a yam Jeriko d’ara.
13 Moise azi ki ma ngat buzuna Elazar ki suma nglo suma avok ablaud’ina, a buzuk kei bugol kangâ á d’uguloziya. 14 Moise hurum zal ata suma nglo suma avok suma dur ayînina ki suma yam suma dudubuna ki suma yam suma kikis suma a tcholï ata yima durîna.
15 Moise mi dazi ala: Ni kayam me ba, agi aragi aropma bei tchid’a hina pet ke? 16 Ni azi ba, a ve d’alâ hi Baläm-ma, a tchuk Israel-lâ á le tchod’a avok Ma didina yam zlad’a hi Peyor-ra d’uo zu? Ata yi máma tugud’ei d’a tchod’a ti nde aduk ablaud’a hi Ma didinid’a. 17 Ki tchetchemba, agi tchagi gro andjofâ woi pet karop suma a zlap kandjofîna woi pet mi. 18 Wani agi aragi gro arop suma bei zlap kandjofîna hol mi agiya. 19 Agi i vagiza anguvora woi bugol kangâ gak burâ kid’iziya. Suma adigagi suma a tchi matnina d’oze a do matnina pet, a mbut tazi yed’et kur bur ma hindina ki ma kid’iziyana, agi tagid’a zlapa ki suma agi yozi magombina mi. 20 Agi mbud’ugi baruna yed’et kahle suma a lazi ki ba’îna kahle suma a lazi ki bak b’ëd’ina kahle suma a lazi kagunina pet mi.
21 Ma ngat buzuna Elazar mi de mi azigar suma a i dur ayînina ala: Wana ni gat ta Ma didina mi hat mi Moise-sa: 22 Lora, kawei ma hapma, kawei ma hleuna, kawei ma wurana, dorona ki lomba mi, 23 ahlena pet suma a ndak á yora kakud’ina, agi tchuguzi aduk akud’a á mbud’uzi yed’et. Ahlena pet suma a ndak nga á yora d’uo na, agi tchuguzi aduk mbiyo ma mbut suma yed’etna á mbud’uzi yed’et mi. 24 Kur bur ma kid’iziyana agi mbuzugi baru magina woyo, agi mba mbud’ugi yed’et. Bugola, agi ndak á tchugugi kur kangâ.
B’raud’a hahle suma a hurumuzï avun ayînina
25 Ma didina mi de mi Moise ala: 26 Ang ki ma ngat buzuna Elazar ki suma nglo suma avok ablaud’ina, agi i ndumugi ahle suma a yozï avun ayînina, suma ki d’uwarâ. 27 Ang b’rau ahle suma a yozï avun ayînina aduk azigar suma a i durîna kablaud’a pet mi.
28 Aduk ahle suma a b’rawazi mi azigarîna ang pat aduk mi anu. Suma kikis vahl, ang pat tu; d’uwarâ kikis vahl, ang pat tu, nala, aduk amuzleina, aduk korona, aduk tumiyôna, aduk b’ogeina mi. 29 Ahle suma ang pad’azi mi an ndazina, ang yozi hazi mi ma ngat buzuna Elazar.
30 Ad’uzi d’a ar mi Israel-lîd’a, suma dok vahl, ang pat tu; d’uwarâ dok vahl, ang pat tu mi anu, nala, aduk amuzleina, aduk korona, aduk tumiyôna, aduk b’ogeina, aduk d’uwar ma dingâ pet mi, ang yozi hazi mi suma hi Levi suma a tinizi á ngom zlub’ud’a hi an Ma didinid’ina.
31 Moise azi ki Elazar ma ngat buzuna a le sunda yam vun ma he ma Ma didina mi hum mi Moise-sâ. 32 Ahle suma azigarâ a yozï avun ayînina ad’uzi d’a ara ba wana:
Tumiyôna ki b’ogeina a ni 675.000,
33 amuzleina a ni 72.000,
34 korona mi ni 61.000,
35 gro arop suma a zlap nga kandjofâ d’uo na a ni 32.000 mi.
36 Ahle suma a b’rawazi mi suma a i dur ayînina ba wana:
Tumiyôna ki b’ogeina a ni 337.500. 37 Suma a pad’azi mi Ma didina a ni 675.
38 Amuzleina a ni 36.000. Suma a pad’azi mi Ma didinina a ni 72.
39 Korona mi ni 30.500. Ma a pad’am mi Ma didinina mi ni 61.
40 Suma a ni 16.000. Suma a pad’azi mi Ma didinina a ni 32.
41 Ahle suma a pad’azi mi Ma didinina, Moise mi hazi mi ma ngat buzuna Elazar d’igi Ma didina mi hum vuna na.
42 Ahle suma a b’rawazi mablaud’a hi Israel-lîd’a nabo tazi tu ki suma hi suma a i dur ayînina, azi ba wana:
43 Tumiyôna ki b’ogeina a ni 337.500,
44 amuzleina a ni 36.000,
45 korona mi ni 30.500,
46 suma a ni 16.000 mi.
47 Aduk ahle suma a b’rawazi mi Israel-lîna, suma dok vahl, Moise mi pat aduk tu; d’uwarâ dok vahl, mi pat aduk tu mi d’igi Ma didina mi hum vuna na. Mi hazi mi suma hi Levi suma a nga ngom zlub’ud’a hi Ma didinid’ina.
He d’a hawa d’a sana mi hat kur min mamba mAlonid’a
48 Suma nglo suma avok ablaud’a hi azigarîna, suma yam suma dudubuna ki suma yam suma kikisâ, a mba gen Moise, 49 a dum ala: Ami azungeî mangâ ndumumi azigar suma ad’u vun mami ma hed’ina. Sa tu adigami mi ar nga woi d’i! 50 Kayam ndata, ami mbami ki he d’a hawad’a mi Ma didina. Nge nge pî mi mba kahle suma lor suma ami fazina, nala, vayirâ, wulaka, ngangama, ngangam ma humba ki ma kela, kayambala ami zlubumi yam tcho mamid’a avok Ma didina d’a.
51 Moise azi ki ma ngat buzuna Elazar a vahle suma lora pet suma azi mbazina aboziya. 52 Ahle suma lora pet suma suma nglo suma yam azigar suma dudubuna ki suma yam suma kikisâ a mbazi mi Ma didinina, a hlazi kilona, a hle kilona go ki 170. 53 Azigar suma hawana, nge nge pî mi ngom vama mam fumî ata yima ayînina kam mamu. 54 Moise azi ki ma ngat buzuna Elazar a tchuk ahle suma lora pet suma azigar suma nglona a hazina kä kur zlub’u d’a ngaf tad’a d’igi vama ge humba na yam Israel-lâ avok Ma didina.
© Azumeina Bible © Alliance Biblique du Tchad, 1999.
