Hanun mi mbut suma sunda hi David-na zulona
(Gol 2 Sam 10.1-5)1 Bugol ahle ndazina, Nahas amulâ hi suma Amon-na mi mid’a, goroma mi vrak tamula blangâmu. 2 David mi dala: An mba ni le djivid’a ki Hanun Nahas goroma d’igi abum mi lan djivid’a na mi. David mi sun azungeî mama á b’lengêm hurum yam matna habuma.
Kid’a azungeîna hi David-na a mbaza yam ambas sa Amon-nda go ki Hanun á b’lengêm hurumba, 3 suma nglo suma Amon-na a de mi Hanun ala: Ang djib’er ala ná subur abung ba, David mi sunungî suma á b’lengêng hurung wan d’ang zu? Ná we fet azì ma ngolâ, á b’lagam mbei ba, azungeî mama a mba geveng wan nduo zu?
4 Ata yi máma Hanun mi yo azungeîna hi David-na, mi welezi dudumazi woi abo tutu, mi ngad’azi baru mazina woi ad’uzi djudjum mi. Bugola, mi yagazi akulo. 5 A mba de mi David yam vama mi le kazungeî mamina. David mi sun suma á d’uguloziya, kayam sum ndazina a mang ngei heî. Mi dazi ala: Agi kagagi sä Jeriko gak dudumagi mi se tua ba, agi mbagï avo.
David mi dur ayîna ki Amon-na ki Siri-na
(Gol 2 Sam 10.6-19)6 Kid’a Hanun ki suma Amon-na a we d’ala azi mbut tchod’a avok David’u d’a, a sun kawei ma hapma tonna dok hindi á ndeï pus ma dur ayîna teteng ki suma djang akulumeina abo suma Siri suma avo Mesopotami-na, abo suma Siri suma avo Mäka-na ki suma avo Soba-na mi. 7 Azi ndeï pus ma dur ayîna 32.000 kamul ma Mäka-na ki sum mama. A mba a ve kangâ avun azì ma Medeba-na. Suma Amon-na a buzuk kei kur aziyazi teteng, a tok tazi á i dur ayîna.
8 David mi huma, mi sun Jowap ki azigar suma gangrangâ pet atazi á durâ. 9 Suma Amon-na a buzuk kei a ndjar avun azina. Amulei suma a mbana a ndjar sä woi abagei kel vazi mi. 10 Jowap mi we d’ala ayîna mba mi dur ini navogom ki blogom mi d’a, mi man Israel suma a we durîna, mi ndjarazi ir suma Siri-na. 11 Suma a arâ mi hazi abo wiyema Abisai, mi ndjarazi ir suma Amon-na mi. 12 Mi dum ala: Le suma Siri-na ad’enga kal kanu ni, ang mbeï ndjununu; le suma Amon-na ad’enga kal kangû ni, an iza ni ndjunung mi. 13 Ang ve tang ad’enga, ei soi tei ad’enga yam sum meina, yam azì mei ma nglona hAlo meinina. Ar Ma didina mi le vama hurum vuma!
14 Jowap ki azigar mama a i avok á dur suma Siri-na; suma Siri-na a wet ringâ avoromu. 15 Kid’a suma Amon-na a we suma Siri-na a wet ringâ hina d’a, azi tazi a wet ringâ avok Abisai Jowap wiyema mi, a tchuk avo hataziya. Jowap mi hulong avo Jerusalem.
16 Kid’a suma Siri-na a we d’ala Israel-lâ a kus kaziya d’a, a ge sunda á togi suma Siri suma sä abo aluma woi hina, Sofa ma ngolâ hi azigarâ hi Hadadezer-râ ni ma nga avorozina. 17 Suma a mba de zla ndata mi David. David mi tok Israel-lâ pet, a djak alum ma Jurdê-na, a mba go ki sed’eziya, a ndjar á duruziya. David mi nde dur suma Siri suma a nga durum ayînina. Wani suma Siri-na a ring avoromu. 18 David mi tchi azigar mazi suma a nga ki pus ma dur ayînina 7000, mi tchi suma asemba 40.000, mi tchi Sofa ma ngolâ hi azigarîna mi.
19 Kid’a amulei suma ad’u Hadadezer-râ a we d’ala Israel-lâ a kus kaziya d’a, a ve banad’a ki David, a ge yazi kä ad’umu. Suma Siri-na a min á ndjun suma Amon-na kua d’uo d’a.
© Azumeina Bible © Alliance Biblique du Tchad, 1999.
