Ndumba 1 - Azumeina Bible 1999 (MPG)

ISRAEL-LÂ A NGA ABAGEI HUR FUL MA SINAI-NA

A ndum andjaf Israel-lâ

1 Kur bur ma avo’â hi til ma mbàna kur biza d’a mbà d’a bugol buzuk ka azi buzugï woi kur ambas sa Ezipte-d’id’a, Ma didina mi de zlad’a mi Moise abagei hur ful ma Sinai-na kur zlub’u d’a ngaf tad’a ala: 2 Agi ki Aron ndumugi ablaud’a hi Israel-lîd’a, agi ndumugi andjofâ ki simiyêzi gagang pet, ad’u adezezi kad’u andjavaziya. 3 Agi ndumugi andjof suma bizazi dok mbà dok mbàna d’oze kal dok mbà dok mbàna pet suma a ndak á dur ayînina. 4 Agi hlagi sama ngolâ ad’u ades ma lara pî tutu á ndjunugiya. 5 Wana ni simiyê suma agi yozina:

Ad’u andjafâ hi Ruben-na ni Elisur Sedewur goroma;

6 Ad’u andjafâ hi Simeon-na ni Selumiyel Surisadai goroma;

7 Ad’u andjafâ hi Juda-na ni Nason Aminadap goroma;

8 Ad’u andjafâ hi Isakar-râ ni Netanel Suwar goroma;

9 Ad’u andjafâ hi Zabulon-na ni Eliyap Helon goroma;

10 Ad’u andjafâ hi Efraim ma Josef goromina ni Elisama Amihut goroma;

Ad’u andjafâ hi Manase ma Josef goromina ni Gamliyel Pedasur goroma;

11 Ad’u andjafâ hi Benjamin-na ni Abidan Gidoni goroma;

12 Ad’u andjafâ hi Dan-na ni Ahiyezer Amisadai goroma;

13 Ad’u andjafâ hi Aser-râ ni Pagiyel Okran goroma;

14 Ad’u andjafâ hi Gad-na ni Eliyasaf Dewel goroma;

15 Ad’u andjafâ hi Neftali-na ni Ahira Enan goroma.

16 Suma nglo suma azi manazi ad’u adesâ hi simiyêzi aduk ablaud’a hi Israel-lîd’a ni suma nglo suma avok azigarâ hi Israel-lîna mi. 17 Moise azi ki Aron a yo suma a yazi ki simiyêzina. 18 A tok ablau suma pet kur bur ma avo’â hi til ma mbànina, a b’irizi nad’u adezezi ad’u andjavaziya, a ndumuzi simiyêzi gagang tin ad’ud’a ata suma bizazi dok mbà dok mbàna ki suma bizazi kal dok mbà dok mbàna mi. 19 Moise mi ndumuzi ni hur ful ma Sinai-na d’igi Ma didina mi hum vuna na.

20-43 Andjafâ hi Israel ma lara pî, a ndumum nad’u adezem kandjavamu. A b’ir simiyê suma bizazi dok mbà dok mbàna ki suma bizazi kal dok mbà dok mbà suma a ndak á dur ayînina gagang. A tin ad’ud’a ni yam andjafâ hi Ruben Jakob gorom ma ngolîna.

Wana nablau mazid’a:

Suma ad’u andjafâ hi Ruben-na: 46.500

Suma ad’u andjafâ hi Simeon-na: 59.300

Suma ad’u andjafâ hi Gad-na: 45.650

Suma ad’u andjafâ hi Juda-na: 74.600

Suma ad’u andjafâ hi Isakar-râ: 54.400

Suma ad’u andjafâ hi Zabulon-na: 57.400

Suma ad’u andjafâ hi Efraim ma Josef goromina: 40.500

Suma ad’u andjafâ hi Manase ma Josef goromina: 32.200

Suma ad’u andjafâ hi Benjamin-na: 35.400

Suma ad’u andjafâ hi Dan-na: 62.700

Suma ad’u andjafâ hi Aser-râ: 41.500

Suma ad’u andjafâ hi Neftali-na: 53.400

44 Wana ni suma Moise azi ki Aron ki nglo suma dogo yam mbà suma avok Israel-lâ yam andjavazi gagangâ a ndumuzina. 45 Israel-lâ pet suma a ndumuzi ad’u adezezi tin ad’ud’a ata suma bizazi dok mbà dok mbàna ki suma bizazi kal dok mbà dok mbà suma a ndak á dur ayînina, 46 azi pet ni 603.550.

Sun nda Alona mi hat mi suma hi Levi-nid’a

47 A ndum nga andjafâ hi Levi-na zlapa ki Israel suma a ndumuzina tu d’i, 48 kayam Ma didina mi de mi Moise ala: 49 Ang ndum andjafâ hi Levi-na zlapa ki Israel suma a ndumuzina tu d’i. 50 Ang hazi sunda hi zlub’u d’a vun ma djinda mi nga kuad’a aboziya, kahle mat suma sunda kahle suma kurutna pet. Azi yo zlub’ud’a kahle suma kurutna pet, azi lat sunut ni aziya, azi nguyut ki kang mazina mi. 51 Fata agi djogogi zlub’ud’id’a, ni suma hi Levi-na ba, a hôt tei ni aziya. Ata yima agi i kagagi kuana, ni suma hi Levi-na ba, a djugud’ot akulo ni azi mi. Le sama ding mi hut go ki sed’ed’u ni, agi tchum mbeyo. 52 Israel-lâ nge nge pî mi ve kang mama mi kak kuru. Nge nge pî mi kak go ki drapo mamba ad’u ades mam ma dur ayîna. 53 Wani suma hi Levi-na a ngui zlub’u d’a vun ma djinda nga kuad’a ki kang mazina kayambala hurun zal yam ablaud’a hi Israel-lîd’a d’uo d’a. Suma hi Levi-na a ngom zlub’u ndata.

54 Israel-lâ a lahlena dedege d’igi Ma didina mi he vuna mi Moise na pet mi.