1 Baläm mi we d’ala Ma didina tam mbi lum djivid’a á b’e vuna yam Israel-lâ d’a. Kayam ndata, mi i nga á djop d’igi mam i avok dei d’a hina d’uo d’a, wani mi mbut iram abo ma hur fulîna. 2 Mi hle iram akulo, mi we Israel-lâ a ve nga kang mazina ad’u andjavazi ad’u andjavaziya. Ata yi máma Muzu’â hAlonina mi kak kamu.
3 Mi de zla d’a d’ogol mamba ala:
Wana ni zlad’a hi an Baläm Beyor goromid’a,
Wana ni zlad’a hi an sama ni we woi tetetna,
4 Wana ni zlad’a hi an ma ni hum zlad’a hAlonid’ina,
hi an ma ni wahle suma Ma ad’engêm kal petna mi ndandji woi irana,
kayam mi nde tam mbei iran ata yima an nga ni kud’uroma:
5 Agi Israel-lâ, zlub’u magid’a ti ni djif heî,
agi andjafâ hi Jakob-ma, yi magi ma kaka mi ni djif heî mi.
6 Zlub’u magid’a ti ni d’igi alum ma nga mi djangâ na,
ti ni d’igi asine ma avun alumina na,
ti ni d’igi agu alowe ma Ma didina mi puma na,
ti ni d’igi agu sedre ma avun alumina na mi.
7 Zlub’u magid’a ti ni d’igi mbiyo ma mi nga kur
yam mi sulul lei ma oî ad’u ahle suma a pazinina na.
Amulâ hi Israel-lâ mba mi kus yam Agak,
leu mamba mba d’i tavok kad’enga.
8 Alona mi buzuguzï woi kur Ezipte,
mam kazi ni d’igi ad’enga havündid’a na.
A nga kizak andjaf mazi suma djangûna woyo,
a nga kuzuzi asogozi woi ndjondjom,
a nga yed’ezi ki yeû mazid’a mi.
9 A grif a bur kä d’igi azlona na
d’igi azlod’a na mi.
Ni nge ba, mba mi tcholozi akulo ge?
B’e vuna nga yam sama b’e vuna kangâ,
vun ma ged’a nga yam sama gang vunina mi.
10 Balak hurum zal ngola ata Baläm, mi tchi abomu, mi dum ala: An yangî ka hî ná ge vuna mi man suma djangûna. Gola! Ang b’e wa vuna kazi b’e b’e yang hindi! 11 Ki tchetchemba, ang ge tang i yi mangâ avo hatangû. An dang ala: An mba ni mbud’ung sama simiyêm yi heîna, wani Alona mi d’eleng ala simiyêng mi yi d’i.
Baläm mi de woi yam subura hi Israel-lîd’a
12 Baläm mi hulong de mi Balak ala: An de nga mi suma ang sunuzi sä na ala: 13 Le Balak mi hanï gong mam mba oîd’a ki bege d’a hapa ki lorid’a pî, an ndak á so vun Ma didina á le vama djivi d’oze vama tcho d’i. An mba ni de ni vama Ma didina mba mi dandjina holu d’uo zu? 14 Ki tchetchemba, an nga ni i gen sum mana. Ang mbeya, an ni dang ngei yam vama sum ndazina a mba lum ki sum mangâ kur atchogoi d’a nga d’i mbad’ina.
15 Baläm mi de zla d’a d’ogola ala:
Wana ni zlad’a hi an Baläm Beyor goromid’a,
wana ni zlad’a hi an ma ni we woi tetetna,
16 wana ni zlad’a hi an ma ni hum zlad’a hAlonid’ina,
hi an ma ni we nga hurâ hi Ma kal teglesâ,
hi an ma ni wahle suma Ma ad’engêm kal petna mi ndandji woi irana,
kayam mi nde tam mbei iran ata yima an nga ni kud’uroma:
17 An wumu, wani nga ni tchetchem mbi,
an golomu, wani mi nga go d’i.
Tchitchiud’a ti ndeï ad’u andjafâ hi Jakob-ma,
totogo d’a tamula ti ndeï aduk Israel-lâ,
ti to suma Mowap-ma fefed’eziya,
ti to suma hi Set-na pet mi.
18 Mba mi kus yam suma Edom-ma,
mba mi kus yam suma Seir sumala ni mam suma djangûna adjewe na.
Israel-lâ a mba tak ad’eng mazid’a woyo.
19 Ma mba mi ndeï ad’u andjafâ hi Jakob-mina,
mba mi te leu d’a kala,
mba mi dap suma a ar kur azì ma ngolîna woyo.
Baläm mi de woi yam b’laka hi suma djangûna hi Israel-lîna
20 Baläm mi we suma Amale’â, mi de zla d’a d’ogol mamba ala:
Suma Amale’â nandjaf ma avo’â,
wani dabid’a a mba b’lagam mbeyo.
21 Mi we suma Ken-na, mi de zla d’a d’ogol mamba ala:
Yagi ma kaka nad’enga,
aziyagi ni d’igi azì alei ma mi minim akulo yam ahinad’ina na.
22 Wani agi suma Ken-na, fata suma Asiri-na a mba yogi magombid’a,
a mba ngalagi aziyagi woyo.
23 Baläm mi de zla d’a d’ogol mamba ala:
Alë! Sama mba mi sut tei ni nge
kur bur ma Alona mba mi nde tam mbeina ge?
24 Wani batod’a mba d’i tcholï kur til la Kitim-mba,
suma kurutna a mba hulong suma Asiri-na yazi kä,
a mba hulong yam andjafâ hi Heber-râ kä mi,
wani suma kur bato ndatina a mba b’lak kei mi.
25 Bugol ahle ndazina Baläm mi tchol mi hulong avo hatamu. Balak mi ge tam mi i mi.
© Azumeina Bible © Alliance Biblique du Tchad, 1999.
