Jakob mi ring abo Laban
1 Wani Jakob mi hum zlad’a hi Laban groma d’a a nga dala: Jakob mi yo ahlena habuina pet; mi mbut sama ndjondjoîna ni kayam abuya d’a. 2 Jakob mi gol Laban mi nga d’igi azi avok dei ata tazid’a na d’i.
3 Ma didina mi de mi Jakob ala: Ang hulong yam andagad’a habuyonga, aduk simiyêngû; an mba ni kak ki sed’engû.
4 Jakob mi ge sunda, mi yï Rachel azi ki Lea abagei hur asinena, ata yima ahok mama a nga kuana. 5 Mi dazi ala: An wabugi mi nga ki sed’en d’igi avok deid’a na d’i, wani Alona habuna mi nga ki sed’enu. 6 Agi tagid’a wagiya, an le sunda mabugi ni kad’engên pet. 7 Wani abugi mi lan iranu, mi mbud’un wurak manda yam dogo, wani Alona mi aram nga á lan vama tcho d’i. 8 Ata yima mi dala: Ahok suma tazi d’udjod’a ndundub’u’â ni wurak manga na, ata yi máma aho’â pet a vut ni gro suma tazi d’udjod’a ndundub’u’â. Ata yima mi dala: Suma tazi d’udjod’a kikringâ ni wurak manga na, ata yi máma aho’â pet a vut ni suma tazi d’udjod’a kikringâ. 9 Alona mi yo d’uwarâ habugina, mi handjiya.
10 Wani ata yima aho’â a nga ful tazina, an we kur adïd’a mbekmbere ma nga yam aho’îna, tamî d’udjod’a kikring, ma hina tam d’udjod’a ndundub’uk, ma hina tam d’udjod’a tchetchef mi. 11 Malaikana hAlonina mi yan kur adïd’a ala: Jakob! An humum ala: An huma! 12 Mi dan ala: Ang hle irang akulo, ang gol mbekmbere suma d’udjo suma a nga nga yam aho’îna pet, suma tazi d’udjod’a kikringâ, suma tazi d’udjod’a ndundub’u’â ki suma tazi d’udjod’a tchetchefâ, kayam an we vama Laban mi langzina. 13 An nAlo ma ni nde tan ndei irang Betel-lâ; ni yima ang tin ahinad’a akulo kad’ut ang vot mbulâ katna, ni yima ang hlan vunang kuana. Ki tchetchemba, ang tchol akulo, ang ar andaga d’a wanda, ang hulong yam ambasa hi simiyênga.
14 Rachel azi ki Lea a hulong dum ala: B’rau mamid’a ki djo mamina ar nga avo habumi d’ei zu? 15 Mam golomi ni d’igi suma dingâ hina d’uo zu? Kayam mi guzumi woyo, mi te bege mamina mi d’uo zu? 16 D’uwar ma Alona mi yomi woi avo habumina ni mamina ki gromina; ki tchetchemba, ang lahlena pet suma Alona mi dangzina.
17 Jakob mi tchola, mi yo groma kamiyôma yam djambala, 18 mi yo d’uwar mama pet kahle mam suma mam fazina pet ki d’uwar ma mi fum Padan-Aram-ma á i avo habum Isak yam andaga d’a Kanan-nda.
19 Ata yima Laban mi i á tchau tumiyô mamina, Rachel ti kul filei mama. 20 Jakob mi le lemba mi mber gumun bei mi de Laban ma Aram-ma. 21 Mi i kahle mama pet, mi i mi djak alum ma Efrat-na, mi i iram yam ahuniyô suma Galät-na.
Laban mi hal ad’u Jakob
22 Kur bur ma hindina sana mi de mi Laban ala: Jakob mi ringâ wa. 23 Laban mi yo b’oziyoma ad’umu, mi halam ad’um gak burâ kid’iziya, mi i fum sä yam ahuniyô suma Galät-na. 24 Alona mi mba ata Laban ma Aram-ma andjege, mi dum adïd’a ala: Ang gol tang djivi á de vama djivi d’oze vama tcho mi Jakob.
25 Laban mi fe Jakob mi ve wa zlub’u mamba yam ahinad’a. Laban azi ki b’oziyoma a ve zlub’u mazid’a yam ahina d’a Galät-ta mi. 26 Laban mi de mi Jakob ala: Ang le ni me hina ge? Ni kayam me ba, ang lan lemba, ang yoï grona d’igi ang yozi navun ayî ma durâ na ge? 27 Ni kayam me ba, ang lan lemba, ang ringî gumun bei dan nge? Le ni djivid’a ni, an tiningî ki furîd’a ki sawala ki daliyâd’a kadingâ mi d’uo zu? 28 Ang aran nga á ge grona ki gron ngolona depa d’i. Ang le hini sun nda lilid’a. 29 An ndak á lagi va, wani Alona habungâ mi dan kama andjege ala: Ang gol tang djiviya, ang de vama djivi d’oze vama tcho mi Jakob pi. 30 Ki tchetchemba, ang iya kayam hurung vazina habungâ, wani ni kayam me ba, ang kulï filei mana ge?
31 Jakob mi de mi Laban ala: An le mandarâ. An djib’er ala le an dangû ni, ang mba yo grongâ kä woi ad’un kla ge. 32 Sama ang fe filei mangâ avo hatama, mi ndak á tchid’a. Avok b’oziyoina va mang ma ang fum avo hatana, ang hlumu. Jakob mi we nga d’ala Rachel ti kulumîya d’a d’i.
33 Laban mi kal kur zlub’ud’a hi Jakob-pa, mi kal kur ra hi Lea-d’a, mi kal kur ra hi yugunei suma mbànid’a, mi fe nga va d’i. Mi nde woi kur zlub’ud’a hi Lea-d’a, mi kal kur ra hi Rachel-la. 34 Wani Rachel ti hle filei máma, ti kalam kä ad’u ahle suma huyok djambalina, ti kak kamu. Laban mi hal kur zlub’ud’a pet, mi fe nga va d’i.
35 Rachel ti de mabut ala: Iba, ar hurung zal kan ndi, an ndak á tchol akulo avorong ngi, kayam tan tcho. Mam hala, mi fe nga filei mama d’i.
36 Jakob mi mbut ayîna, nga mi yal Laban, mi dum ala: Vama tcho ma an langzina ni me ge? Tcho man nda an lata ni lara ba, ang halan ad’un hina fufut ke? 37 Ang hal aduk ahligiyen pet, ang fe va mang avo hatan tu zu? Ang mba mi kä avok b’oziyona ki b’oziyongâ; azi kei ir zla ndata aduk teya.
38 An le bizad’a dok mbà ki sed’engû, timi mang ngoze b’e mang hurut nde nga woi d’i. An mut nga gamlâ mang tu d’i, 39 an mba nga ki har ahu ma amburâ vuma d’i, an ve tan ad’enga kuru; ahu ma a kulum falei d’oze andjegena, ang nga djobon kamu. 40 Afata nga d’i ngalan faleya, andjege ab’lenga nga d’i lanu; an nga ni bur sen ndi. 41 An le bizad’a avo hatangî dok mbà, an lang sunda bizad’a dogo yam fid’i yam grong suma mbàna, bizad’a karagaya yam d’uwar mangâ, wani ang mbud’un wurak manda yang dodogo. 42 Ladjï Alona habuna Alona habun ngolo Abraham ma abun Isak lum mandarama mi nga ki sed’en nduo ni, ang aran an i nabon hawa. Wani Alona mi wan ndak manda ki sun nda an lat kabonda, mi kan sariya manda kama andjege.
Jakob ki Laban a djin vunaziya
43 Laban mi hulong de mi Jakob ala: Gro aropma wana ni gron ana, gro andjofâ wana ni gron ana, tumiyôna wana ni tumiyô mana, ahlena pet suma ang nga wazi wana ni mana. An le ni me ini yam gron suma aropma ki grozi suma azi vud’uzina ge? 44 Ki tchetchemba, ang mbeya, ei djini vuneya, kayam vun ma djin máma mi arî vama glangâsâ aduk teya.
45 Jakob mi hlahinad’a, mi tcholot akulo kad’ud’u. 46 Jakob mi de mi b’oziyoma ala: Agi i yogï ahinad’a. Azi i yod’ïya, a molot yam tad’u, a te tena kad’u. 47 Laban mi yat ala Jegar-Sahaduta ; Jakob mi yat ala Galet .
48 Laban mi dala: Ahina d’a mol la wanda ni vama glangâsâ ini adigeya. Kayam ndata, Jakob mi yat ala Galet. 49 A yat kua ala Mispa , kayam Laban mi dala: Ar Ma didina mi wadigeya, ata yima ei wal leina, ei ndak á wei tei bugol luo d’a. 50 Le ang tchol wa á le gron suma aropma ndaka, le ang vik arop suma dingâ kazi kua ni, ang we sama adigeina ni sa d’i, nAlona tamba ba, ni glangâs ma adigeina.
51 Laban mi de mi Jakob ala: Ang gol ahina d’a mol la an molot adigei wanda, ang gol ahina d’a an tinit kad’ut akulo á ge humbid’a. 52 Azi ni vama glangâsâ ala: An mba ni tchila yam mol ndata á iza atang á lang vama tcho d’i; ang tang ndak á tchila mba atan á lan vama tcho d’uo mi. 53 Alona hi Abraham-ma, Alona hi Nahor-râ, Alona habuyozina, mi kei sariyad’a adigeya. Jakob mi gun tam ki simiyê Alo ma abum Isak nga mi lum mandarama. 54 Jakob mi ngat aho’â buzuna yam ahina ndata, mi yi b’oziyoma á te tena. Kayam ndata, azi a te, a bur yam ahina ndata mi. 55 Laban mi tchol akulo ki yorogo tcholola, mi ge grom ngolona ki groma depa, mi b’e vunam kaziya, mi hulong avo hatamu.
© Azumeina Bible © Alliance Biblique du Tchad, 1999.
