Nehemi mi djop ala mi hulong Jerusalem
1 Kur til ma Nisan-na kur biza d’a dok mbà d’a amulâ Artazerses nga mi tamulid’a, süm guguzlud’a nga tinda avoromu. An hlum ni humziya, wani an hum nga süm guguzlud’a ki hineî ta d’a hina d’a yan tu d’i.
2 Amulâ mi dan ala: Ni kayam me ba, ang hineî tang hina ge? Ang nga tugud’ei d’uo ko mi na; ni zla me tang hurung nge?
Ata yi máma an mbut mandarâ ngola. 3 An hulong de mamulâ ala: Amulâ, ar va mi lang ngi! An hineî tan nduo ni nana ge? An hum ala azì ma ngol ma asud’a hi simiyênda nga kuana mi b’lak wa woyo, vunam mi ngal lei mi.
4 Amulâ mi djobon ala: Ang min ni me ge?
An tchen Alona kurun krovo, 5 an hulong de mamulâ ala: Le ang mina, le an nazong ma djivina irang ko ni, ang sunun Juda kur azì ma a tos simiyên kuana, kayam an hulong ni minim akulo.
6 Ata yi máma amam mba amula ti nga kaka gevem mi. Mi djobon ala: I manga le ni burâ ga ge? Ni mindja ba, ang mba hulongî ge? Amulâ tam lum djivid’a, mi aran lovota á id’a; an ngam bur ma an mba ni hulongî kuana mi.
7 Bugola, an de mamulâ ala: Le ang mina ni, ang han mbaktumba abon yam suma te yam suma sä kaka yam andaga d’a sä abo alum ma Efrat-na woi hid’a, kayam a aran lovota an kal i Juda. 8 Ang han mbaktum mba dinga abon mi Asaf ma ngol ma te yam agunina, kayam mi han aguna á le ki vun azì ma ndjol ma nga go ki gong nga kud’ora hAlonid’ina, ki gulumuna hazina ki gulumuna hazì ma ngol ma an i ni kak kuana.
Amulâ mi han lovota kayam Alo man ma djivina iram nga tinda kanu. 9 Amulâ mi tchuk azigar suma nglona ki suma djang akulumeina ki sed’enu. An mbaza gen suma te yam suma sä kaka yam andaga d’a sä abo alum ma Efrat-na woi hid’a, an hazi mbaktum mba tetenga hamulîd’a.
10 Kid’a Sanbalat ma Horon-na ki ndram ma sunda Tobiya ma Amon-na a hum zla ndatid’a, huruzi zal ngola, kayam an mba á hal djivid’a hi Israel-lîd’a.
NEHEMI MI MIN GULUMUN MA JERUSALEM-MA AKULO
Nehemi mi i mi gol gulumuna andjege
11 An mbaza Jerusalem, an le burâ hindi. 12 Bugola, an tchol andjege ki suma dingâ ad’un tcha, bei an de zla d’a Alo mana mi tinindji kurun á lat yam Jerusalem-mba mi sa ba, an i nga ki vama ding ngi, ni koro ma an nga kama hol. 13 An tchol kandjege dangâla ni nde woi avun agrek ma i kur horina, an nga iran yam mbiyo ma laud’a hi dragona ki vun agrek ma tchuk siligitna kuana, an gol gulumuna hi Jerusalem-ma ki hod’ol mam mba tcho woi hohotota ki vunam ma ngal leina mi. 14 An i iran avogo, an mba go ki vun agre’â hi mbiyo ma laud’a go kapod’a hamulîd’a, wani yina nga d’ala an kal ki koro ma an nga kama d’i. 15 Kur andjege ndata an i djak hora, an gol gulumuna, an hulongî ki lovot ta avun agrek ma avun horina. Ni hina ba, an hulong kä avo.
16 Suma avok suma a we nga yima an i kuana d’oze vama an luma d’i, kayam an de nga Juif foze suma ngat buzuna d’oze suma nglona ki suma avok suma d’oze mi sama sun tu biya d’i. 17 Ata yi máma an dazi ala: Agi wagi hohou d’a ei nga kurut wanda. Jerusalem ti b’lak wa woyo, vun agrek matna mi ngal wa woi mi. Agi mbeyegiya, ei minïgi gulumun matna akulo, ar zulona mi lei d’uo d’a. 18 An vazi ad’ud’a ala ni nana ba, Alo man ma djivina iram nga tinda kan nge? An dazi zla d’a amulâ mi dandjid’a mi.
Azi dan ala: Ei tcholeya, ei minïziya. A ve tazi ad’enga kur zla d’a djivi d’a azi nga huruzi kat ndata mi.
19 Wani ata yima Sanbalat ma Horon-na ki ndram ma sunda Tobiya ma Amon-na ki Gesem ma Arap-ma a hum hina na, a nde lazamiya, a golomi is, a dami ala: Agi lagi ni me hina ge? Agi tchologi ni huneîd’a kamulâ zu?
20 An hulong dazi ala: Alo ma akulona mba mi hami ad’enga á imi avogovogo. Ami azungeî mama, ami mba tcholomiya, ami mba minid’u. Wani agi b’rau magid’a nga ki ami d’uo mi na, va ndologi nga ki ami d’uo mi na, djib’er magid’a nga yam Jerusalem mbuo mi.
© Azumeina Bible © Alliance Biblique du Tchad, 1999.
