Alona mi dei zlad’a navun Goroma
1 Adjeu Alona mi de zlad’a yam ablaud’a mabuyoi ngolo ki lovod’ot teteng navun mam suma djok vuna. 2 Wani kur atchogoi d’a dabi d’a tchetchem wanda, mi dei zlad’a navun Goroma, ni Ma mi tinim yam ahlena petna, mi landagad’a ni ki mam mi. 3 Mam mi Ma tak b’o d’a subura hAlonid’a woina, ni Ma dedege d’igi Alona na na, ni Ma nga mi gang ahlena akulo ki zla d’a de d’a ad’eng nga avunambina. Ata yima mi mbus tchod’a hi suma woi mbusâ, mi i kak sä akulo ata bik ka ndjufa hAlo ma ad’eng ma kal papana.
Alona Goroma ni ma kal malaikana petna
4 Kayam ndata, mi mbut ma kal malaikana, kayam Alona mi hum simi ma ngol ma kalazi petna. 5 Ni malaika ma lara ba, Alona mi dum yam tu ala:
Angî Gorona,
an vud’ung ini ge?
Mi de nga mi malaikana ala:
An mba ni ka’î Abumu,
mam mba mi ka’î Gorona d’i?
6 Wani kid’a Alona mi sun ni Gorom ma a vud’um avok ahlena petna yam andagad’a kuad’a, mi dala:
Ar malaika mama pet a kud’uromu.
7 Wani Alona mi de yam malaikana ala:
Mam mbud’uzi simetna,
mi mbut suma lum sundina sin akud’a mi.
8 Wani Alona mi de yam Goroma ala:
Ang Alona, zlam mang nga amula ni d’a gak didinda.
Ang nga te leu manga ni ki d’ingêra.
9 Ang min ni d’ingêra, ang noî asa’ata.
Ni kayam ndata ba, Alona, Alo mangâ mi manangû,
mi vong mbul ma furîd’a kangû,
mi hang yima hud’a kal ndrongâ mi.
10 Alona mi de kua ala:
Ang Sala suma, kad’u tinda dei ang läd’u andagad’a;
akulod’a ni sun nda ang lat kabonga.
11 Azi mba b’lak kei pet, wani ang mba ar kaka.
Azi mba mbut adjeud’a d’igi barud’a na.
12 Ang mba d’ud’uzi d’igi baru d’a ngola na,
ang mba mbud’uzi d’igi barud’a na.
Wani ang nga mbut ti, bizang mba d’i dap puo mi.
13 Alona mi de nga mi malaika mam tu ala:
Ang kak ata bigan nda ndjufa,
gak an mba ni mbut mang suma djangûna vama tin asengâ d’i.
14 Malaikana pet ni muzuk ma le sunda mAlona, azi ni suma Alona mi sunuzi á ndjun suma a mba fe sutina d’uo zu?
© Azumeina Bible © Alliance Biblique du Tchad, 1999.
