David mi tchen Alona mi kam sariya mamba
1 Ni sawal la yor ta d’a David mi hlat avok Ma didina yam Kus ma Benjamin-nid’a.
2 Ma didina, Alo mana, an nga ni hal yima ngeid’a natangû,
ang sud’un ndei abo suma pet
suma a nga djobon vunana,
ang prud’un ndeyo.
3 Le d’uo ni, azi mba kizagan ndei
d’igi azlona nga mi kizak sama mi vum
ma sama sud’um mbei abom nga d’uo na na.
4 Ma didina Alo mana, le an le vama wana,
nala, le an mbut ir sana,
5 le an hulong tchod’a mi sama nga kaka ki sed’en halasâ,
le an hurum man ma djangûna bei lovod’od’u ni,
6 ar man ma djangûna mi digin mi vanu,
mi mired’en kä andaga,
mi b’lagan subur manda woyo.
Tchol ndjö7 Ma didina, ang tchol akulo kayî mangâ,
ang tchol akulo d’el ayîna hi man suma djangûnina.
Ang kak ndjola kanu,
kayam angî ma tin sariya d’a d’ingêrina.
8 Ar andjaf suma pet a tok nguyungû,
ar ang kak yam zlam mang nga amula,
ang te kazi akulo.
9 Ma didina, ang ka sariyad’a yam andjaf suma;
Ma didina, ang le glangâsâ yam d’ingêr manda,
yam vama abon dom nga d’uo na mi.
10 Ang b’lak sunda hi suma asa’atnid’a woyo,
ang sira suma d’ingêrâ ngingring,
kayam angî Alo ma d’ingêr
ma fek hur suma ki djib’er mazid’ina.
11 Alona ni mbarei man nda ngomonda,
ni ma sut suma a humum vunama.
12 Alona ni ma d’ingêr ma ka sariyad’a,
ni ma hurum nga zal burâ kaf yam suma asa’atnina.
13 Le sama asa’atna mbut nga hurum mbuo ni,
Alona nga mi gur sï mbigeu mam mba fiyaka,
nga mi ndir yeû mamba ata aguwat á yed’emu.
14 Alona nga mi tok ahle suma dur ayî
suma tchi matna yam ma asa’at máma;
nga mi yed’em yeû mam mba akud’a.
15 Gola! Sama asa’atna nga mi min tam á le tchod’a,
nga mi nga hurum á le tchod’a,
nga mi nde ki zla d’a kad’a abua.
16 Mi djugot zula kä yiyik,
wani mi nde kur zul la mam tam mi djugud’ot kabomba.
17 Sun mam mba nga ata yat tuo d’a hulong kamu;
murud’um mamba ti hulong madumram mi.
18 An mba ni gile Ma didina yam d’ingêr mamba,
an mba ni hle sawala
ki simiyê Ma didin ma sä akulo ma kal teglesâ.
© Azumeina Bible © Alliance Biblique du Tchad, 1999.
