Sut ta dabi mata nga d’uo d’a
1 Ma didina mi dala:
Agi suma nga tid’igi bugol d’ingêrina, agi humundiya!
Agi suma nga halan an Ma didinina,
agi mbud’ugi iragi gologi ahina d’a a buzugugi kuad’a,
ki zul ahina d’a a buzugugi kuad’a.
2 Agi gologi abugi ngolo Abraham
azi ki Sara d’a vud’ugid’a.
Ata yima mam mi vam tuna, an yumu,
an b’e vunan kamu, an zulum andjavam mi.
3 Ma didina mi we hohowa Siyon,
mi we hohowa yi mat ma b’lak keina,
mba mi min asine ma djivi ma kalâ
ata yi mat ma mi mbut d’igi fulâ na na,
mba mi min asine ma d’igi Eden na na
ata yi mat ma so ma gangras máma.
Ni kua ba, a mba hum del la sor ra furî d’a kal lei nded’a
ki sawal la giled’a ki del la hle sawala mi.
4 Ma didina mi dala:
Sum mana, agi humugi djiviya.
Agi andjaf mana, agi tinigi humagiya.
Ni an ba, nga ni de gata;
sariya d’a an nga ni kata mba d’i mbut ni b’od’a hi sumid’a.
5 D’ingêr manda ti mba go,
sut manda nga d’i nde woyo.
An mba ni ka sariyad’a kad’eng manda.
Suma a nga kaka yam tilina a mba tin huruzi kanu,
a mba deng tazi yam ad’eng manda mi.
6 Agi hlagi iragi akulo.
Bugola, agi gologi iragi kä yam andagad’a.
Kayam akulod’a mba d’i val lei
d’igi andosâ mi val lei na,
andagad’a mba d’i wak kei
d’igi baru ma tumusa na,
suma a nga kaka katna a mba bo woi
d’igi arona mi bo woi na,
wani sut manda mba d’i kak didin,
d’ingêr manda mba d’i dap pei d’uo mi.
7 Agi suma wagi d’ingêrina, agi humunu.
Agi suma gat manda nga kurugina,
ar agi lagi mandarâ abo kraka hi sumid’a d’i,
agi zlagagi abo ngul mazid’a d’uo mi.
8 Ndjuvulâ mba mi tazi hliwizi
d’igi mi te baruna na,
mba mi tazi hliwizi
d’igi mi te tumus tumiyôna na mi,
wani d’ingêr manda mba d’i kak didin,
sut manda mba d’i i avogovok
kur atchogoid’a katchogoid’a.
Ma didina, ang zlit akulo!
9 Ma didina, ang zlit akulo atogo zak kad’eng manga,
ang zlit akulo d’igi ang zlit adjeu
kur atchogoi d’a kal lei dedeid’a na.
Ni ang ba, tchi ambur ma Ezipte-na,
ang tchok ambur ma a yum ala Dragon
ma kur alum ma ngolîna mbilâ mi d’uo zu?
10 Ni ang ba, so alum ma ngolâ
ki mbiyo ma ngol ma d’id’ilima d’uo zu?
Ni ang ba, ge lovota kur galileina halum ma ngolîna
yam suma ang wurak kazina á djak ki woi d’uo zu?
11 Ni hina ba, suma Ma didina mi prud’uzi woina,
a mba hulongîya,
a mba mba kur Siyon ki sawal la bangâna.
Furî d’a didinda mba d’i mbut navaval la kazid’a,
a mba le hur ma hapma ki furîd’a.
Hur ma wurana ki zam tad’a a mba kal lei mi.
Agi lagi ni mandara nge ge?
12 Ma didina mi dala:
Ni an ba ni b’lengêgi hurugiya.
Angî nge ba, le mandara sama mba mi mitna
d’oze sana gorom ma d’igi asuna na na ge?
13 Ang mar kan an Ma didin ma ni lang
ma ni b’eng akulod’a woi ni gäd’u andagad’ina.
Burâ pet ang nga zlak ki mandarâ avok ma djop vun suma
ata yima mam nga go á b’lagang ngeina.
Wani mandar mama mi ar nga ni lara ge?
14 Ar hina nde, ma nga djinda kä kur dangeinina,
a mba gum akulo;
mba mi mit kur gong nga nduvunda dangeina d’i,
tena mba mi kid’agam mbuo mi.
15 An ni Ma didina Alo mang
ma nga ni hlalum ma ngolâ akulo
ma nga ni labil mamina.
Simiyên ala Ma didin ma ad’engên kal petna.
16 An ni ma ni b’eng akulod’a woina,
an ni ma ni gäd’u andagad’ina,
an ni ma ni de mi suma Siyon-na ala:
Agi ni sum mana na,
an nga ni tining zla manda avunangû,
an nga ni dugung kä kanguza abonu.
Ndak Jerusalem, ndak zlit akulo
17 Ndak Jerusalem,
ndak ka Ma didina mi hak kop ma ayî mama
ndak tchum mbei ki hargak mamba pet
mi vid’ik yak kei
d’igi süm ma ayîna nga mi vit yam suma woi na d’a,
ndak zlit akulo, ndak zlit akulo,
ndak tchol akulo.
18 Aduk grok suma ndak vud’uzina,
ma mi tagak lovotina nga tu d’i;
aduk grok suma ndak wuluzina pet,
ma ndjunu’â nga tu d’uo mi.
19 Ahle suma a nga mba kak kakap ndazina,
nala, hurumba ki b’laka,
baktarad’a kayî ma durâ,
ni nge mba mi yorok kazi ge?
Ni nge ba, mba mi b’lengêk huruk ke?
20 Gro’â a nga seîd’a kä ir palum mba lara ge pet,
a nga hle tazi hina b’enek kuo
d’igi alafâ mi ve ki abeid’a na,
abo ayîna hi Ma didinina,
abo ngopa hAlo ma’îd’a.
21 Ndak Jerusalem mba hohoud’a,
ndak ka gurut nga ni ki süm guguzlud’a d’uo d’a,
ndak huma.
22 Gola! Salad’a Ma didina
Alo mak ma nga mi ndjun yam sum mamina, mi dala:
Gola! An nga ni hle kop ma süm ma mi vid’ik yak keina woi abogu.
Ndak dok tche ayî man ma kur kopmina bugol luo d’a.
23 An mba ni hum mbei abo suma a lak ndakina,
suma a dak ala: Ndak klup huruk kä,
ami tchilami kagu na.
Ata yi máma ndak mbut huyogok ni d’igi andagad’a na,
d’oze d’igi ir palumba na á tit kagu.
© Azumeina Bible © Alliance Biblique du Tchad, 1999.
