Ang gol tang djivi katcha d’a gaulangâ
1 Gorona, ang hum zla man nda ned’a djiviya, ang tin humang hum wäd’u manda, 2 kayam ang kak ki djib’er ra djivid’a, ang ar vunang ngom wed’a mi. 3 Atcha d’a gaulangâ vunat madjib’eta d’igi mbul ayuma na, zla mat ta ded’a ti tugung tang kal mbulâ. 4 Wani dabid’a ti naglara d’igi bid’era na, ti te ni d’igi mbigeu d’a fiyak ka siyat mbàd’a na. 5 Aset mi i ni yima matna, aset ma tita mi i ni kä azulei mbeî. 6 Ti nga d’i djib’er yam lovot ta i kur arid’id’a d’i, ti ka vita ni bei ti we ba. 7 Gorona, ki tchetchemba, ang hum zla manda, ang wal lei ki zla d’a an nga ni dangzid’a d’i. 8 Ang d’es sei kur lovot mata, ang tchila avun aziyat 9 tala ang he ngol manga mi suma ding nguo ang ar sama murud’umba mi bang ari manga woi d’uo mi d’a; 10 tala suma dingâ a hop kahle mangâ d’uo ar sama ding mi tang zumal manga d’uo mi d’a; 11 tala ang zam tang ata dabi manga ata yima hliwing ki tang a it kongîyong nguo d’a. 12 Ang mba dala: Hiye! An le ni nana ba, an noî hata ge? An le ni nana ba, an gol ngopa is ke? 13 An le ni nana ba, an hum vun suliyona d’uo ge? An le ni nana ba, an tin human á hum suma a had’ana d’uo ge? 14 Ar hina nde, an nde kur ndak ka ngola aduk toka hablaud’id’a.
Ang le yam amang nga azonga
15 Ang tche ni mbiyo ma kur dei mangina, ang tche ni mbiyo ma lau kur golong mangina. 16 Ar mbiyo matna mi djang ngei ir palumba, mi b’rau woi ata yima suma a tok kuana d’i. 17 Ti arî kang ang tu, ar ang zlap kat ki suma ding ngi. 18 Ar golong manga ti ka’î d’a a b’e vuna kata, ar ang le furîd’a kamang nga azonga burâ ki burâ. 19 Amang nga djif matna d’igi pandrid’a na d’a, d’igi duk ka valaud’a na d’a, ar djif matna mi lang tang djivid’a burâ ki burâ, ar ang le kat burâ ki burâ mi. 20 Gorona, ni kayam me ba, ang le d’od’oka yam atcha d’a gaulangâ ge? Ni kayam me ba, ang lam apo atcha d’a dinga ge? 21 Kayam Ma didina iram nga tinda yam tita hi sumid’a pet, nga mi gol sun mazid’a pet mi. 22 Sama asa’atna nga mi ve ki tcho mam mba mi lata, ziyo matna nga mi vum mi. 23 Mba mi mit ni yam bei hum hat mamba. Lili mam mba kal kamba mba d’i bam mbei mi.
© Azumeina Bible © Alliance Biblique du Tchad, 1999.
