Ned’a nga d’i yi suma
1 Ned’a ti pagu ma murgulina akulo kid’iziya, ti min aziyad’u. 2 Ti ngat ahlena, ti gizeî süm guguzlud’a, ti min te matna. 3 Ti sun yugunei matna, nga d’i yi suma akulo yam yima nding ma hur azì ma ngolîna ala: 4 Agi suma bei wäd’u zlad’a ba na, agi mbeyegï ka hî!
Ti de mi suma lilid’a ala: 5 Agi mbeyegïya, agi tagi te mana, agi tchagi süm guguzlu d’a an gizeyêta. 6 Agi noyôgi bei wad’ud’a woyo. Hina wani, agi mba kagagi karid’a. Ar agi tid’igi kur lovot ta wad’ud’a.
Sama ned’a ki sama subur tam
7 Sama mi ngop sama las sumina, mi mba ni ki gol la isa kamu; sama mi ngop sama asa’atnina mi mba ni ki ngula kam mi. 8 Ang ngop sama las suma tala mi noyông nguo d’a; ang ngop sama ned’a, mam mba mi le kangû. 9 Ang hat sama ned’a, mba mi mbut sama ned’a kala; ang hat wed’a mi sama d’ingêrâ, mba mi i avogovok kur we mamba. 10 Le mandara Ma didina nad’u tinda hi ned’id’a, we Ma bei tchod’a ba na ni wad’ud’a mi. 11 Ni kayam an ned’a ba, burung mba mi i avogovogo, bizang mba d’i i avogovok mi. 12 Le ang mbut sama ned’a ni, ni djivid’a kayam ang tanga, wani le ang mbut sama las suma ni, ang mba hlanek ndata kangî ang tanga.
Atcha d’a lilid’a nga d’i yi suma
13 Atcha d’a lilid’a natcha d’a zlad’a ndavunat ta yat nga d’uo d’a, ti we nga va tu d’uo mi. 14 Ti nga kak kä avun aziyat yam zlamba yam yima nding ma hur azì ma ngolâ 15 á yi suma a nga kal i irazi avo’â ala: 16 Ar sama lara ma bei wäd’u zlad’a ba na mi mbeï ka hî. Nga d’i de mi ma lilid’a ala: 17 Mbiyo ma kula madjib’eta heî, te ma gumuna mayulumba heî mi. 18 Mi we nga d’ala yi máma ni yima matna d’a d’i, mi we nga d’ala suma ti yazina a nga ni kur yima azuleina d’a d’uo mi.
© Azumeina Bible © Alliance Biblique du Tchad, 1999.
