Malaikana azi ki tugud’ei d’a tcho d’a dananda
1 An we vama simat ma ding ma ngol ma atchapma sä akulo. Malaikana kid’iziya a nga ki tugud’ei d’a tchod’a kid’iziya aboziya. Ni tugud’ei d’a tcho d’a danan nda dap vun ayîna hAlonid’a.
2 An we vana d’igi alum ma ngol ma ngal tchitchilingâ na, gizeîd’a kakud’a. An we suma a kus ayîna yam ambur máma, yam vama a yorom d’igi mam na na yam nomrod’a hi simiyêmbina mi. Azi nga tchola avun alum ma ngol ma ngal tchitchiling máma. Ading ma Alona mi hazizina mi nga abozi mi. 3 Azi nga hle sawala hi Moise azongâ hAlonid’a ki sawala hi Gor timinid’a ala:
Salad’a Alo ma ad’engêm kal petna,
sun manga ni sun nda ngol la kal papad’a.
Amulâ handjaf sumina,
nga hur mangâ ni d’ingêr gagazi.
4 Salamina, ni nge ba, mba mi lang mandarang nguo ge?
Ni nge ba, mba mi suburung nguo ge?
Kayam ang tu ni Ma bei tchod’a ba na.
Andjaf suma pet a mba mba,
a mba grif kä avorong á kud’urongû,
kayam sun mang nga d’ingêra, ti nde wa woi abua.
5 Bugol ahle ndazina, an we vun gong nga kud’ora hAlona d’a akulod’a ti mal leyo, zlub’u d’a glangâsa hAlonid’a ti nga kua. 6 Malaika suma kid’iziya suma a nga ki tugud’ei d’a tcho d’a kid’iziyad’a abozina, a buzuk kei kur gong nga kud’ora hAlonid’a ki baru d’a hap pa ngal wiwilika ataziya, d’ik ma lora mi nga djinda kuruzi mi. 7 Ma dingâ tu aduk ahle suma ari suma fid’ina, mi he malaika suma kid’iziya ndazina kop ma kid’iziya ma lor ma nga oîd’a kayîna hAlo ma ari ma gak didinina. 8 Andosâ nga oîd’a kur gong nga kud’ora hAlonid’a ki subura kad’enga hAlonid’a. Sana mi ndak á kal kur gong ndata d’i, gak tugud’ei d’a tcho d’a kid’iziya d’a malaikana vat abozid’a ti dap tua.
© Azumeina Bible © Alliance Biblique du Tchad, 1999.
