Kak ka halas sa ata yat tuo d’a
1 Ni zla d’a hohoud’a
yam agi suma nga kaka halas
kur Siyon-na,
yam agi suma nga kaka tchugot
yam ahina d’a Samari-d’ina mi.
Agi ni suma avok andjaf suma
ma Israel-lâ a nga i gevem á hal ndjundina!
2 Agi igi Kalne, agi gologiya.
Ata yi máma agi igi Hamat ta ngola,
agi kalagi igi Gat ta Filistê-d’a.
Azi nga i avogovok kal leu magid’a djak su?
D’oze andaga mazid’a ti bubud’a kal magid’a zu?
3 Agi djib’eregi ala agi walagi
wa woi dei ki bur ma ndaka,
wani agi hud’ugi ni murud’umba á te kagagiya.
4 Agi nga burugi kä
yam azang ma a d’udjom ki sï ahlo’îna,
agi mad’agi tagi kä woi yam tapi magina,
agi nga mud’ugi gro tumiyô suma kur kangânina
ki gro amuzlei suma d’orâ mi.
5 Agi nga hlagi sawal la hawa yaka kadingâ,
agi nga minigi ahle suma bud’a
yam tagi d’igi David na.
6 Agi nga tchagi süm guguzlud’a ki kop ma nglona,
agi nga lagi mbul ma d’igil ma hirwilingâ atagiya,
wani agi nga had’agi hurugi
yam b’lak ka ti mba yam andjafâ hi Josef-fîd’a d’i!
7 Ni kayam ndata ba,
a mba igi magomba avok suma a mba yozi magombina,
furî d’a agi nga lat yam hliu tad’id’a
mba d’i dap pei mi.
B’laka hi suma Samari-nid’a
8 Salad’a Ma didina mi gun tam ki mam tamba ala:
An Ma didina Alo ma ad’engên kal petna,
an gol subur tad’a hi suma hi Jakob-mid’a
ni vama ndjendjed’a,
an noî azì mazi ma amula woi mi.
Kayam ndata, an mba ni hazì mam ma ngolâ
abo mazi suma djangûna kahle suma kuruma pet mi.
9 Le suma a ar kur azì ma tuna dogo ni, a mba bo woyo. 10 Ata yi máma sama suma ma mi kal avo á yozi mad’a suma woi kur azinina, le mi fe sama ar nga krovo kur gongina ni, sa máma mba mi djobom ala: Sama ding nga ki sed’eng zu? Mba mi hulong dum ala: Hawa! Sa nga d’i. Sama dingâ mba mi hulong humba ala: Ba! Nga ni yima a yi simiyê Ma didinina d’i!
11 Ata yima Ma didina mi he vunina,
gong nga ngola mba d’i dris kä ti b’lak keyo,
gong nga gora mba d’i to woi mi.
Subur ta d’a hawa yaka
12 Akulumeina a ndak á djang akulo yam ahinad’a zu?
Suma a ndak á zum akulo yam ahinad’a kamuzleina zu?
Ni kayam me ba, agi mbud’ugi zla d’a irata
d’igi kuma ma tchi matna na,
agi mbud’ugi d’ingêra
d’igi vama aglarâ na mi ge?
13 Agi nga lagi furîd’a yam ahle suma hawa ya’â, agi nga dagi ala: Ni kad’eng mamid’a ba, ami fami kad’enga yam ndrata kua wan nduo zu? 14 Agi Israel-lâ, gola! An mba ni tchol kandjaf ma dingâ á durugiya. Mba mi lagi ndaka, mba mi tinï ad’ud’a avun azì ma Hamat-na dei gak mba kur toliyon nda Araba-d’a.
© Azumeina Bible © Alliance Biblique du Tchad, 1999.
