SAMUEL AZI KI DAVID
Alona mi tin David amul ma awilina
1 Ma didina mi de mi Samuel ala: Ni mindja ba, ang mba ar bei tchi yam Saul ma an pad’am mbei ala mi kak amul ma Israel-lâ d’uo na ge? Ang hle gugur mang nga mbulâ abongû, ang tchola; an nga ni sunung avo hi Jesse ma Betelehem-ma, kayam an fe nga amul ma nde irana aduk groma.
2 Wani Samuel mi hulong dum ala: An mba ni i ni nana ge? Le Saul mi huma ni, mba mi tchanu.
Ma didina mi dum kua ala: Ang vamuhl hla weid’a ad’ungû, ang dala ang i han ni he d’a hawa d’a ngat buzuna. 3 Ang yi Jesse ata yima ngat buzu máma; an mba ni tagang vama ang luma. Ang mba vo mbulâ yam ma an mba ni dang kam á tinim amulina.
4 Samuel mi le d’igi Ma didina mi dum na. Kid’a mi i Betelehem-mba, suma nglo suma kur azinina a d’ugulomu, a nga ki mandarâ, a djobom ala: Ang mba ni hawa ko zu?
5 Mi hulong dazi ala: Â, an mba ná he he d’a hawa d’a ngat buzuna mi Ma didina. Agi mbud’ugi tagi yed’et yam he d’a hawa d’a ngat buzu ndata, agi mbeyegï blogonu. Samuel mi mbut Jesse ki groma yed’et, mi yazi á te te ma ngat buzu máma mi.
6 Ata yima azi mbana, Samuel mi we Eliyap, mi djib’er ala: Gagazi, ni ma Ma didina manama!
7 Wani Ma didina mi de mi Samuel ala: Ang djib’er yam djif mama ki fiyak mamba d’i, kayam an noyômu, kayam an nga ni we ni d’igi suma a we na d’i. Azi we ni ir sana abua, wani an we ni hur sana krovo.
8 Jesse mi yï Abinadap á kal avok Samuel, wani Samuel mi dala: Ma didina mi manam nga d’uo mi.
9 Jesse mi de mi Samma á kal avok Samuel, wani Samuel mi dala: Ma didina mi man nga máma d’uo mi.
10 Jesse mi de mi grom suma kid’iziyana á kal avok Samuel tutu pet, wani Samuel mi de mi Jesse ala: Ma didina mi man nga sa adigazi tu d’i. 11 Bugola, mi djop Jesse ala: Grongâ ni hina go zu?
Jesse mi hulong dum ala: Ma tobona ar nga, mi sä pol tumiyôna.
Samuel mi dum kua ala: Ang ge sunda halamïya; bei mam mba ba ni, ei mba kagei kä á tei te ma ngat buzuna d’i.
12 Jesse mi mbam eya. David ni sama afefetna, mi djif ir suma heî mi. Ma didina mi de mi Samuel ala: Ni mamu! Ang tchola, ang vo mbulâ kam á tinim amula. 13 Samuel mi hle mbulâ, mi vom yam David avok b’oziyoma. Muzu’â hi Ma didinina mi ve David, mi kak ki sed’em kur bur máma gak kur bur ma avo’â mi. Bugola, Samuel mi hulong avo Rama.
SAUL AZI KI DAVID
David mi mbut ma sunda hi Saul-lâ
14 Muzu’â hi Ma didinina mi wal lei ki Saul; Ma didina mi sunï muzuk ma tchona nga mi lum ndaka. 15 Azungeîna hi Saul-lâ a dum ala: Gola! Muzuk ma tcho ma tcholï ata Alonina nga mi lang ndaka. 16 Salamina, ang hami vuna, ami halang sama we bu adingîna tu. Hina wani, le muzuk ma tcho ma tcholï ata Alonina mi mba atangû ni, ni mam ba, mba mi bu adingâ. Hina wani, tang mba d’i tuga.
17 Saul mi hulong de mazungeî mama ala: Agi ï halagi sama djivi ma bu adingâ, agi mbeyendjïya.
18 Aduk azungeî mama sana tu mi hulong dum ala: An we sana tu, ni Jesse ma Betelehem-ma goroma, ni sama we bu adingâ djivid’ina, ni sama ad’eng ma gangrangâ, ni sama durâ, ni ma de zla d’a djivid’ina, ni ma djifâ mi; kal pet, Ma didina mi nga ki sed’emu.
19 Saul mi ge sunda mi de mi Jesse ala: Ang hanï gorongâ David ma pol tumiyôna! 20 Jesse mi ve korona, mi yo avungôna, agela ki süm guguzlud’a kahuna tu kamu, mi hazi mi goroma David ala mi i hazi mi Saul.
21 David mi mba avo hi Saul, mi kal kur sun mamba. Saul tam mbi lum djivid’a heî kamu, mi mbud’um sama mi zim ahle mam suma dur ayînina. 22 Saul mi ge sunda, mi de mi Jesse ala: An tchenengû, ang ar David mi kak kur sun manda, kayam tan ndi lan djivid’a heî kamu. 23 Wani ata yima muzuk ma tcho ma tcholï ata Alonina mi mba wa yam Saul-lâ, David mi hlading mama, mi nde mi bumu. Hina wani, Saul tam mbi tuga, muzuk ma tchona mi aramu.
© Azumeina Bible © Alliance Biblique du Tchad, 1999.
