Suma a nga ndumuzi aduk tok ka d’engzenga d’uo na
1 Moise mi de kua ala: Sama a tom hud’uma d’oze ma a ngad’am d’uwam mbeina, mi kal kur toka hi Ma didinid’a d’i.
2 Sama a vud’um akulo aduksuna, mi ndak á kal kur toka hi Ma didinid’a d’i. Le nandjavam ma kur atchogoi d’a dogod’ina pî, mi ndak á kal kua d’i.
3 Suma Amon-na ki suma Mowap-ma a kal kur toka hi Ma didinid’a d’i. Le nandjavazi ma kur atchogoi d’a dogod’ina pî, mi ndak á kal kua d’i gak didin, 4 kayam azi d’ugulogi nga kavungôna ki mbina d’i. Azi wurak Baläm Beyor gorom ma nga kur azì ma Petor ma nga yam ambas sa Mesopotami-d’ina á gagi vuna. 5 Wani Ma didina Alo magina mi min hum Baläm mbi, mi mbut vun ma ged’a b’e vuna kagiya, kayam mam hurum vagiya. 6 Ata yima agi nga ki iragi tua na, agi djib’eregi yam ndjondjoî mazid’a ki djivi mazid’a d’i.
7 Agi gologi Edom-ma is si, kayam azi ni b’oziyogina; agi gologi Ezipte-na is suo mi, kayam agi ei nangoyogeina yam ambas mazid’a. 8 Grozi ngolo suma a mba vud’uzi kur atchogoi d’a hindid’ina, a mba kal kur toka hi Ma didinid’a.
Lovot ta ngom kangâ yed’eta
9 Moise mi de kua ala: Le agi buzugugi á ve kangâ á dur magi suma djangûna ni, agi gologi tagi djivi kahle suma tchona. 10 Le sa tu adigagi mi b’lak tam ki vama mi mba kam andjegena ni, mi nde woi kur kangâ mi kal kur ri 11 gak fladege, mi mbus sei ki mbina, bugol la afata nik dad’a, mi kal kur kangâ tua.
12 Agi i minigi yima o bageid’a sä ni woi bugol kangâ; ni kua ba, agi igi o bageid’a. 13 Agi ngomogi kaweid’a aduk ahle magina. Ata yima agi igi o bageid’ina, agi djugud’ogi zula kä, agi ogi sud’ona kua, agi tozom yam kä mi. 14 Ar kang magina mi ka’î yed’et, kayam Ma didina Alo magina nga mi tit kur kangâ á ngomogiya, á dik magi suma djangûna woi avorogi mi. Ar mi we vama ndjendjed’a avo hatagi we ba, mi hulong ngei kazigam mbi.
Magom ma ring ngeina
15 Moise mi de kua ala: Le magoma mi ringî abo salama, mba mi ngei kur ambas magid’a ni, agi hulongôm mi salama d’i. 16 Agi aram mi kak adigagi ata yima mam hurum minima kur azì ma ngol ma nde irama; agi tinim sun nda aneka kam mbuo mi.
Gat ta yam gaulangîd’a
17 Moise mi de kua ala: Ar mandjuf ma Israel-lâ d’oze atcha d’a Israel-la ti kak gaulang ngi. 18 Ar agi mbagi ki he d’a hawad’a hi gaulangîd’a d’oze bege d’a a hat yam adinid’a kur gong nga kud’ora hi Ma didina Alo maginid’a á ndak vun vun ma hle ma lara ma sana mi hluma d’i, kayam azi djak nahle suma ndjendjed’a avok Ma didina Alo magina.
Gat ta yam bege d’a a hat ki mbinid’a
19 Moise mi de kua ala: Ar agi hagi vama lara ma suma a nga hum á mbinina, d’oze beged’a, d’oze tena, d’oze vama ding mi wiyegina ki mbina d’i. 20 Agi ndak á hagi vana mangeina ki mbina, wani agi hagi va ki mbina mi wiyegina d’i, kayambala Ma didina Alo magina mi b’e vunam kagi kur sun nda lara ge pet ta agi mba lat kur ambas sa agi nga kalagi kur á tagi kat wanda d’a.
Gat ta yam vun ma hle ma a hlum mAlonina
21 Moise mi de kua ala: Le agi hlagi vunagi á he va mi Ma didina Alo magina ni, agi lagi lilinga á hagizi d’i. Le d’uo ni, Ma didina Alo magina mba mi djobogi kamu, agi mba mbud’ugi ni suma tchona. 22 Le agi hlagi nga vuna d’uo pî, nga tcho d’i. 23 Wani le agi hlagi vunagi yam va ni, agi tid’igi kamu, agi ndagam memet d’igi zla d’a ti ndavunagi kur min magid’a yam vama agi hlagi vunagi kam mi Ma didina Alo maginina na mi.
Gat ta ndot vut agunid’a
24 Moise mi de kua ala: Le agi kalagi aduk asine ma guguzlu ma nga ni magina d’uo na ni, agi ndak á tagi vud’a guguzlu d’a agi hurugi minita, wani lovota nga kagi á yogizi abogi kur bud’omei magina d’i. 25 Le agi kalagi kur asine ma awu ma nga ni magina d’uo na ni, agi ndak á karagi yam awuna kabogi á hosa, wani lovota nga kagi á zagizi ki mbaragumba d’i.
© Azumeina Bible © Alliance Biblique du Tchad, 1999.
