Seba tchol huneîd’a ki David
1 Wani sama bateina mi nga kua, a yuma ala Seba; ni Bikri ma Benjamin-na goroma. Mi bu adifa mi dala: Va mi ndolei nga ki David ti. Ei nga tei djo aduk tei ki Jesse goroma d’i. Agi Israel-lâ nge nge pî, mi hulong avo hatamu! 2 Israel-lâ pet a wal lei ki David, a zlap ki Seba Bikri goroma. Wani suma Juda-na a ve tazi ki David, a tcholï ki sed’em dei gak a mba ki sed’em Jerusalem.
3 David mi kal avo hatam Jerusalem, mi yo amiyôm suma gurei suma dogo suma mam arazi nga á ngom vun azinina, mi tchuguzi kur yima dingâ woi vaziya. Nga mi ngomoziya, wani nga mi tchila gevezi d’i. Mi duguzi vunazi gak mat mazina; azi arî d’igi arop suma modonod’a na gak mat mazina.
Jowap mi tchi Amasa woyo
4 Amulâ mi de mi Amasa ala: An hang burâ hindi ang i yï suma Juda-na pet, ang mbeï ki sed’ezi ka hî.
5 Amasa mi i á yï suma Juda-na, wani mi le lilinga yam bur ma amulâ mi ngamzina. 6 David mi de mi Abisai ala: Seba Bikri goroma nga mi lei zla d’a tchod’a kal la hi Apsalom-mba. Ang tang i yo azigar mana, ang i ad’umu. Ar mi fe azì ma ngunguna teteng á ngei tam irei d’i.
7 Suma hi Jowap-ma a buzuk á i bugol Abisai zlapa ki suma Keret-na ki suma Pelet-na ki suma gangrangâ pet. A buzuk kei Jerusalem á dik Seba Bikri goroma. 8 Kid’a azi mbaza go kahina d’a ngol la Gabawon-ndid’a, Amasa mi mba á d’uguloziya. Jowap mi djin d’i’â yam baru d’a nga tchuka atamba, mbigeu d’a fiyaka nga djinda furum kur aziyad’u. Kid’a mam nga mi tita, ti pat ti nde kä. 9 Jowap mi de mi Amasa ala: Wiyena, ang hawa ko zu? Mi vum dudumam kabom ma ndjufâ á gum depa ki furîd’a. 10 Amasa mi ngom nga tam yam mbigeu d’a fiyak ka nga abo Jowap-pa d’i. Jowap mi pum mbigeu mam mba fiyaka kurumu, mi zugum aruwad’am kä woi andaga. Amasa mi mit bei Jowap mi tchogom yam á mbàd’a ba.
Tchid’a hi Seba-d’a
Jowap azi ki wiyema Abisai a nde dik Seba Bikri goroma. 11 Azigarâ hi Jowap ma tu mi ar tchola yam Amasa, mi dala: Sa mala mi le yam Jowabu na, mala ni hi David’u na, ar mi i bugol Jowap.
12 Wani Amasa nga mi bulul kä aduk buzuna hur lovota. Kid’a azigar máma mi we suma pet a nga tchol kä kamba, mi hud’um mbei aduk asuna, mi zlubum barud’a kam kä. 13 Kid’a mi hud’um mbei glovot da d’a, azigar ma lara pî nga mi i bugol Jowap á dik Seba Bikri goroma.
14 Jowap mi tchuk andjafâ hi Israel-lîna woi blogom pet, mi mbaza Abel-Bet-Mäka; suma hi Bikri-na pet a tok tazi a i ad’u Seba mi. 15 Jowap azi mba a ngui Seba avo Abel-Bet-Mäka, azi mbu andagad’a akulo ad’u gulumuna gak ti ndjak ki gulumuna. Jowap ki sum mama pet a nga djugot ad’u gulumuna á drizim kä.
16 Ata yi máma atcha d’a wäd’u zlad’a ti nga kur azì ma ngol máma, ti de ki delet akulo ala: Agi humugiya! Agi humugiya! An nga ni tchenegiya, agi dagi mi Jowap ala mi hud’ï go. An nga ni dum zlad’a.
17 Jowap mi hut geved’u. Atcha ndata ti dum ala: Ni ang Jowap-pa?
Mi dat ala: Ni anu.
Ti dum ala: Ang hum zla d’a an wei manga nga ni dangzid’a.
Mi hulong dat ala: An nga ni huma.
18 Ata yi máma ti dum ala: Adjeu a nga dala: A hal ad’u zlad’a ni avo Abel, a min ahlena pet ni kua mi. 19 Azì ma ngol mamina nazì ma halas ma d’engzeng ma kalâ aduk azì ma Israel-lâ, wani ang nga hal á b’lak abu azì ma ngol máma woyo. Ni kayam me ba, ang nga hal á b’lak azina hi Ma didina máma woi ge?
20 Jowap mi hulong dat ala: An nga ki djib’era á b’lak azina d’oze á dris gulumuna kä woi d’i! 21 Wani sana tu ni ma nga yam ahuniyôna hi Efraim-ma simiyêm ala Seba Bikri goroma, mi tchol huneîd’a kamulâ David. Agi handjï ni mam tu, an mba ni ar azina bei b’laka.
Atcha ndata ti de mi Jowap ala: Djiviya! Ami mba gangzi yam sä woi abu yam gulumuna. 22 Atcha ndata ki ne mata, ti i avo gen suma kur azinina pet. A ngad’ï yam Seba Bikri goroma, a gattcha mi Jowap yam gulumuna. Jowap mi bu adifa, suma a b’rau woi a ar azì máma; nge nge pî mi i avo hatamu. Jowap tamba mi hulong avo Jerusalem gen amulâ mi.
Suma sunda hi David-na
23 Jowap ni ma te yam azigar suma Israel-lâ petna. Benaya Jehojada goroma ni ma te yam suma Keret-na ki suma Pelet-nina. 24 Adoram ni ma ngolâ hi suma ve tarina. Josafat Ahilut goroma ni ma b’ir zla d’a led’a kä na. 25 Seva ni ma b’ir mbaktumba; Sadok azi ki Abiyatar ni suma ngat buzuna. 26 Ira ma Jayir-râ mi nga kad’enga yam ahlena hi David-na teteng mi.
© Azumeina Bible © Alliance Biblique du Tchad, 1999.
