Gat ta a hat yam vun ma hled’id’a
1 Ma didina mi de mi Moise kua ala: 2 Ang i de mi Israel-lâ ala:
Le sana mi hle vunam á he sana mi an Ma didina, le bugol mi min á sut tam yam vun ma hle máma ni, mi ndumî gusa hi sa mámid’a, mi hat mi an Ma didina, mi sut tamu.
3 Le ni sama bizam dok mbà gak mba dok karagayana ni, ang he ni bege d’a hap pa ndak ir aneka hi beged’a a ngat á hed’a yam zlub’u d’a kud’orid’a dok vahl. 4 Le natchad’a ni, ang he bege d’a hapa dok hindi.
5 Le ni ma bizam vahl gak mba dok mbàna, le ni gor mandjufâ ni, ang he bege d’a hapa dok mbà. Le ni gor atchad’a ni, ang he bege d’a hapa dogo.
6 Le ni ma tilim tu gak mba biza d’a vahla, le ni gor mandjufâ ni, ang he bege d’a hapa vahl. Le ni gor atchad’a ni, ang he bege d’a hapa hindi.
7 Le ni ma bizam kal dok karagayana, le ni mandjufâ ni, ang he bege d’a hapa dogo yam vahl. Le natchad’a ni, ang he bege d’a hapa dogo.
8 Le sana mi hle vunama mam mi ma hou ma ndak á wurak bege d’a a ngatina d’uo ni, mi i ki sama mi hle vunam kama avok ma ngat buzuna. Hina ma ngat buzu máma mi le gusa ni yam ad’enga hi sama mi hle vunam máma.
9 Le sana mi hle vunam á he d’uwar ma mi ndak á hum vama ngat buzuna mi an Ma didinina ni, ma mi han ni ma a tinim iram vam da na. 10 Ar a mbud’um ki ndram ma ding ngi; le ni ma djivina d’oze ma tchona pî, a mbud’um mbei d’i. Le sana mi min mbud’uzi woyo ni, azi djak ni suma a tinizi irazi vazi da na.
11 Le sana mi hle vunam á he d’uwar ma ndjendje ma mi ndak nga á hum vama ngat buzuna mi an Ma didina d’uo na ni, salam ma mi huma, mi i ki sed’em avok ma ngat buzuna. 12 Ma ngat buzu máma mi lum guzum ndak yam djivi mamba d’oze tcho mamba, a mba ka’î yam gus ndata na mi. 13 Le salama mi min á mbud’um yamu ni, mi wurak gusa hi va máma d’a ma ngat buzuna mi ngata, mi hle bege d’a ding nga ndak ir gusa hi va mámid’a, mi walat kä ad’u vahl mi hle tu, mi tinit yam gusa hi va mámid’a kua.
14 Le sana mi tin aziyam iram vam á hum mi an Ma didina ni, ma ngat buzuna mi i lum guzum ndak yam djivi mamba d’oze yam tcho mamba; gus ndata mba d’i ka’î hina mi. 15 Le salama mi min á mbud’um yamu ni, mi wurak gusa hazì mámid’a, mi hle bege d’a ding nga ndak ir gusa hazì máma d’a ma ngat buzuna mi ngata, mi walat kä ad’u vahl, mi hle tu, mi tinit yam gusa hazì mámid’a kua.
16 Le sana mi tin asine mam ma dingâ iram vam á hum mi an Ma didina ni, a lum guzumî ki ngola handjaf awu ma mam zaram kä kur asine mámina. Mi he bege d’a hapa dok vahl ngad’a yam awu orsâ ir kilona kikis hindi. 17 Le mi tin asine mama iram vam mi an Ma didina ni kur biza d’a ngol la furîd’a ni, gus ndata ti ka’î d’igi ma ngat buzuna mi ngat na. 18 Le mi tin asine mama iram vam á hum mi an Ma didina ni bugol biza d’a ngol la furîd’a ni, ma ngat buzuna mi ndum beged’a, mi kat tei ngad’a yam biza d’a ar avoka gak mba ata biza d’a ngol la furîd’a.
19 Le sala asinena mi min á mbud’um yamu ni, mi wurak gusa hasine mámid’a, mi hle bege d’a ding nga ndak ir gusa hasine máma d’a ma ngat buzuna mi ngata, mi walat kä ad’u vahl, mi hle tu, mi tinit yam gusa hasine mámid’a kua. Asinena mba mi arî mama.
20 Le mi hulong mi mbut nga asine mama d’uo ba, mi guzum mbei abo sama dingâ ni, mi ndak á hulong mi mbud’um bugol luo d’a; 21 fata biza d’a ngol la furîd’a ndaka, asine máma mba mi arî hi an Ma didinina, mba mi mbut ni hi suma ngat buzunina d’igi asine ma a tinim iram vam mi an Ma didina ki iram fafatna na.
22 Le sana mi tin asine mam ma mi guzum akulo ma a humzi nga ni djona d’uo na iram vam á hum mi an Ma didina ni, 23 ma ngat buzuna mi lum guzumî ngad’a yam biza d’a ar avoka gak mba ata biza d’a ngol la furîd’a. Sala asinena mi he beged’a ni kur bur máma baba d’igi ma ngat buzuna mi ngat na. Bege ndata a tinit irat vat mi an Ma didina. 24 Wani fata biza d’a ngol la furîd’a ndaka, asine máma mba mi arî mi salam ma avok kikidjina, nala, sama a hum asinena djonina.
25 Gus sa ang mba lata pet, ang mba lat ni ki bege d’a ndak ir aneka hi bege d’a a ngat á hed’a yam zlub’u d’a kud’orid’a; bege d’a tud’a ni ir grama dogo dogo.
He d’a hawa d’a tetenga
26 Ma didina mi de kua ala: Sana mi ndak á tin d’uwar mam ma vut avo’â iram vam á hum mi an Ma didina d’i, kayam ahle suma a vut avo’â pet, le ni gor amuhlâ d’oze gor b’ëna d’oze gor timina, a tinizi ni irazi vazi mi an Ma didina da’. 27 Le ni d’uwar ma ndjendjed’a, le salama mi min á hulong wurak kam kua ni, mi wurak gusa hi va mámid’a, mi hle bege d’a ding nga ndak ir gusa hi va máma d’a ma ngat buzuna mi ngata, mi walat kä ad’u vahl, mi hle tu, mi tinit yam gusa hi va mámid’a kua. Le mi wurak kam mbuo ni, ma ngat buzuna mi guzum mbei ki sama dingâ ki gus sa mam ngata.
28 Wani vama sana mi tinim iram vam mi an Ma didina ki iram fafatna, sana mi ndak á guzum mbei d’oze wurak kam mbei d’i. Le ni sana d’oze d’uwarâ d’oze asine ma a humzi djonina pî, ahle suma a tinizi irazi vazi mi an Ma didina ki irazi fafat ndazina pet, a mbut nahle suma a tinizi irazi vazi ki irazi fafatna. 29 Sama a tinim iram vam mi an Ma didina ki iram fafatna, sana mi ndak á wurak kam mbei d’i, wani a tchumî woyo.
30 Ahle suma a zumuzi yam andagad’ina pet, le nawuna d’oze vut aguna, nala, ahle suma a handji dimina pet, a arî ahle suma a tinizi irazi vazi mi an Ma didinina ki irazi fafatna. 31 Le sana mi min mi mbut vama mam handji dimina ni, mi wurak gusa hi va mámid’a, mi hle bege d’a ding nga ndak ir gusa hi va máma d’a ma ngat buzuna mi ngata, mi walat kä ad’u vahl, mi hle tu, mi tinit yam gusa hi va mámid’a kua. 32 Le ni d’uwar ma nglona d’oze ma gureina ni, ata yima a ndumuzina, a hazi dima, a tinizi irazi vazi mi an Ma didina ki irazi fafatna. 33 Ar a golom mbala mi ni djivid’a d’oze mi ni tchod’a zi ge d’a d’i, ar mi mbud’um mbei d’uo mi. Le mi mbud’um mbeyo ni, azi djak nahle suma a tinizi irazi vazina, sana mi ndak á hulong wurak kazi d’uo mi.
34 Wana ni vun ma he ma teteng ma Ma didina mi hum abo Moise mi Israel-lâ yam ahina d’a Sinai-d’ina.
© Azumeina Bible © Alliance Biblique du Tchad, 1999.
