Gat ta yam d’uwar ma a kulumid’a
1 Ma didina mi de kua ala: Le sana mi kul amuhl hloze timina, le mi ngad’am mboze mi guzum mbeyo ni, mi wurak amuzleina vahl yam amuhl ma tuna, tumiyôna fid’i yam timi ma tuna mi.
2 Le sama kul máma mi tcho ni kangâna andjege ba, a fum kua, a tchumu ni, sama tchuma zla nga kam mbi. 3 Wani le ni faleya ni, sama tchuma zlad’a nga kamu. Ar ma kul máma mi wuraga. Le va nga abom mbuo ni, a guzum mbei yam kul mamba.
4 Le vama mi kuluma a vum ki sed’em bei tchid’a, le namuhl hloze koro d’oze timina ni, mi wurak yam vama tuna mbàmbà.
Gat ta yam b’laka hahlenid’a
5 Ma didina mi de kua ala: Le sana mi ar d’uwar mama mi b’lak asine ma awuna d’oze ma guguzlud’a hi ndramina ni, mba mi wurak awu ma djivi ma kur asinema, ki vut guguzlu d’a djivid’a yam asine ma mi b’lagama.
6 Le akud’a ti ndeï abo sana, ti djagï asuna, ti mba d’i ngal awu ma nga duta kä na d’oze awu ma nga akulo bei dutina d’oze asine máma woyo ni, sama aku ndata ndaboma, mi wurak yam awu ma ngal lei máma.
7 Le sana mi he beged’a d’oze ahle suma dingâ mi ndrama á ngeid’a, le a kul ahle ndazina abomu, le a ve sama kul máma ni, sama kul máma mba mi wurak yam vama tuna mbàmbà. 8 Le a fe nga sama kul máma d’uo ni, sama a hum ahle ndazina abom ngeid’ina, mba mi i tchol avogon an Alona kur gong manda, mba mi de woi ala mam kul nga ahle ndazina ni mam mbi.
9 Le tuguyod’a mba wa aduk suma mbà yam amuhl hloze koro d’oze timi d’oze baru d’oze vama lara ma ba woina, ma hina ala mamba ni na, ma hina ala mamba ni na ni, azi djak a i ki zla ndata avogon an Alona. Sama an Alona kam sariyad’a kama, mi wurak ahlena yam va máma mbàmbà.
10 Le sana mi he ni korona, d’oze amuhlâ, d’oze timina, d’oze vama lara mi ndrama á gola, le va máma mi mid’a d’oze mi kuza d’oze a kulum bei sa wumu ni, 11 agi tinigi gunda aduk suma mbà ndazina ki simiyên an Ma didina. Sama a hum vana abom á golina, mi de woi avogon an Alona ala mam do nga abom ata va máma d’i, wani sala va máma mi min yam gun ndata mi. Hina wani, wuraka nga d’i. 12 Wani le a kulumî avo hatamu ni, mi wurak sala d’uwarâ. 13 Wani le va mi vumî ve ni, sama a hum va máma abom golina, mi mba ki haram abom á le glangâsâ kamu. Hina wani, mam nga mi wurak ki, kayam va mi vumî ve.
14 Le sana mi ve vana abo ndrama á le sunda, va máma le mi kus soze mi mit bei salama wumu ni, sa máma mi wuraga. 15 Wani le salama mi wumu ni, sa máma nga mi wurak ki, kayam wurak ka mam humzid’a ndak da’.
Gat ta tetenga
16 Ma didina mi de kua ala: Le sana mi lop vun gor atcha d’a sa mi kat nga d’uo d’a, mi bur ki sed’ed’u ni, mbeî mi wurak begena mabud’u, mi vat atchad’a. 17 Wani le abut mi min nga d’ala sa máma mi vat tuo d’a ni, sama mi lobot vunatna, mbeî mi wurak begena ir gor atchad’a sop.
18 Mbeî agi tchagi suma djop fileina woyo.
19 Sama bur ki d’uwarîna, mbeî agi tchum mbeyo.
20 Sama ar an Ma didina woi ta ba, mi hahle suma ngat buzuna malo ma dingîna, mbeî agi tchum mbeyo. 21 Agi lagi ir angeina d’i, agi djobom vunam mbuo mi, kayam agi tagi pî ei ni angoyogeina yam ambas sa Ezipte-d’a mi. 22 Agi lagi atcha d’a modono d’oze gor ma hokuyo ndaka d’i. 23 Le agi lazi ndaka, azi tchi kan an Ma didina ni, an mba ni hum tchi mazina. 24 Hurun mba mi zal kagiya, an mba ni hagi woi abo suma; a mba tchagi woi avun ayî ma durâ; amiyôgina a mba ar modonod’a, grogina a mba ar hokuyod’a mi.
25 Le sama hohoud’a aduk sum mana, mi nde beged’a abogiya ni, agi lum d’igi suma he bal suma dingâ a nga le hina d’i, agi djobot mbiyot ti.
26 Le ndragina mi dengêgi baru mam mba ngola ni, agi hulongômzi bei afata nika, 27 kayam ni baru mam mba ngol la tu d’a mam zlup ki tamba. Le d’i nga abom mbuo ni, mam mba mi zlup tamî ki me ge? Le mi tchi kanu ni, an mba ni humumu, kayam an ni Ma we hohowa sumina.
28 Agi ngulugi an Alo magina d’i, agi ngulugi amul magina d’uo mi.
29 Agi lagi lilinga á han awu magina ki vud’agu magi ma ne avo’â d’i.
Agi handï grogi suma a vut avo’â.
30 Agi lagi hina ki d’uwar magi ma nglona ki ma gurei ma mi vut avo’â. Agi aram mi le burâ kid’iziya kasumu; bur ma klavandina agi ngad’andji buzuna.
31 Agi mba kagagi ni suma a tinigi iragi vagi yam ana. Agi tagi vama har ri, agi hagizi ni madureina.
© Azumeina Bible © Alliance Biblique du Tchad, 1999.
