Daniel 7 - Azumeina Bible 1999 (MPG)

AHLE SUMA A NDAZI WOI IR DANIEL-LÂ

Vama avo’â: Amburei suma fid’ina

1 Kur biza d’a avok ka Baltazar amul ma Babilon-na nga mi tamulid’a, adïd’a de Daniel, vana nde tam mbei iram ata yima mi nga burâ yam azang mamina. Bugola, mi b’ir zlad’a hadï ndatid’a, mi väd’u zla mat ta nglod’a woi mi.

2 Daniel mi dala: Kur andjeged’a vana nde tam mbei iranu. An gola, an we simet ma ata abo ma fid’inina nga mi sir yam alum ma ngolâ kad’enga. 3 Amburei suma nglo suma kalâ fid’i a buzugï woi kur alum ma nglo máma. Azi pet ni teteng. 4 Ma avo’â mi hle tam d’igi azlona na, wani mi nga ki gigingâ d’igi ma hi b’arunina na. Kid’a an nga ni golom tua d’a, a pad’am gigingâm mbeyo, a hlum akulo woi yam andagad’a, a tcholom akulo kasem d’igi sana na, a hum djib’era hi sanid’id’a mi. 5 Ambur ma mbàna mi hle tam d’igi ursâ na. Mi nga tchola akulo kasem ma bugolâ, asok ma papeina hindi mi nga avunam aduk siyamu. A hum vuna ala: Ang tchol akulo, ang mut hliuna ngola. 6 Bugola, an nga ni gola, gol wani, ambur ma dingâ mi hle tam d’igi sindilâ na, wani gigingâ haleinina fid’i nga huyogomu. Ambur máma mi nga ki yamba fid’i, a hum ad’enga á te yamba mi. 7 Bugola, an nga ni gol kur vama nde tam mbei iran kur andjeged’a tua na, an gol wani, ambur ma fid’ina, mi kal tchod’a ngola, ni vama mandarâ, ma ad’enga ngola heî mi. Siyamî nglod’a d’igi kaweina na. Mi mut ahlena, mi kizagazi woyo, mi miret ad’uzi d’a ara kä kasemu. Mi nga d’igi amburei suma avok ndazina na d’i, mi nga kaduveina dogo kam mi. 8 Ata yima an nga ni sizar aduvei ndazina tua na, an gol wani, adif ma ding ma gorâ, mi deî aduk aduvei ndazina. Mi pat aduvei suma avo’â woi avorom hindi. An gola, adif máma mi nga ki ira d’igi ir sana na, zla d’a subur tad’a nga d’i buzuk avunam mi.

Sariya d’a kad’a hAlonid’a

9 Daniel mi de kua ala: Ata yima an nga ni gol tua na, a ndjar zlumiyôna kä, ma abizei ma dedeina mi mba mi kak yam zlam mba dinga tu. Baru mam mba atamba ti hapa d’igi gagarad’a na, tumus sa kamba ti djifâ luluî d’igi tumus tumiyôna na. Zlam mamba nga d’i ngal d’igi sin akud’a na, abot ni d’igi abo pus ma akud’a na, 10 toliyon nda akud’a nga avoromu, nga d’i djang d’igi mbina na. Suma dubuna a nga gevem á lum sunda, suma bubupma a nga tchola avorom mi. Suma ka sariyad’a a nga kaka kä yam zlumiyô mazina, a mal mbaktumba woi teteng mi.

11 Ata yima an nga ni gol tua na, nga ni djib’er yam zla d’a subur tad’a hadif ma gor mámid’a. Kid’a an nga ni gol tua d’a, a tchi ambur ma fid’i máma, a kizagam hliwim mbeyo, a tchugum aku ngala. 12 Amburei suma a ar hindina, a prud’uzi ad’eng mazi d’a tamula woyo, wani a arazi buruzi fiyaka gak yima a ngama.

13 Kid’a an nga ni gol vama nde tam mbei iran andjegena tua d’a, an gol wani, sana nga mi djï yam dugula d’igi gor sana na, mi mba, mi hut gen ma abizei ma dedei máma, a mbamzi avoromu. 14 Ma abizei ma dedei máma mi hum ad’eng nga te yamba, subura ki leu d’a ted’a. Andjaf suma ki suma ad’u vun ma ded’a tetengâ pet a nga lum sunda. Yam mam mba ted’a ni d’a didin nda bei dabid’a ba d’a, leu mamba nga d’i b’lak kei d’uo mi.

Vad’ud’a hi vama avo’îd’a

15 Daniel mi de kua ala: Muzugan mi b’lak ngola kurun krovo kayam vama a ndum mbei iran máma mi mbud’un mandarâ heî. 16 An hut go gen ma ding ma nga ata yi mámina, an djobom ala mi van ad’u gagazid’a hahle ndazinid’a pet go ge. Mi van ad’u ahle ndazina, mi dan ala: 17 Amburei suma nglo suma kal suma fid’i ndazina namulei suma fid’i suma a mba tchol te leud’a yam andagad’ina. 18 Wani suma ma sä akulo ma kal teglesâ mi tinizi irazi vazina a mba hle leud’a, a mba te leud’a kur atchogoi d’a lara ge pet gak didin. 19 Bugola, an min wad’ud’a yam ambur ma fid’i ma mi nga d’igi ndrom suma hindina na d’uo, ma tcho d’a kal ma siyam d’igi kaweina, na ma lilivim d’igi kawei ma hleuna na, ma mi mut ahlena mi kizagazi woi kikizek mi mired’ezi ad’uzi d’a ara kä kasema. 20 An hal wad’ud’a yam aduvei suma dogo suma a nga kama, yam adif ma gor ma deî adigazi ma mi tchuk suma hindina kä woi avorom ma nga ki ira ma zla d’a de d’a subur tad’a ndavunam ma mi kal ndrom suma dingâ petna mi.

21 An gol adif máma. Mi dur ayîna ki suma a tinizi irazi vazina, mi kus kaziya, 22 gak ma bizei ma dedeina mi mba á ka sariya d’a d’ingêra hi suma ma sä akulo ma kal teglesâ mi tinizi irazi vazina, gak kur bur ma suma a tinizi irazi vazina a te leud’ina.

23 Sama an djoboma mi hulong dan kua ala: Ambur ma fid’ina ni leu d’a fid’i d’a mba d’i kak yam andagad’a ka hî d’a wal lei ki leu d’a dingid’a, mba d’i b’lak andagad’a woi pet, mba d’i mired’et kä, mba d’i kizagat tei kikizek mi. 24 Aduvei suma dogo ndazina namulei suma dogo suma a mba tchol kur leu ndatina. Ma dingâ mba mi tcholï blogoziya, wani mi nga d’igi suma avo’â na d’i. Mam mba mi kus yam amuleina hindi adigaziya. 25 Mam mba mi de zla d’a tchod’a yam ma sä akulo ma kal teglesâ, mba mi djop vun sum mama mi. Mam mba mi nga hurum á mbut bur tilâ ki gata hAlonid’a kä. Ma sä akulo ma kal teglesâ mba mi hum sum mama abom gak bizad’a hindi ki nusa. 26 Bugola, suma Alona mi tinizina a mba kam sariyad’a kamu, a mba prut ad’eng mam mba te yamba woi abomu, a mba b’lagam mbei ki iram fafat. 27 Leud’a, yam mba ted’a ki ngola hi suma kur leu d’a yam andagad’a ka hid’a pet, a mba hat mi suma Ma sä akulo ma kal teglesâ mi tinizi irazi vazina. Leu mam mba ted’a ni leu d’a gak didinda. Suma te yamba pet a mba lum sunda, a mba ge yazi kä avorom mi.

28 Zla d’a de ndata daba. An Daniel, djib’er manda mbud’un mandarâ heî, an tchuk susub’ok, an ngom zla ndata kurunu.