*
1 Kayam ndata, mugulan nga mi zlaga,
mi ar go á nde woi ata yamu.
2 Agi humugiya! Agi humugi delem mba breîd’a,
agi humugi ngop pa nga d’i ndei avunamba.
3 Nga mi sunut avun dabid’a hakulod’id’a pet,
wile mamba nga d’i b’o gak ti i avun dabid’a handagad’id’a mi.
4 Bugol wiled’a, a nga humum delem mba nga d’i ngir kä ngingira,
nga mi breî ki delem mba kal papad’a,
nga mi d’el wile mamba ata yima a nga humum delem mbei ata yinina d’i.
5 Alona nga mi lahle suma atchapma ata yima nga mi breîna,
nga mi lahle suma nglo suma ei ndak á weizi ad’uzi d’uo na mi.
*
6 Nga mi he vuna mi nesâ ala: Ang se yam andagad’a.
Nga mi he vuna malo ma sed’a kalo ma nga mi se kûkûna na mi.
7 Nga mi d’el sunda hi sumid’a pet
tala suma pet a we sun mamba d’a.
8 Amburei suma abageina a nga i ata yima a ngei tazi kuana,
a nga bur kä kur domi mazina mi.
9 Simet ma ngolâ nga mi tcholï abo ma sutna,
ab’lenga nga d’i tcholï abo ma norâ mi.
10 Ni muzuka hAlonid’a ba, ti mba ki glasâ,
mbina nga mi b’al ad’enga kurum kä kiki mi.
*
11 Alona nga mi he vuna mi d’ugula ti oî ki mbina,
nga mi sunut abo hî abo hî ki wiled’a.
12 D’ugula nga d’i pret ata yima mam tagattchina
á le vama mam hat vuna kam
yam andaga d’a suma a nga kaka kuad’a,
13 á gat suma yam andagad’ina,
d’oze á tak djivi mamba woi abu mi.
*
14 Job, ang tin humang ang hum ahle ndazina,
ang tchol hina djang á wäd’u sun nda ndandala hAlonid’a!
15 Ang we ni nana ba, Alona nga mi tak lovota mahle ndazina,
d’ugula nga d’i b’rau woi ki wiled’a teteng mi ge?
16 Ang we ni nana ba, d’ugula nga d’i ngui tita akulo abo tat tu ge?
Ni sun nda atchapa hi mam ma ne mamba ti ndak memetna mi d’uo zu?
17 Ang we ni nana ba, baru mangâ mi vang tang d’ut
ata yima andagad’a ti b’leng kä djedjet
abo simet ma abo ma sutnina ge?
18 Ang ndak á gang akulod’a ad’enga
d’igi kotrom ma a yorom ki kawei ma hleunina
d’igi mam na zu?
*
19 Ang tagami vama ami ndak á dumzina,
ami ndak á dum va d’i abo bei we mamid’a.
20 Na ni a dumî woi de tua ba, an ni de zlad’a tua zu?
Ni nge ba, mi min ala mi ba woi ge?
21 Sana mi ndak á we b’od’a atogo hina zak
ata yima d’ugula ti duk ir afatina d’i,
wani ata yima simetna mba mi tanat tei hilarâ tua.
22 B’o d’a nga d’i b’o d’igi lora na d’a, ti tcholï nabo ma norâ;
wile d’a lang mandarid’a, ti ngui nga Alona kä.
23 Ei ndak á tchei sä ata Ma ad’engêm kal petna d’i;
ad’eng mamba ti kal heî, d’ingêr mamba ti kal heî mi,
wani hina pet pî nga mi le ir sa d’i.
24 Ni kayam ndata ba, suma a nga lum mandaramu.
Wani nga mi djib’er yam suma a nga yi tazi ala azi ni suma ned’a na d’i.
© Azumeina Bible © Alliance Biblique du Tchad, 1999.
