Dep pa ged’a hi Paul-la
1 Ni an Paul. An ni ma a sunuma hi sumina d’i, d’oze hi sa d’uo mi, wani ni hi Jesus Christ kAbui Alona ma mi tcholom akulo aduk suma matna karid’ina. 2 An ki b’oziyoina pet suma a nga zlapa ki sed’ena, ami nga b’irimi mbaktum mba wanda mi agi Tok ka teteng nga yam andaga d’a Galat-tid’a. 3 Ar Alona Abuya ki Salad’a Jesus Christ a vagi sumad’a ki b’leng nga halasa. 4 Ni Christ ma he tam mbei kei á sud’i woi kur tcho meid’a á pad’ei woi kur atchogoi d’a tcho d’a tchetchem wandina, kur minda hAbui Alo meinid’a. 5 Ni Ma ei nga suburum gak didina. Amin!
Zla d’a Djivid’a ni tu
6 An le atchap kayamba agi walagi woi atogo zak ki mam ma yagi yam sumad’a hi Christ-sa á igi bugol Zla d’a Djivi d’a dingina. 7 Gagazi, Zla d’a Djivi d’a ding nga d’i, wani an nga ni dagi hina kayam suma dingâ a nga b’lagagi djib’er magid’a, a min mbut Zla d’a Djivid’a hi Christ-sa yat kä. 8 Wani ami d’oze malaika ma tcholï akulona, le mi tchagi wal Zla d’a Djivi d’a ding nga wal ki d’a ami tchagizi walata ni, ar Alona mi gum vuna. 9 Ki tchetchemba, an nga ni dagi kua d’igi ami dagi avok na: Le sama ding mi tchagi wal Zla d’a Djivi d’a wal ki d’a agi vat dad’a ni, ar Alona mi gum vuna.
10 Na ni ki tchetchemba, an hal lovota á le suma tazi djivid’a d’oze á le Alona tam djivid’a zu? Na ni an hal lovota á le suma tazi djivid’a zu? Le an nga ni le suma tazi djivid’a tua ni, an nazongâ hi Christ-sâ d’i.
Ni nana ba, Paul mi mbut ma a sunuma ge
11 Kayam ndata, b’oziyona, an nga ni dagi woi mbak, Zla d’a Djivi d’a an nga ni tchat walata ni d’a hi sa d’i. 12 Kayam an fat nata sa d’i, sa had’andji nga d’uo mi, wani ni Jesus Christ tamba ba, mi ndandji woyo.
13 Kayam agi humugi zla tit manda adjeu kur zlad’a hi Juif-fîd’a. Agi wagi ala an djop vun Toka hAlonid’a heî, an pleyêt tei mi. 14 Kur zlad’a hi Juif-fîd’a, adjeu an kal b’oziyon Juif suma bizazi ki an tuna ablaud’a, kayam tan nga d’i lan zlezleû á ngom zlad’a habuyomi ngolod’a.
15 Wani yam sumad’a hAlonid’a, mi manan avok bei a vud’unu, mi yan á lum sunda. 16 Kid’a mi nga hurum á tagan Goroma kayam an tchi wal Zla d’a Djivi mamba mandjuf suma dingâ d’a, ata yi máma, an hal nga wad’ud’a hi sa d’i. 17 An i nga Jerusalem ad’u suma a sunuzi suma avorona d’uo mi, wani an i ni yam andaga d’a Arabi-d’a. Bugola, an hulong kur azì ma Damas-sâ. 18 Bugol bizad’a hindi, an i Jerusalem á d’u Pierre, an le dimasa ki sed’em mbà. 19 Wani an we nga sama a sunum ma ding ngi, ni Jacques Salad’a wiyema hol.
20 Ki tchetchemba, vama an nga ni b’irigizi kur mbaktum mba wandina ni zla d’a gagazid’a avok Alona, an nga ni ka zla d’i.
21 Bugola, an i yam andaga d’a Siri-d’a ki d’a Silisi-d’a. 22 Wani Tok ka tetenga hi Christ sa avo Jude-d’a ti wan nga iran ndi. 23 Wani azi humî zla d’a suma dingâ a nga dat ala: Mam ma djobei vunei adjeuna, ki tchetchemba, nga mi tchi wal Zla d’a Djivi d’a gagazi d’a mam hal á pleyêt tei adjeud’a. 24 Azi subur Alona ngola yam zla manda.
© Azumeina Bible © Alliance Biblique du Tchad, 1999.
