Zla d’a mi dat mi Tok ka Sardes-sid’a
1 Ang b’ir mbaktumba mi malaika ma nga yam Tok ka Sardes-sina.
Wana nahle suma ma nga ki muzu’â hAlonina kid’iziya ki tchitchiud’a kid’iziya aboma mi dazina: An wahlena pet suma ang nga lazina, an we simiyêng nga mi yi d’igi sama arina na, wani angî matna. 2 Ang zlid’a, ang sira suma a nga lá matnina, kayam an we sun mang nga led’a nga avok Alo mana djivi tetet ti. 3 Ar ang djib’er yam hat ta ang had’ata ki vama ang humuma. Ang ge yang kä ad’u hat ndata, ang mbut hurung yam tcho manga. Le ang kak nga ki ndjola d’uo ni, an mba ni mba kang dumzi d’igi sama kula na, ang mba we yima an mba ni mba kuana d’i. 4 Wani ang nga ki suma dingâ avo Sardes suma a zot nga baru mazina d’uo na. Azi mba tit ki sed’en ki baru ma hapma ataziya, kayam azi ndaga. 5 Suma kus ayînina a mba tchuk baru ma hapma hina mi, an mba ni tchazi simiyêzi woi kur mbaktum mba arid’a d’i, an mba ni de woi kazi avok Abun ki malaika mama ala azi ni mana.
6 Sama nga ki humbina, ar mi hum vama Muzu’â hAlonina nga mi dum mi Tokina.
Zla d’a mi dat mi Tok ka Filadelfi-d’id’a
7 Ang b’ir mbaktumba mi malaika ma nga yam Tok ka Filadelfi-d’ina.
Wana nahle suma Ma bei tchod’a ma gagazi ma nga ki lakled’a hamulâ David-ta aboma, le ni mala, sama ndak á duka nga d’i, le ni duga, sama ndak á mala nga d’uo mi na mi dazina: 8 An wahlena pet suma ang nga lazina, an we ad’engêng nga nde, ang nga ge yang kä ad’u zla manda, angî sama d’engzengâ mi. Kayam ndata, an mal vun gonga woi avorongû, sama ndak á dugutna nga d’i. 9 Wana ni vama an mba ni le ki suma toka hi Seitan suma ka zla suma a nga yi tazi ala azi ni Juif-fâ na ba, azi nga ni Juif-fâ d’uo na. An mba ni lazi kad’enga, azi mba grif kä avorong á hungû. Azi mba wala an le wa kangû. 10 Kayam ang ngom wa zla manda ki ve tad’a, an mi, an mba ni ngomong ata yima kuka mba d’i mba yam suma kur duniyad’a pet á kuk suma a nga kaka yam andagad’ina. 11 An nga mba atogo zak, ang ngom vama ang nga ki na, ar sa mi prut wurak manga d’i. 12 Sama kus ayînina, an mba ni mbud’um gafa kur gonga hAbun Alonid’a, mam mba mi nde woi abu d’i. An mba ni b’ir simiyê Alo mana ki simiyê azina hAlo manina, nala, Jerusalem mba awili d’a nga d’i tcholï akulo gen Alo mana d’a nga d’i tchugï aset kä d’a. An mba ni b’ir simi ma awili ma an nga ki na atam mi.
13 Sama nga ki humbina, ar mi hum vama Muzu’â hAlonina nga mi dum mi Tokina.
Zla d’a mi dat mi Tok ka Lawodise-d’id’a
14 Ang b’ir mbaktumba mi malaika ma nga yam Tok ka Lawodise-d’ina.
Wana nahle suma ma Amin ma glangâs ma d’engzeng ma gagazi ma nad’u tinda hahlena pet suma Alona mi lazina mi dazina: 15 An wahlena pet suma ang lazina. An we ang nga ab’lenga d’uo mi na, ang nga akud’a d’uo mi. An min ang ka’î ab’lenga d’oze akud’a. 16 Kayam angî aku d’a lulumur, nala, zala d’oze ab’lenga d’uo mi. Kayam ndata, an mba ni vining ngei avunanu. 17 Ang nga dala: An ni sama ndjondjoîna, an nga kahlena pet, va kid’agan nga d’i. Wani ang we nga d’ala angî sama amangeî ma hawa ya’â angî ma houd’a angî ma gandilad’a angî ma duka mi d’a d’uo! 18 Kayam ndata, an nga ni dangû, ar ang gus lor man nda a yorot kakud’id’a tala ang mbut sama ndjondjoîna d’a. Ang gus baru d’a hapa tala ang tchugut atang ang ngei zulo mang ma gandilad’a mi d’a. Ang gus kuma ma ira, ang gum irang kayam ang we woi tetet. 19 Suma an nga ni le kazina pet, an nga ni ngoboziya, an nga ni gad’azi mi. Kayam ndata, ar ang b’at tang á mbut hurung yam tcho manga. 20 Ar ang huma! An nga ni tchola avun gonga, nga ni dap vun gonga. Le sana mi humun delen mi malan vuna ni, an mba ni kal avo hatamu, an mba ni te ki sed’emu, mam mba mi te ki sed’en mi. 21 Suma kus ayînina, an mba ni hazi yima kaka ki sed’en yam zlam man nda amula d’igi an tanda ni kus ayîna an nga kaka gen Abun yam zlam mam mba amula na mi.
22 Sama nga ki humbina, ar mi hum vama Muzu’â hAlonina nga mi dum mi Tokina.
© Azumeina Bible © Alliance Biblique du Tchad, 1999.
