Sun nda atchap pa Samson mi lat avok kikidjid’a
1 Samson mi i Timna, mi we gor atchad’a aduk suma Filistê-na. 2 Ata yima mam hulong avona, mi de mabum azi kasum ala: An weï gor atchad’a aduk gro arop suma Filistê-na; agi vandjiya!
3 Abum azi kasum a dum ala: Na ni gro aropma a nga aduk b’oziyongâ grozina d’oze aduk sum meina ka hî d’uo ba, ang i veï atchad’a aduk suma Filistê suma bei ngat bayâd’a zu?
Samson mi de mabum ala: Ang vandjiya, kayam ti nde iran heî!
4 Abum azi kasum a we nga d’ala ni Ma didina ba, mi lahle ndazina d’a d’i. Kayam Samson mi halî lovota á tchol huneîd’a ki suma Filistê-na. Kur atchogoi ndata suma Filistê-na a nga te yam Israel-lâ.
5 Samson mi i kabum azi kasum Timna. Kid’a a mbaza aduk guguzlud’a hi suma Timna-nid’a, atogo hina zak azlo ma azongâ mi ndeï ata Samson. 6 Muzu’â hi Ma didinina mi kak yam Samson. Va nga abom mbi, mi pau azlo ma azong máma woi d’igi sana mi pau gor ahu b’ëna woi na. Mi de nga abum azi kasum yam vama mam luma d’i. 7 Mi i yo siretna ki gor atcha ndata. Tam lum djivid’a heî kad’u. 8 Bugol burâ tcha, mi hulong Timna á vad’u, mi d’es á gol har ra azlo máma. Gol wani, se ayuma mi nga kur har ra azlona. Mi ve mbulâ, 9 mi pad’am abomu, nga mi tum ira glovoyo. Kid’a mi mbaza gen abum azi kasumba, mi haziziya. Azi tumu, wani mi dazi nga ala mam pad’amï ni kur har ra azlona d’i.
Samson mi de zla d’a d’ogola mi suma Filistê-na
10 Samson abum mi i avo hi gor atcha ndata, Samson mi le te ma luna kua d’igi gro azungeîna a nga le na. 11 Ata yima suma Filistê-na a wuma, a man ndrom azungeîna dok hindi ala a kak ki sed’emu.
12 Samson mi dazi ala: An nga ni dagi zla d’a d’ogola tu! Le agi vandji ad’ut tei kur bur ma kid’iziya ma lü ma wana ni, an mba ni hagi baru d’a luluîd’a dok hindi mi na ki baru d’a le vun tilâ dok hindi mi. 13 Wani le agi ndagagi nga á vandji ad’ut tei d’uo ni, ni agi ba, mba han ndi baru d’a luluîd’a dok hindi ki baru d’a le vun tilâ dok hindi mi.
A dum ala: Ang deï zla mang nga d’ogol ndata; ami humud’u!
14 Mi dazi ala:
Vama nga mi mut ahlenina,
tena ndeï kurumu;
vama ad’engâ,
vama adjib’etna mi ndeï kurum mi.
Va máma ni me ge?
A le burâ hindi bei a vum ad’u zla ndata woi ba.
15 Kur bur ma kid’iziyana, a de matchad’a hi Samson-nda ala: Ndak lop ndjuvuk lolop ba, mi vami ad’u zla d’a d’ogol ndata woyo. Le d’uo ni, ami ngalak kei ki suma habu’â pet. Agi yami ka hî ná yomi ahligiyemi zu?
16 Samson amamba ti nde tchina kamu, ti dum ala: Ang hurung van nga d’i! Ang nga le kan ndi! Ang de zla d’a d’ogola mi simiyên grozina, ang vandji ad’ut ti!
Wani mi hulong dat ala: An vat nga ad’ut mabun azi kasun nduo mi na. Ni nana ba, an vaksi ad’ut mi ndak ke?
17 Kur bur ma kid’iziya ma vun tilâ nga d’i tchi kam burâ ki burâ. Kur bur ma kid’iziyana mi vat ad’u zla d’a d’ogol ndata, kayam ti ndagam heî. Ti i vat ad’ut mi simiyêt grozina. 18 Kur bur ma kid’iziyana, kid’a afata bei nikid’a, suma hur azina a de mi Samson ala:
Vama kal ayuma kadjib’etina ni me ge?
Vama kal azlona kad’engina ni me ge?
Mi dazi kua ala: Ladjï agi zumugi kamuhl man nda weid’a d’uo ni, agi ndak á van ad’u zla d’a d’ogol ndata woi d’i.
19 Muzu’â hi Ma didinina mi mba kak kamu. Mi i Askalon, mi tchi suma dok hindi, mi yoï baru mazi ma lü vun tilâ, mi mba mi hum mi suma a vum ad’u zla d’a d’ogola woina. Hurum zal ngola, mi hulong avo habumu. 20 Azi vatchad’a hi Samson ndata, a hat mi banam ma kokodjona.
© Azumeina Bible © Alliance Biblique du Tchad, 1999.
