2 Amuleina 21 - Azumeina Bible 1999 (MPG)

Manase mi tamula yam Juda-na

1 Kid’a Manase mi kak amulid’a, bizamî dogo yam mbà. Mi tamula avo Jerusalem bizad’a dok vahl yam vahl. Asum a yat ala Hefsiba. 2 Mi le sun nda tchod’a avok Ma didina, mi tit ni yam sun nda ndjendje d’a lara ge pet ta andjaf suma Ma didina mi digizi woi adjeu avok yam andagad’a á ar yina mi Israel-lîd’a. 3 Mi hulong mi min yima nding ma teteng ma kud’or filei ma abum Ezekiyas mi tom mbeina akulo. Mi min yima ngal ahle suma ngat buzuna teteng á kud’or alo ma a yuma ala Bäl-lâ, mi pagu ma murgulina malo d’a a yat ala Asera-d’a d’igi Ahap amul ma Israel-lâ mi ladjeu na, mi nga mi grif kä avok ahle suma akulona, nga mi kud’urozi mi. 4 Mi min yima ngal ahle suma ngat buzuna teteng á kud’or fileina kur gong nga kud’ora hi Ma didina d’a Ma didina mi de kat ala: Ni kur Jerusalem ba, simiyên mba mi kak kua d’a. 5 Manase mi min yima ngal ahle suma ngat buzu ma dingâ teteng mahle suma akulona kur atrang nga mbà d’a avun gong nga kud’ora hi Ma didinid’id’a. 6 Mi he goroma vama ngat buzu ma ngala, mi vandjaf kumana teteng, mi nga mi djop fileina, mi tin suma a djop ki suma azulei suma a nga de zlad’a yam vama nga mbana mi, mi le sun da tchod’a ngola avok Ma didina á zalam hurumu. 7 Mi tin alo d’a a yat ala Asera d’a mam minita kur gong nga kud’ora hi Ma didina d’a mam de mi David azi ki goroma Salomon kat ala: Ni kur gong nga avo Jerusalem mba an manat aduk andjafâ hi Israel-lîna peta ba, simiyên mba mi kak kua gak didinu d’a. 8 Le Israel-lâ a ngom vun ma he mana ki gat man nda pet ta azong mana Moise mi hazizid’a ni, an mba ni walazi woi dei kandaga d’a an hat mabuyozi ngolod’a d’i.

9 Wani suma Juda-na a ge nga yazi kä ad’u Ma didina d’i. Wani Manase mi zut suma kua á le tchod’a kal andjaf suma Ma didina mi dabazi woi tchid’a avok Israel-lîna.

10 Kayam ndata, Ma didina mi de mazungeî mam suma djok vuna ala a de mi suma ala: 11 Manase amul ma Juda-na mi le sun nda ndjendje ngola, mi le sun nda tchod’a kal suma Amor suma avoroma, mi zut suma Juda-na á le tchod’a ki filei mam ma led’a mi. 12 Ni kayam ndata ba, Ma didina Alona hi Israel-lîna mi dala: An mba ni mba ki ndaka ngola yam suma Jerusalem-ma ki suma Juda-na pet tala sama lara ma mba mi humutna mba d’i ngelem humam mbei megegu d’a. 13 An mba ni b’lak Jerusalem mbei d’igi an b’lak Samari ki suma avo hi Ahap-ma woi na, an mba ni set Jerusalem mbei d’igi sana mi set hur tazana mi hulong mi kulubum kä na mi. 14 An mba ni noî man suma a arâ woyo, an mba ni hazi abo mazi suma djangûna, a mba hurumuziya, a mba yozi ahle mazina pet mi. 15 An mba ni le hina kayam a le sun nda tchod’a avoronu, a zalan hurun ni kur bur ma an buzugï abuyozi ngolo woi kur ambas sa Ezipte-d’a dei gak ini.

16 Manase mi tchi suma bei zlad’a kazina ngola, gak azì ma Jerusalem-ma mi oî ki buzuna, bei de zla d’a tcho d’a mam lat avo Juda-d’a ki sun nda tcho d’a mam lat avok Ma didinid’a ba.

17 Sunda hi Manase d’a ara kahle suma mi lazina pet ki tcho d’a mi he tam kat á lata mi a b’irizi nga kä kur Mbaktum mba de zlad’a yam Sunda hAmulei suma Juda-nid’a.

18 Manase mi mit mi i azulei kä ad’u abuyom ngolo. A tozom kur asinem ma nga hur aziyam ma amula ma a yum ala asinena hi Uza-na na. Goroma Amon mi vrak tamula blangâmu.

Amon mi tamula yam Juda-na

(Gol 2 Sun hAm 33.21-25)

19 Kid’a Amon mi kak amulid’a, bizamî dok mbà yam mbà. Mi tamula avo Jerusalem bizad’a mbà. Asum a yat ala Mesulemet ni Harus goromba ni d’a Jotpa-d’a. 20 Amon mi le sun nda tchod’a avok Ma didina d’igi abum Manase na d’ei. 21 Mi tit ni kur lovot ta abum mi hlata, mi kud’or filei ma abum kud’uroma, mi grif kä avorom mi. 22 Mi tit nga kur lovota hi Ma didinid’a d’i, wani mi ar Ma didina Alona habuyom ngolona woyo.

23 Azungeîna hi Amon-na a ndjak vunazi kamu, a tchum kur aziyamu. 24 Wani suma Juda-na a tchi suma a ndjak vunazi yam amulîna woyo, a man goroma Josiyas, a tinim amula balum abumu.

25 Sunda hi Amon nda ara kahle suma mi lazina, a b’irizi nga kä kur Mbaktum mba de zlad’a yam Sunda hAmulei suma Juda-nid’a.

26 A tozom kur zul mamba kur asinena hi Uza-na. Goroma Josiyas mi vrak tamula blangâmu.