HE D’A HAWA D’A YAM KRETIYÊ SUMA JUDE-NID’A
He d’a hawad’a mAlona d’a bei djib’erid’a
1 B’oziyona, ami min agi wagi ni nana ba, Tok ka teteng nga yam ambas sa Maseduwan-nda nga d’i tak sumad’a hAlonid’a woi abu ge. 2 Azi nga kur kuka ngola; hina pî, azi nga le furîd’a ngola. Azi ni suma houd’a pî, a he he d’a hawad’a ngola. 3 An nga ni le glangâsâ kazi ala azi he ndak ata ad’eng mazid’a, wani a he kal yam ad’eng mazid’a mi. Kur min mazid’a azi tchenemi ngola ala 4 ami hazi lovota á zlap darigïd’a ki suma a nga ndjun suma hAlona suma a nga kur ambas sa Jude-d’ina. 5 Azi he kal yam vama ami tinimi hurumi kama, kayam azi he tazi mi Salad’a avogo, bugola, a he tazi mi ami kur minda hAlonid’a mi.
6 Tit mi tin ad’ud’a á zud’ugi á he he d’a hawad’a ngola. Kayam ndata, ami tchenem ala mi i avogovok kuru, mi ndjunugi á ndak vun sun nda djivi ndata mi. 7 Agi ndagagi yam ahlena pet, kur he gagazid’a, kur zla d’a ded’a ki wed’a ki zlezleûd’a ki o d’a agi nga lat kamid’a. Kayam ndata, ar agi igi avogovok kur sun nda suma ndata mi.
8 An de hina, an hagi ni vuna d’i, wani an de ni yam zlezleûd’a hi suma dingîd’a. An min kuk o magid’a, na ni ni o d’a gagazid’a ko zu? 9 Kayam agi wagi sumad’a hi Saleina Jesus Christ-sa. Mam mi sama ndjondjoîna pî, mi mbut sama houd’a kayam agiya, kayam agi mbud’ugi suma ndjondjoîna yam hou mamba.
10 Kayam ndata, an nga ni dagi djib’er ra kurunda. Djivid’a agi lagi sun nda agi tinit ad’ut adjeu á led’a kur biza d’a gadjumbid’a, d’igi agi minigi á led’a na, agi ndagat vunat mi. 11 Wani ki tchetchemba, ar agi ndagagi vun sun nda agi tinit ad’ut á led’a kur min magid’id’a, ar agi lagi ndak yam vama nga abogina. 12 Le sana mi min he vama nga aboma kur min mamba ni, ni he d’a hawa d’a Alona mi minita, nga ni vama nga abom mbuo na d’i.
13 An de hina ná hlaneka woi yam suma dingâ, ná ar aneka kagiya d’i, wani kayam agi ndjagagi abo tagi tu. 14 Wani ki tchetchemba, agi ni suma a nga kahlenina. Kayam ndata, ar agi ndjunugi suma a nga kur kid’akina. Le fata agi tagi nga kur kid’aka ni, azi mba ndjunugi kahle mazina mi. Hina wani, agi mba ndjagagi abo tagi tu. 15 D’igi mbaktumba hAlonid’a ti de na ala:
Sama mi yo ngolina, mi fe nga ngola kal li;
sama mi yo akid’eid’ina, mi kid’ak nga kam mbuo mi.
Tit azi ki ndroma
16 Ami lami mersi mAlona, kayam mi mal lovota mi Tit á hat hurum kagi d’igi ami na mi. 17 Mi hum tchen mamid’a, tam mbi lum zlezleû á ndjunugiya. Kayam ndata, mi tchol mi iza hatagi kur min mamba. 18 Ami nga sunumi wiyei ma Toka pet nga d’i yorom kayam wal mam mba tchid’a yam Zla d’a Djivid’ina zlapa ki Tit mi. 19 Wani kayam ndata go d’i, wani Tok ka tetenga ti manam á tit zlapa ki sed’emiya. Hina mi mba mi ndjunumi á b’rau he d’a hawa d’a suma ndata yam subura hi Salad’id’a, á tak kei abu ala ami minimi á ndjun b’oziyoi suma a nga kur kid’akina mi.
20 Ami lami hina kayam sa fe yina á tchol ki zla d’a yam lovot ta ami nga b’rawami he d’a hawa d’a ngol ndatid’a d’i. 21 Kayam ami min á lami ahle suma djivina navok Salad’a go d’i, wani avok suma mi.
22 Kayam ndata, ami sunumi wiyei ma ami kugum yami ablaud’ina ki sed’eziya. Ami wum mam nga hat hurum ngola, wani ki tchetchemba, nga mi hat hurum ngola kala, kayam mam tin hurum ngola kagiya. 23 Tit ni ndran ma sunda á ndjunugiya. B’oziyoi suma ding suma a tit ki sed’emina ni suma Tok ka tetenga ti sunuzina. Sum ndazina a nga subur Christ kur sun mazi d’a led’a mi. 24 Ar agi tagazi woi ala agi lagi kazi gagazi, kayam Toka pet mba d’i wala subur ra ami suburumi tami kagid’a ni hawa d’i.
© Azumeina Bible © Alliance Biblique du Tchad, 1999.
