David tin hurum yam Ma didina
1 Ni sawal la David mi hlat mi hat mi ma ngolâ hi suma hle sawalina.
Ma didina ni ma an ngei tan atama.
Ni nana ba, agi dan ala:
Ang pir i yam ahuniyô mangâ d’igi aleina na ge?
2 Gola! Suma asa’atna a nga gan yeû mazid’a,
a nga tinit irat ata ziyot
á yet suma d’ingêrâ kur nduvunda.
3 Le gat ta djivid’a hi simiyeîd’a b’lak keyo ni,
sama d’ingêrâ mba mi le ni nana ge?
4 Ma didina mi nga kaka kur gong mam mba kud’ora;
zlam mam mba amula sä tinda akulo.
Mi nga mi gol suma yam andagad’ina,
mi nga mi wahle suma azi nga lazina.
5 Ma didina nga mi hal hur sama d’ingêrâ,
wani nga mi noî ma asa’atna
ki ma mi min murud’umba heîna woyo.
6 Ma didina nga mi yagï gordjona
kakud’a ki sufred’a yam suma asa’atna,
nga mi gad’azi ki babar ma bibi’â;
wana ni b’rau d’a mi ngazizi kazid’a.
7 Ma didina ni ma d’ingêrâ,
mi min ni sun nda d’ingêra mi;
suma d’ingêrâ a mba wum iram mi.
© Azumeina Bible © Alliance Biblique du Tchad, 1999.
