Ma didina mi mbut tamî d’igi ma djangûna na kur Jerusalem
1 Alë! Ni nana ba, Salad’a kur ayî mama
mi zlup gor wei d’a Siyon-nda kä ki d’ugula ge?
Mi geï subura hi Israel-lîd’a akulo dei
gak ti nde kä yam andagad’a.
Kur ayî mama mi djib’er nga d’ala
ndat ni vama d’igal asema d’a d’i.
2 Salad’a mi b’lak yima kaka hi suma hi Jakob-ma woi
bei mi wum hohowom ba.
Kur ayî mama mi to azì ma nglo ma ad’eng ma ngunguna
hi Juda-na woyo,
mi tom kä woi andaga,
mi mbut leud’a zulona ki mat suma nglona pet mi.
3 Kur ayî mam ma bibiliuna,
mi kus ad’enga hi Israel-lîd’a woi pet.
Ata yima mazi ma djangûna mi mbana,
mi arazi bei ndjunda.
Mi do akud’a ata suma hi Jakob-ma,
ti ngal yina ti nguyuzi woi d’uhl mi.
4 Mi ndir yeû mamba d’igi ma djangûna na,
mi zi abom ma ndjufâ woi d’igi ma tchi suma na,
mi b’lak ahle suma djivid’a á golina woi pet,
mi do ayî mama d’igi akud’a na ata Jerusalem.
5 Salad’a mi mbut tam d’igi ma djangûna hi Israel-lîna na,
mi b’lak Israel-lâ woyo,
mi b’lak azì mazi ma nglo ma amula woyo,
mi b’lak azì mazi ma ad’eng ma ngunguna woyo,
mi zul tchina ki zam tad’a avo Juda.
6 Mi hô kangâ mama woi kad’enga
d’igi kangâ ma a gum yam asinenina na,
mi b’lak yi mam ma toka woyo.
Ma didina mi zut suma kur Siyon-na á mar
yam tok ka vun tilâ ki bur ma sabatna.
Kur hur mam ma zala,
mi hamulâ ki ma ngat buzuna abo suma á lazi ndaka.
7 Salad’a mi gol yi mam ma ngal ahle suma ngat buzuna is,
mi noî yi mam ma a tinim iram vama woyo,
mi he gulumun ma amula hi Siyon-na abo ma djangûna.
Suma djangûna a nga siwel kur gong mamba
d’igi suma a siwel adjeu kur bur ma vun tilâ na.
8 Ma didina mi nga hurum á b’lak
gulumun ma Jerusalem-ma woyo,
mi yo ziyo ma nga ahlena, mi ngamu,
mi hle nga abom mbei bei mi b’lagam mbei d’i.
Mi mbut gulumuna ki gong nga ndjol la kamba
d’igi suma a nga tchi horîna na,
mi b’lagazi woi ki zla tazi djak.
9 Bap mat ma avun agre’îna mi rot kä andaga,
mi b’lak keyo.
Kawei ma murguli ma atama mi kus seyo.
Amul matna ki mat suma nglona a yozi
a izi aduk andjaf suma dingâ.
Suma a hat gatina nga d’uo d’a.
Mat suma djok vuna pî,
Ma didina nga mi ndazi va irazi woi d’uo mi.
10 Suma nglo suma Jerusalem-ma
a kak nga kä aduk andagad’a ki vunazi ma du’â,
a nga ko andagad’a kaziya,
a tchuk baru ma ndjondjorona ataziya.
Yugunei suma Jerusalem-ma
a tchok yazi kä andaga mi.
*
11 Iran ndi zal abo simina,
aruwad’an nga mi mbuzuk kurun dudu,
mayâwan nga mi vo kä woi yam andagad’a
yam b’laka hi sum manid’a,
yam gugureina ki kem mba tchapona
suma a nga seî kä ir palumba hazinid’ina.
12 A nga de masuyozi ala:
Ei fei tena ki süm guguzlud’a ni lara ge?
A nga lá seîd’a kä ir palumba hazinid’a
d’igi suma a fe dakina na,
a nga bo akulo aduk asuyozi mi.
*
13 Ndak gor weid’a Jerusalem,
an dak ana ge?
An mba ni nga’î ki nge ge?
Ndak gor wei d’a Siyon nda bei ngaf ki mandjuf ba d’a,
an mba ni nga’î ki nge ba
á b’lengêk huruk ke?
Kayam mbil ma’â mi ngola d’igi alum ma ngolâ na.
Ni nge ba, ndak á tchiliksi ge?
14 Mak suma djok vuna,
ahle suma a nde tazi woi irazina
nahle suma ka zlad’a, nahle suma hawa ya’â.
A nga vak ad’u tcho maka woi d’i.
Ladjï a le na ni, a d’elek wa bei i magomba.
Ahle suma a nde tazi irazi
suma azi nga vaksi ad’uzina
ni zla d’a hawa yak ka ka zlad’a.
15 Suma a nga kalâ pet a nga tchabozi kagu,
a nga tchi kukurup,
a nga kidjik yazi kak ndak gor weid’a Jerusalem,
a nga dala: Wana nazì ma ngol ma a yum ala
Ma djif ma kal tegles mala
ni Furîd’a hi suma yam andagad’a petna na ko zu?
16 Mak suma djangûna pet a nga mal vunazi
á dak zla d’a tchod’a,
a mba tchi feta, a mba et siyazi a dala:
Ei b’lagat wa!
Gagazi, wana ni bur ma ei tini huri kama!
Ei mbei wa kuru, ei weizi wa mi!
17 Ma didina mi ndak wa vun zla
d’a mam ngat kurum adjeud’a,
mi ndak wa vun zla
d’a mam he vuna kat adjeu dedeid’a,
mi b’lagak kei bei mi wak hohowok ba,
mi mbud’uk vama furîd’a hi ma djangûnina,
mi had’enga mi suma a lak murud’umbina mi.
*
18 Ndak Jerusalem, ndak i gen Salad’a,
ndak tchiya, ndak zam tagu.
Ar simi ma’â mi djang kä
d’igi toliyonda na andjege ki faleya,
ar ndak tuk tak ki,
ar ndak ba tchi ma’â d’uo mi.
19 Ndak tchol akulo, ndak tchi wulula
kad’u tinda hi ma ndjol ma avok kikidji ma andjegena,
ndak de zla d’a kuruka woi avok Salad’a,
ndak yo abok akulo avorom ki tchen nda labiyad’a
yam grok suma a nga seî kä
ir palumba abo meid’a tetengâ.
*
20 Ma didina, ang gola,
ang we suma ang nga djobozi vunazina!
Na ni djivid’a á aropma a mut grozi suma kuruzi
suma azi huruzi vazi heîna zu?
Na ni djivid’a á tchi suma ngat buzuna ki suma djok vuna
kur gonga hi ang Salad’a d’a a tinit irat vata zu?
21 Suma awâna ki momorogeina
a puk kä andaga ir palumba,
yugunei man suma bei ngaf kandjofâ ba na kazungeî mana
a puk kä abo mbigeu d’a fiyaka.
Ang tchazi kur bur ma ayî mangâ,
ang ngad’azi woi bei wazi hohowozi ba.
22 Ang yï ahle suma a mbud’un mandarîna kan ata yina pet
d’igi suma a yi tazi kur bur ma vun tilâ na.
Ma didina, kur bur ma ayî mangâ
sama sut nga d’oze sama prut tei nga d’i.
Gugurei suma an wuluzi ni le kazi heîna,
man ma djangûna mi dabazi woyo.
© Azumeina Bible © Alliance Biblique du Tchad, 1999.
