Amnon mi b’lak Tamar
1 Bugol ahle ndazina, ahle suma lena ba wana: Apsalom David goroma wiyemba nga, ti djif heî, a yat ala Tamar. Amnon David gorom ma dingâ hurum vat heî. 2 Amnon nga mi tcha tatâ yam wiyemba Tamar, gak mi ve tam tugud’eid’a kad’u. Kayam ndat ni gor wei d’a bei zlap ki mandjufîd’a, ad’enga heî ki Amnon á ngaf ki sed’ed’u. 3 Wani Amnon banama nga, a yum ala Jonadap, ni Samma ma David wiyemina goroma. Mi ni sama we zlad’a heîna. 4 Jonadap mi djobom ala: Ni kayam me ba, ang mala namulâ goromina ko ba, ki burâ kaf ang nde yorogo tang tchuka hina susub’ok ke? Ang dan nduo zu?
Amnon mi hulong dum ala: Hurun ve Tamar wiyena Apsalom wiyemba.
5 Jonadap mi dum ala: Ang ve tang tugud’eid’a, ang i bur kä yam azang mangâ. Le abung mi mba á d’ungû ni, ang dum ala: Ang ar wiyenda Tamar ti mbei d’i lan tena avoron ka hî, kayam an ni vum abot ni tumu.
6 Amnon mi ve tam tugud’eid’a, mi bur kä. Amulâ mi mba á d’umu. Amnon mi dum ala: An nga ni tchenengû, ang ar wiyenda Tamar ti mba d’i lan woîna mbà avoron kä, an tum abod’u.
7 David mi de mi Tamar avo hatat ala: Ndak i avo hi wiye’â Amnon, ndak lum tena.
8 Tamar ti i avo hi wiyetna Amnon. Mi nga burâ kä. Ti yo afuta, ti tib’eged’u, ti ge woîna iram kä. 9 Ti hlum ki vama ge woîna, ti komzi avorom kä, wani Amnon mi min te woîna d’i. Mi he vuna ala: Ar suma pet a buzuk kei avo hatanu. Suma pet a buzuk kei avo hatam mi.
10 Ata yi máma Amnon mi de mi Tamar ala: Ndak mbeye ni tena klaviya, an tum abogu. Tamar ti hle woîna, ti im mi wiyetna Amnon klaviya. 11 Ata yima nga d’i hum tenina, mi vat del abod’u, mi dat ala: Wiyenda, ndak mbeï an bur ki sed’egu!
12 Tamar ti dum ala: Wiyena, nga na d’i! Ang lan zla d’a zulo d’a na d’a atan ndi. A nga lahle suma hina na aduk Israel-lâ d’i. Ang le zla d’a lili d’a hina d’a d’i. 13 An mba ni i ni lara ki zulo mana ge? Ang mba mbut ni d’igi sama lilid’a na aduk Israel-lâ. Ki tchetchemba, ang i de mamulâ; mi mba mi d’elen bei han mi ang ngi.
14 Wani Amnon mi min hum zla mata d’i. Mi vad’u, mi bur ki sed’et kad’enga. 15 Ata yi máma Amnon mi noyôt ni noî d’a tchod’a kal ve d’a mam hurum vat avoka. Mi dat ala: Ndak tchol iya!
16 Ti dum ala: Nga na d’i! Dik ka ang digin wanda kal tcho d’a ang landji wanda. 17 Wani mi min humut ti, mi yï azong mam ma sunda, mi dum ala: Ang dik sä atcha ndata woi gevenu, ang gat sä woi abua, ang dugï vuna akulo blogod’u!
18 Ti tchu’î baru d’a ngol la d’udjo d’a ndjugurîd’a atad’u. Ni baru d’a amulâ grom suma yuguneina a tchugut atazid’a. Azongâ hi Amnon-na, mi digit tei abua, mi duk vuna akulo blogod’u. 19 Tamar ti ko butna kad’u, ti haû barud’a woi atad’u, ti tchuk abot kat nga d’i i ki tchina.
20 Wiyetna Apsalom mi djobot ala: Wiye’â Amnon mi bur ki sed’ek su? Ki tchetchemba, wiyenda, ndak ba vunagu; mi ni wiye’â. Ndak ve zla ndata kuruk ngol li.
Ni hina ba, Tamar kur zulo matna, ti ar kaka avo hi wiyetna Apsalom. 21 Amulâ David mi hum zla ndata pet, hurum zal ngola. 22 Apsalom mi de nga zla tu mi Amnon ndi, wani mi vum kurum ngola kayam mi b’lagam wiyemba Tamar.
Apsalom mi tchi wiyema Amnon ndeyo, mi ringâ
23 Bugol zla ndata a le bizad’a mbà, Apsalom mi i tchau tumiyô mama sä Bäl-Hasor go ki Efraim, mi yi amulâ groma pet mi.
24 Apsalom mi i gen amulâ, mi dum ala: Gola! An azong mangâ nga ni i tchau tumiyô mana. Ar ang kazungeî mangâ, agi mbagi avo hatan an azong mangâ.
25 Amulâ mi de mi Apsalom ala: Gorona, nga na d’i! Ami imi pet, ti tala ami mbud’umi vama ane’â kangû d’a. Apsalom mi lum baba ko, amulâ mi min i d’i, wani mi b’am vuna kamu.
26 Apsalom mi dum ala: Le ni me pî ni, ang ar wiyena Amnon mi i ki sed’emiya.
Amulâ mi hulong dum ala: Ni kayam me ba, mi i avo hatang nge? 27 Wani Apsalom mi lum baba; amulâ mi ar Amnon ki grom suma dingâ a iya.
28 Apsalom mi he vuna mazungeî mama ala: Agi tinigi iragi yam Amnon ped’et. Le mi nde wa le furîd’a ki süm guguzlud’a, le an dagi ala: Agi tchumu ni, agi tchum mbeyo! Agi lagi mandar ri. Ni an ba ni hagi vuna d’uo zu? Vagi tagi ad’enga, kagagi nandjofâ!
29 Azungeîna hi Apsalom-ma a le d’igi Apsalom mi hazi vuna na, a tchi Amnon. Ata yi máma amulâ groma pet a tchola, nge nge pî mi nga yam koro ma akulum ma akulum mama, mi ringâ.
30 Kid’a a nga glovot tua d’a, vuna mba mi fe David ala: Apsalom mi tchi wa grongâ pepet. Sa tu pî mi ar nga d’i! 31 Amulâ mi tchola, mi haû baru mama woi atamu, mi ge tam kä andaga. Azungeî mama pet a haû baru mazina woi atazi mi.
32 Jonadap Samma ma David wiyemina goroma, mi de zlad’a mi David ala: Ar ang dala a tchi wa grongâ ped’u d’i; a tchi ni Amnon tu. Ni vama Apsalom ngam kurum avok dedei kur bur ma Amnon mi b’lak wiyemba Tamar kad’engina. 33 Ki tchetchemba, salana, amul mana, ar ang ve zla ndata kurung tala a tchi wa grongâ ped’u d’a d’i; a tchi ni Amnon tu go.
34 Wani Apsalom mi ringâ.
Gor azong ma a tinim á ndjolina, mi bong iram akulo, mi gol yina. Gol wani, suma ablaud’a nunuk a nga djï kur lovot ta Horonayim-mba gen ahinad’a. 35 Jonadap mi de mamulâ ala: Gola! Grongâ a djï wan nduo zu? Ni d’igi an azong mangâ ni dang kä na d’uo zu? 36 Ata yima Jonadap vunam dap zla d’a ded’ina, amulâ groma a mba, a tum tchina bü; amulâ kazungeî mama pet, simina nga mi djang irazi kä zuzuk.
37 Apsalom mi fak ringâ, mi i avo hi Talmai Amihut amul ma Gesur-râ goroma. David nga mi tchi horâ goroma Amnon kur burâ kaf. 38 Kid’a Apsalom mi ring Gesur-ra, mi kak sä kua bizad’a hindi. 39 Wani amulâ David mi ar Apsalom bei hala, kayam hurum b’leng yam matna hi Amnon-na.
© Azumeina Bible © Alliance Biblique du Tchad, 1999.
