Israel-lâ a hle Jeriko
1 Suma Jeriko-na a duk vun agre’â akulo abo Israel-lâ. Sa nga mi fe lovota á nde woi abu d’i, sa nga mi fe lovota á kal avo d’uo mi. 2 Ma didina mi de mi Josue ala: Gola! An hang wa azì ma ngol ma Jeriko-na kamul mama ki mam suma a we durîna abongû. 3 Ang ki suma dur ayîna pet, agi nguyugi azina. Burâ tu agi nguyugi azina yagi tu, hina hina, gak burâ karagaya. 4 Suma ngat buzuna kid’iziya a yo aduvei gamlâna kid’iziya aboziya, a kal avok zandu’â. Kur bur ma kid’iziyana, agi nguyugi azina ngungui yagi kid’iziya. Ata yi máma suma ngat buzuna a bu aduveina. 5 Le agi humugiya wa aduveina tchina ni, azigarâ pet a tum sora ki delezi akulo. Ata yi máma, gulumuna hazì ma ngolîna mba mi dris kä katamu. Azigarâ a mba tchuk krovo, nge nge pî ata yima mi nga vorom kama.
6 Josue Nun goroma mi yi suma ngat buzuna, mi dazi ala: Agi hlagi zanduk ma vun ma djinda hi Ma didinina mi nga kuana, suma ngat buzuna adigagi kid’iziya a yo aduvei gamlâna kid’iziya, a kal avok zandu’â hi Ma didinina.
7 Bugola, mi de mi azigarâ ala: Agi i nguyugi azì ma ngolâ. Ar suma dur ayî suma hiuna a kal avok zandu’â hi Ma didinina.
8 A le d’igi Josue mi hazi vuna na. Suma ngat buzu suma kid’iziya suma a yo aduveinina, a kal avok zandu’â hi Ma didinina, a nga bu aduveina. Zandu’â hi Ma didina máma nga mi tit blogoziya. 9 Suma dur ayîna a nga tit avok suma ngat buzu suma a nga bu aduveinina. Azigar suma hiuna a nga tit bugol zandu’â. Azigarâ a nga tit ni yam bud’a haduveinid’a. 10 Josue mi he vuna mi azigarâ ala: Agi kagagi hina silil gak bur ma an hagi vuna ala: Agi tumugi sora na tua mbeî. 11 Bur tu azi nga ngui azì ma ngolâ ki zandu’â hi Ma didinina yazi tu, a hulong kur kangâ, a bur kä.
12 Josue mi tchol ki yorogo tcholola, suma ngat buzuna a hle zandu’â hi Ma didinina keleziya. 13 Suma ngat buzu suma kid’iziya suma a yo aduvei gamlânina a kal avok zandu’â hi Ma didinina, a nde tita, a nga bu aduveina. Azigar suma durâ a nga tit avoroziya, azigar suma hiuna a nga tit bugol zandu’â mi. Azigarâ a nga tit ni yam bud’a haduveinid’a mi. 14 Kur bur ma mbàna a ngui azì ma ngol máma yazi tu, a hulong kur kangâ. A le hina gagak burâ karagaya.
15 Kur bur ma kid’iziyana, a tchol ki yorogo tcholola, a ngui azì ma ngol máma ngungui yazi kid’iziya ata lovod’oziya. Ni kur bur ma tu máma ba, a ngui azì ma ngol máma ngungui yazi kid’iziya. 16 Dabid’a hi ngui d’a kid’iziyad’id’a, suma ngat buzuna a bu aduveina. Bugola, Josue mi de mi azigarâ ala: Agi tumugi sora, kayam Ma didina mi hagi wa azì ma ngol máma abogi da’! 17 Agi b’lagam mbei kahle suma kuruma pet, kayam azi nahle suma a tinizi irazi vazi mi Ma didinina. Ni Rahap pa gaulangâ hol ba, ei mba arat bei tchid’a ki suma a nga avo hatatna pet, kayam ndat ti ngei suma ei sunuzi adjeu á d’u yinina. 18 Wani agi gologi tagi djiviya, agi dogi abogi ata ahle suma Ma didina mi hagi vuna kazi á b’lagazi woina do ba, agi mbagi ki ndaka ki b’laka yam kangâ hi Israel-lîna d’i. 19 Bege d’a hapa ki lora kahle suma a lazi ki kawei ma hleunina d’oze suma a lazi ki kawei ma wuranina nahle suma a tinizi irazi vazi mi Ma didinina, a mba tchuguzi ni kur yi mam ma ngom ahlena.
20 Suma ngat buzuna a bu aduveina. Ata yima azigarâ a hum tchina haduveinina, a tum sora guguk. Gulumuna mi dris kä, azigar suma Israel-lâ a tchuk avo hur azina, nge nge pî ata yima mi nga vorom kama, a hlazì ma ngolâ. 21 A tchi ahle suma hur azinina woi pepet, nala, andjofâ, aropma, kemba, momorogeina, amuzleina, aho’â ki korona mi.
Josue mi ar Rahap bei tchid’a
22 Josue mi de mi suma mbà suma a i á d’u ambas sa Jeriko-d’a avo’â ala: Agi igi avo hi Rahap atcha d’a gaulangâ, agi ndad’ï woi abu ki sum matna pet d’igi agi gunut tagi na.
23 Azungeî suma mbà suma a i d’u yinina, a vei Rahap pei kabud’u, kasud’u, ki b’oziyotna, ki simiyêt pet tei abua, a i ngomozi woi bugol kangâ hi Israel-lîna ki halasa. 24 A ngal azì ma ngol máma woi kahle suma kuruma pet; a arî bege d’a hapa ki lora kahle suma a lazi ki kawei ma hleunina d’oze ahle suma a lazi ki kawei ma wuranina hol, a tchuguzi kur yima ngom ahlena hi Ma didinina. 25 Josue mi ar Rahap pa gaulangâ bei tchid’a ki sum matna pet. Ndat ti ar nga kaka aduk Israel-lâ gak ini, kayam ndat ti ngei suma Josue mi sunuzi á d’u Jeriko-na avo hatad’u.
26 Ata yi máma Josue mi dazi zlad’a kad’enga ki gun tad’a yam Jeriko ala:
Ar Ma didina mi ge sama mi min á min azì ma ngol ma Jeriko-na akulona vuna.
Mba mi gum ad’umî ki mad’a gorom ma ngolâ,
mba mi dugum vunam akulo ni ki mad’a gorom ma gorâ mi.
27 Ma didina mi nga ki Josue. Ni kayam ndata ba, simiyêm mi nde yina yam ambasa pet wana.
© Azumeina Bible © Alliance Biblique du Tchad, 1999.
