Azungeîna hAlonina
1 B’oziyona, an ndak á dagi zlad’a d’igi an nga ni dat mi suma a nga ki Muzu’â hAlonina na d’i. Wani an nga ni dagi ni d’igi agi ni suma duniyad’a na, d’igi gugurei suma a he gagazi d’a awilina na mi. 2 An hagi napona, an hagi nga navuna d’i, kayam agi ndagagi nga á tavuna d’i. Ki tchetchemba pî, agi ndagagi nga d’uo mi, 3 kayam agi nga mi tid’igi ni d’igi suma kur duniya d’a wandina tua na. Ki tchetchemba, yungôra ki huneîd’a a nga adigagiya. Kayam ndata, agi ni d’igi suma duniyad’a na, tit magid’a ni d’igi tita hi suma duniyad’ina na mi d’uo zu? 4 Le ma dingâ nga dala: An ni ma hi Paul-lâ, ma dingâ ala: An ni ma hi Apolos-sâ ni, agi ni d’igi suma duniyad’a na d’uo zu?
5 Apolos ni nge ge? An Paul ni nge ge? Ami nazungeîna hAlona suma agi hagi gagazid’a yam wal mazi d’a tchid’ina. Nge nge pî adigami nga mi ndak vun sun nda Salad’a mi humzi á led’id’a. 6 An ni ma ped’a, Apolos ni ma vo mbina kama, wani Alona ni ma wuluma. 7 Kayam ndata, sama ped’a ki ma vo mbina a ni va d’i, wani Alo ma ndak á wuluma ni va. 8 Sama ped’a ki ma vo mbina, azi ni tu. Nge nge pî, Alona mba mi wuragam yam sun mam mba mi lata. 9 Kayam ami nAlona ndrom suma sunda, agi nasinena hAlonina mi.
Agi ni gong nga minda hAlonid’a mi. 10 Yam he d’a hawa d’a Alona mi handjid’a, an le wa sunda d’igi ma d’al ma gäd’u gongina na. Wani ki tchetchemba, sama dingâ nga mi min kad’u. Wani ar nge nge pî, mi gol tam djivi ki min nda mam nga mi min akulo kata. 11 Kayam sana mi ndak á gäd’u gong nga ding ngi. Ad’u ge d’a gagazid’a ti nga da’, nala, ni Jesus Christ tamba. 12 Wani sama mi min katna, le ni ki lora, d’oze kawei ma hapma, d’oze ahina d’a guzut kal teglesa, d’oze aguna, d’oze asuna, d’oze kuzad’a ni, 13 sunda hi nge nge pî ad’ut mba d’i nde woi ni kur bur ma ka sariyad’a. Kur bur máma a mba ndat tei ni kakud’a, kayam akud’a mba d’i kuk sunda hi nge nge pî á tagat tei abua. 14 Le sunda hi sama mi min yam ad’u ge ndatina ti ngal nga woi d’uo ni, sa máma mba mi fe wuraka. 15 Wani sama sun mamba ti ngal leina, wurak mamba mba d’i ba atamu. Wani mam tamba mba mi sud’a, wani ni d’igi sama mi nde woi aduk akud’ina na.
16 Agi wagi nga d’ala agi ni gong nga kud’ora hAlona d’a Muzuk mama nga kaka kuruta d’uo zu? 17 Le sana mi b’lak gong ndata woyo ni, Alona mba mi b’lagam mbei mi, kayam gong ndata ni vama Alona mi tinim iram vama. Agi tagid’a ni gong mam ndata mi.
18 Ar sa mi lop tam mbi. Le sama ding adigagi mi djib’er ala mam mbut sama ned’a kur duniyad’a ka hî ni, ar mi mbut tam lilid’a kayam mam mbut sama ne ma gagazina. 19 Kayam ned’a kur duniyad’a ka hid’a ni lilid’a ir Alona. D’igi mbaktumba hAlonid’a ti de na ala: Alona mi vik suma ned’a ki lem mazid’a. 20 Ti de kua ala: Ma didina mi we djib’era hi suma ned’id’a ni vama hawana. 21 Kayam ndata, nga djivid’a sana mi subur tam yam sa d’i. Kayam ahlena pet ni magina. 22 Paul, Apolos ki Pierre, duniyad’a, arid’a ki matna, vama ka tchetchema ki vama nga mbana, azi pet ni magina. 23 Wani agi ni suma hi Christ-sâ, Christ tamba ni hAlonina mi.
© Azumeina Bible © Alliance Biblique du Tchad, 1999.
