Suma a deng tazi ata Ma didinina
1 Ni sawal la suma a djak Jerusalem á lü vun tilîna a hlata.
Suma a deng tazi ata Ma didinina,
azi ni d’igi ahina d’a Siyon
nda nga d’i giget tuo
d’a kaka hina ngingring gak didinda na.
2 Ma didina nga mi ngui sum mama kä,
ki tchetchemba gak didin
d’igi ahuniyôna a ngui Jerusalem kä na.
3 Ma te leu ma asa’atna mba mi te leud’a teteu
yam suma d’ingêrâ d’i
kayambala suma d’ingêrâ
a mbut suma le tchod’a d’uo d’a.
4 Ma didina, ang le djivid’a ki suma djivina,
ki suma huruzi tuna mi.
5 Wani suma a nga tit kur lovot ta gundina,
ang b’lagazi woi ki suma murud’umba.
Ar ang mba ki b’leng nga halasa yam Israel-lâ!
© Azumeina Bible © Alliance Biblique du Tchad, 1999.
