Ezekiyas mi yi Israel-lâ pet á le Pa’â
1 Ezekiyas mi tchuk sunda kur azì ma Israel-lâ kazì ma Juda-na pet, mi b’ir mbaktumba mi suma Efraim-ma ki suma hi Manase-na tala a mbeï kur gulumuna hi gong nga kud’ora hi Ma didinid’a avo Jerusalem á le vun til ma Pa’â á he ngola mi Ma didina Alona hi Israel-lîna d’a. 2 Amulâ ki mam suma nglo suma sunda kablau suma toka pet, a ndjak vunazi avo Jerusalem ala a le vun til ma Pa’â kur til ma mbàna. 3 Kayam azi ndak á lum kur bur ma a ngama d’i, kayam suma ngat buzu suma a mbut tazi yed’etna a nga ngol li, suma a tok nga avo Jerusalem mbuo mi. 4 Zla ndata lamulâ tam djivid’a kablau suma toka pet mi. 5 A he vuna ala a tchi wala kur azì ma Israel-lâ pet, a tinï ad’ud’a Berseba gak mba avo Dan, tala a mbeï Jerusalem á le vun til ma Pa’â á he ngola mi Ma didina Alona hi Israel-lîna d’a. Kayam suma a lum avo’â a nga ablaud’a d’igi a b’irim kur gata na d’i. 6 Suma a tchuguzi sundina a i ki mbaktum mba amulâ mi b’irit ki mam suma sundid’a kur azì ma Jerusalem-ma kazì ma Juda-na pet. Yam vun ma hed’a hamulîna, a de mi suma ala: Agi Israel suma sud’ugi woi avun ayîna abo amulei suma Asiri-nina, agi hulongôgï gen Ma didina Alona hi Abraham-ma, Alona hi Isa’â, Alona hi Israel-lîna. 7 Ar agi lagi d’igi abuyogi ki b’oziyogina a le sun nda ata yat tuo d’a avok Ma didina Alona habuyozi ngolona na ba, mi mbud’uzi vama hohoud’a avok suma d’igi agi nga wagi ini ki iragi na d’i. 8 Ki tchetchemba, ar agi lagi yam mba ad’enga d’igi abuyogi a lat na d’i, wani agi hagi tagi mi Ma didina, agi mbeyegi kur yi mam ma a tinim iram vam ma gak didina, agi lagi sunda mi Ma didina Alo magina tala kur ayî mam ma bibiliuna hurum vat tei kagiya d’a.
9 Le agi hulongôgï gen Ma didina ni, b’oziyogina ki grogi suma a yozi magombina a mba wazi hohowoziya, a mba hulongî kur ambas sa wanda. Kayam Ma didina Alo magina ni ma sumad’a, ni ma we hohou sumina. Le agi hulongôgi gevemu ni, mam mba mi hagi azigam mbi.
10 Suma a sunuzi ki mbaktumbina a nga i kur azì ma nglona teteng yam ambas sa Efraim-mba, yam ambas sa Manase-d’a, gak a mba yam ambas sa Zabulon-nda, wani a nga san ad’uziya, a nga lazazi mi. 11 Wani suma dingâ aduk suma hi Aser-râ, aduk suma hi Manase-na ki suma hi Zabulon-na a hulong yazi kä, a mbeï avo Jerusalem. 12 Alona mi le sunda ki suma Juda-na, mi hazi hur ma tuna á le sunda yam vun ma hed’a hamulîna ki ma hi mam suma nglo suma sundina d’igi Ma didina mi de na.
Ezekiyas mi le Pa’â
13 Kur til ma mbàna, suma ablaud’a a tok Jerusalem á le vun til ma a lum kavungô ma bei angufina. Suma a to’î tok ka ngola. 14 A tchol akulo, a pleî yima ngal ahle suma ngat buzu ma tetengâ ki yima ngal dubang ma his djivid’a ma teteng ma avo Jerusalem-ma woyo, a tchuguzi sä woi kur toliyon nda Kedron-nda. 15 A ngat tumiyôna Pa’â kur bur ma dogo yam fid’ina hi til ma mbànina. Suma ngat buzuna ki suma hi Levi-na, zulona vaziya, a mbut tazi yed’et, a he he d’a hawa d’a ngala kur gong nga kud’ora hi Ma didinid’a mi. 16 A nga tchola ata yi mazi ma sunda d’igi a b’ir kur gata hi Moise sana hAloninid’a na. Suma ngat buzuna a nga yam buzu ma a vum abo suma hi Levi-nina kä yam yima ngal ahle suma ngat buzuna. 17 Wani suma ablaud’a aduk suma toka a mbut nga tazi yed’et ti. Kayam ndata, suma hi Levi-na a hlanek mazid’a kaziya, a ngat tumiyôna Pa’â yam suma pet suma a mbut nga tazi yed’et tuo na á tinizi irazi vazi mi Ma didina. 18 Ablau suma a mbut nga tazi yed’et tuo na, ngolozi ni suma hi Efraim-ma, suma hi Manase-na, suma hi Isakar-râ ki suma hi Zabulon-na. Wani a te nga Pa’â ata yam d’igi a b’ir kur gata na d’i. Kayam ndata, Ezekiyas mi tchen Alona kazi ala: Ang Ma didina ni Ma djivina. Ar ang vat hurung ngei 19 yam suma pet suma a tin huruzi yam ang Ma didina Alona habuyozi ngolona suma a mbut nga tazi yed’et d’igi gata de yam yed’eta na d’uo na. 20 Ma didina mi hum tchenda hi Ezekiyas-sa, mi vat hurum mbei kaziya.
21 Israel suma a nga toka avo Jerusalem-ma a le vun til ma a lum kavungô ma bei angufina ki furîd’a ngola gak burâ kid’iziya. Burâ ki burâ suma hi Levi-na ki suma ngat buzuna a nga he ngola mi Ma didina kahle mazi suma bu suma a tchi heîna á suburumu. 22 Ezekiyas mi had’enga mi suma hi Levi suma a nga ki wad’ud’a yam sunda hi Ma didinid’ina. A mut ahle suma a tchazi á vun tilîna gak burâ kid’iziya, a hahle suma ngat buzu suma zlap darigïd’a, a gile Ma didina Alona habuyozi ngolona mi. 23 Ablau suma toka a ndjak vunazi tu ala a le vun tilâ kua kur burâ kid’iziya. A le bur ma kid’iziya máma ni ki furîd’a, 24 kayam Ezekiyas amul ma Juda-na mi hamuzleina mi suma toka 1000 kaho’â 7000, suma nglo suma sunda a hazi amuzleina 1000 kaho’â 10.000, suma ngat buzuna ablaud’a a mbut tazi yed’et mi. 25 Suma Juda-na, suma ngat buzuna, suma hi Levi-na, suma a tcholï yam ambas sa Israel-lâ a mbeï avo Juda-na pet, a tchol akulo, a le furîd’a. 26 Suma a le furîd’a ngola avo Jerusalem. Kur atchogoid’a hi Salomon David goroma amul ma Israel-lîd’a ei dedei pî, a le nga furîd’a hina d’a avo Jerusalem yazi tu d’i. 27 Suma ngat buzuna ki suma hi Levi-na a tchola a b’e vunazi yam ablau suma; Alona mi humuzi delezi mi. Tchen mazid’a Ma didina mi humuttcha akulo ata yam ma kak ma yed’etna.
© Azumeina Bible © Alliance Biblique du Tchad, 1999.
