Ad’eng nga nglod’a a b’lagat teyo
1 Ndak ambas sa Liban-nda,
ndak mal lovot maka woyo,
ar akud’a ti ngal agu sedre ma’â.
2 Ang agu siprena, ang tchi wulula,
kayam agu sedrena mi galal lei da’,
agu ma djifâ mi b’lak kei da’,
ang agu sen ma Basan-na, ang tchi wulula,
kayam agu d’a ndindika ti dap pei da’.
3 Agi humugi siwela hi suma polid’a,
kayam djif mazina mi b’lak kei da’,
agi humugi siwela hi gro azlonid’a,
kayam agu d’a ndindik ka avun alum
ma Jurdê-nid’a ti dap pei da’.
Suma pol suma mbàna
4 Ma didina Alo mana mi dan ala: Ang pol tumiyô suma a tchuguzi á ngatina. 5 Suma a nga guzuzina, a nga ngad’azi d’igi zla nga kazi d’uo na. Suma a guzuzi woina, nge nge pî nga mi dala: Mersi mi Ma didina, kayam an mbut ma ndjondjoîna. Mazi suma pola, sa tu pî nga mi wazi hohowozi d’i. 6 An Ma didina nga ni dagiya: An mba ni we hohowa suma a nga kaka yam ambasina d’uo d’a, an nga ni he nge nge pî abo ndrama, abo amul mazina, a mba b’lak ambasa woi kakazeî, an mba ni prud’uzi woi abozi d’i.
7 An nga ni pol tumiyô suma a tchuguzi á ngatina. Gagazi, azi ni tumiyô suma hohoud’a. An yo tutuguyona mbà, an yi d’a hî d’a ala Sumad’a, an yi d’a hî d’a ala Zlap pa tud’a, an pol tumiyô ndazina. 8 An dik suma pol suma hindina woi kur til ma tuna, an ve nga tan kazi d’i. Azi tazi a golon an ni vama ndjendjed’a mi.
9 Ata yi máma an de mi tumiyôna ala: An dok ni pologi d’uo d’a. Ma mitna ar mi mid’a, ma ba woina ar mi ba woyo, suma a arâ ar a mut taziya.
10 An hle totogo man nda a yat ala Sumad’a d’a, an kuzut tei á but vun man ma djin ma an djinim ki suma petna woyo. 11 Kur bur ma an bud’um mbei máma, tumiyô suma hohou suma a tin huruzi kana a wala ni zlad’a hi Ma didinid’a. 12 An dazi ala: Le djivid’a iragiya ni, agi handi wurak manda. Le d’uo ni, agi kagagiya. Kayam ndata, a nga bege d’a hapa dok hindi yam wurak manda.
13 Ma didina mi dan ala: Ang tchuk bege d’ala ni wurak man nda zlat ngola iraziya d’a kä mi ma min deina.
An yo bege d’a hap pa dok hindi ndata, an tchugut kä kur gong nga kud’ora hi Ma didinid’a mi ma min deina. 14 Bugola, an kus totogo man nda mbà d’a a yat ala Zlap pa tud’a d’a woi á wal darigï d’a wiyed’a woi aduk suma Juda-na ki Israel-lîd’a.
15 Ma didina mi dan kua ala: Ang hulong yo ahlena hi ma pol ma lilid’a. 16 Kayam an mba ni tchol ki ma pol ma dingâ. Mam mba mi djib’er yam tumiyô suma a nga lá bad’a woina d’i, mba mi hal tumiyô suma gureina d’i. Mba mi tchil suma mbuleina d’i, mba mi he tena mi suma a nga ki irazina d’i, mba mi mut hliwa suma d’orâ, mba mi pawazi gak i kä ata aseziya.
17 Ni zla d’a hohoud’a
yam ma pol ma ka zla
ma nga mi ar tumiyôna woina.
Ar mbigeu d’a fiyaka ti kam bigam mbeyo,
ti tchom iram mba ndjufa woi mi,
ar bigam mbi tche mogod’a,
ar iram mba ndjufa ti duk kei mi.
© Azumeina Bible © Alliance Biblique du Tchad, 1999.
