Matiye 22 - Azumeina Bible 1999 (MPG)

D’ogol ma yam te ma a lum ata yima telina

18 octobre 2024 : Journée mondiale des missions

Célébrée chaque année le 18 octobre, La Journée mondiale des missions, est l’occasion pour les chrétiens du monde entier de réfléchir sur l’importance de la mission et de l’évangélisation. Les fidèles sont invités à prier pour les missions, à soutenir financièrement des projets missionnaires et à s’engager davantage dans le partage de leur foi. Cette année, le thème retenu pour la journée mondiale des missions est « Envoi en mission : témoignages de notre foi ». Ce thème nous rappelle que chacun de nous a un rôle à jouer dans la grande commission de Jésus d’aller et de faire des disciples à toutes les nations. Il nous encourage à partager nos expériences de foi et à témoigner de l’amour de Dieu dans notre quotidien, là où nous sommes. La mission ne se limite pas à des actions lointaines ou à des pays étrangers. Elle commence souvent dans notre propre communauté, auprès de notre famille, de nos amis et de nos voisins. C’est une invitation à vivre notre foi de manière authentique et à être des instruments de paix et d’espérance. En cette journée spéciale, prenons le temps de prier pour les missionnaires qui œuvrent à travers le monde, en particulier ceux qui sont confrontés à des défis et des persécutions. Engageons-nous aussi à être des témoins actifs de l’amour de Dieu, en partageant foi avec les autres.

Plus

1 Jesus mi de zla d’a d’ogola kua mi suma ala: 2 Leu d’a akulod’a ti hle tat ni d’igi amul ma ding ma mi le te ma tela hi goromina na. 3 Mi sun azungeî mama á yumï suma mi yazi yam te ma telina, wani azi min á mba d’i. 4 Mi sun azungeî suma dingâ kua, mi dazi ala: Agi i dagi mi suma an yazina ala: An min wa te mana da’, an ngat wa amuzleina kahok man suma d’orâ; ahlena pet a min wa. Agi mbeyegï ata yima tela. 5 Wani azi golom ta, a tchuk tazi, a iya. Ma dingâ mi i kur asinemu, ma hina mi i mbut abomu. 6 Suma hiuna a vik azungeî mama, a lazi ndaka, a tchaziya. 7 Wani amulâ hurum zal ngola, mi sun azigar mama á tchi suma tchi mat ndazina woyo, a ngalazi aziyazi woi mi. 8 Ata yi máma, mi de mazungeî mama ala: Te ma tela min wa da’, wani suma an yazina a ndak ki. 9

Kayam ndata, agi igi grak lovota; suma agi fazina, agi yazï pet yam te ma tela. 10 Azungeî mama a i vun lovota, a togï suma pet suma azi fazina, suma djivina ki suma tchona. Hur gong nga tela ti oî ki suma.

11 Wani ata yima amulâ mi kal avo á gol suma mi yazina, mi we sama dingâ mi tchuk nga baru ma tela atam mbi. 12 Amulâ mi dum ala: Bäna, ni kayam me ba, ang kalî ka hî bei baru ma tela atang ge? Sa máma mi ngruf kiki. 13 Ata yi máma, amulâ mi de mazungeî mama ala: Agi djinigizi asem kabomu, agi gumza abu woi kur nduvunda; ni yima suma a mba tchi a mba mut siyazi kua ngolina. 14 Jesus mi de kua ala: Kayam suma yid’a a nablaud’a, wani suma manda nakid’eid’a.

A djop Jesus yam lombo d’a hed’a

(Gol Mar 12.13-17Luc 20.20-26)

15 Ata yi máma, Fariziyêna a i a ndjak vunazi ala ni nana ba, azi ve Jesus ki zla d’a de d’a avunamba ge? 16 A sun mazi suma hata azi ki suma hi Herot-na atamu. A djobom ala: Ma hat suma, ami wami ala angî ma gagazina, ang nga hat suma yam lovota hAlonid’a kur gagazid’a. Ang nga le mandara sa d’i, kayam ang nga ka ir sa d’i. 17 Ang dami go, ang djib’er nana ge? Djivid’a ei hei lombod’a mamulâ Sesar roze ei hum mbuo zu?

18 Wani Jesus mi we tcho mazid’a, mi dazi ala: Agi suma lop ira, ni kayam me ba, agi kugun nge? 19 Agi taganï sile d’a a nga tarata. A tagamzi mi.

20 Mi djobozi ala: Angusa ki b’ir ra wanda ni hi nge ge?

21 A hulong dum ala: Ni hi Sesar-ra.

Mi dazi ala: Agi hagi ahle sumala ni hi Sesar-ru na mi Sesar, agi hagi ahle sumala ni hAlona na mAlona mi.

22 Kid’a a hum zla ndatid’a, a le atchap, a aram a iya.

A djop Jesus yam tchola hi suma matnid’a

(Gol Mar 12.18-27Luc 20.27-40)

23 Kur bur máma, Sadusiyê suma a nga dala suma matna a mba tchol akulo d’uo na, a mba ata Jesus, a djobom ala: 24 Ma hat suma, Moise mi dala: Le sana mi mit bei vut gorâ ni, wiyema mi vatcha ndata, mi djok andjaf wiyema. 25 Adjeu suma kid’iziya a nga adigamiya, azi ni b’oziyo taziya. Ma avo’â mi vatchad’a, mi mit bei mi vut gorâ, mi ar amamba mi wiyema. 26 Ma mbàna mi vad’u, ma hindina mi vat mi, gak mba yam ma kid’iziyana. 27 Blogozi pet, atcha ndata ti mit mi. 28 Kur bur ma tchola hi suma matnina, ti mba d’i arî atchad’a hi nge adigazi ge? Kayam azi ki zlazid’a pet a vat atchad’a.

29 Jesus mi hulong dazi ala: Agi vid’igi woi ni kayamba agi nga wagi mbaktumba hAlonid’a kad’eng mamba d’uo d’a. 30 Kayam fata suma a mba tchol akulo aduk suma matnid’a, azi mba vik arop pi, aropma a mba vik andjof fuo mi, wani azi mba ka’î d’igi malaika suma sä akulona na. 31 Wani yam tchola hi suma matnid’a, agi ndumugi nga zla d’a Alona mi dagizi ala: 32 An nAlona hi Abraham-ma, Alona hi Isa’â, Alona hi Jakob-ma mi d’a d’uo zu? Alona nAlona hi suma arinina, nga nAlona hi suma matnina d’i.

33 Ata yima ablau suma a hum zla mambina, a le atchap yam hat mamba.

Vun ma he ma ngol ma kalâ

(Gol Mar 12.28-34Luc 10.25-28)

34 Wani ata yima Fariziyêna a hum ala Jesus mi seng wa vun Sadusiyêna sililu na, a tok tazi kamu. 35 Ma dingâ adigazi ni ma hat gata, mi djobom zlad’a á kugumu. Mi dum ala: 36 Ma hat suma, vun ma he ma ngol ma kur gatina ni ma lara ge?

37 Jesus mi hulong dum ala: Ang le yam Ma didina Alo mangâ ki hurung pet ki tang pet ki djib’er manga pet mi. 38 Wana ni vun ma he ma ngol ma avo’â. 39 Ma mbà ma d’igi mam nana ba wana: Ang le yam ndrangâ d’igi ang tanga na. 40 Gata hi Moise-sa pet ki hata hi suma djok vun Alonid’a pet a nad’u vun ma he ma mbà máma.

Mesi azi ki David

(Gol Mar 12.35-37Luc 20.41-44)

41 Kid’a Fariziyêna a nga tokid’a, Jesus mi djobozi zlad’a tu ala: 42 Agi djib’eregi nana yam Mesi ge? Mi ni nge goroma ge?

A hulong dum ala: Ni David goroma.

43 Mi dazi ala: Ni nana ba, Muzu’â hAlonina mi zut David mi yum ala Salana ge? Kayam David mi dala:

44 Ma didina Alona mi de mi Salana ala:

Ang kak ata bigan nda ndjufa,

gak an mba ni tin mang suma djangûna ad’u asengû.

45 Le David mi yum ala Salana ni, ni nana ba, Mesi mi mbut goroma ge?

46 Adigazi sama ndak á hulongôm zla d’a ded’a nga d’i. Bugola, sama ve tam á djobom zlad’ina nga d’uo mi.