A mba ka sariyad’a yam Jerusalem yam tcho mata
1 Muzu’â mi hlanu, mi in avun agrek ma abo ma yorogona hi gong nga kud’ora hi Ma didinid’ina. Gol wani, suma dok mbà yam vahl a nga tchola avun yima kala hi vun agre’îna. Suma nglo suma avok sumina a nga adigaziya. Ni Jäzaniya Azur goroma ki Pelatiya Benaya goroma mi. 2 Ma didina mi dan ala: Ang gor sana, sum ndazina ni suma a nga hat tcho d’a led’a, a nga de gat ta tchod’a mi suma kur azì ma ngol ma wanina. 3 A nga dala: Nga ni yima min gongîyona d’uo tua, azì ma ngol ma wana ni deina, ei teid’a ni hliu ma kurâ. 4 Kayam ndata, ang djogozi vuna. Ang gor sana, ang djok vuna.
5 Muzu’â hi Ma didinina mi mba kanu, mi dan ala: Ang de mi suma ala: Agi Israel-lâ, an we zla d’a agi nga data, an we djib’er ra nga ndeï kurugid’a. 6 Agi oyôgi hur azì ma ngol ma wana ki mad’a suma, agi oyôgi ir palumba woi ki mad’a suma mi. 7 Ni kayam ndata ba, an Salad’a Ma didina nga ni dagiya: Mat ma agi samam kä hur azinina ni hliuna, azì ma ngolâ ni deina mi. Wani agiya, an mba ni buzugugï woi kur azì máma. 8 Agi nga lagi mandara ayî ma durâ. Gola! An nga ni sunugizïya! Ni an Salad’a Ma didina ba, ni dagiya! 9 An mba ni digigi woi kur azì máma, an mba ni hagi woi abo andjaf suma dingâ, an mba ni ndak vun zla manda, an mba ni kagi sariyad’a kagi mi. 10 An mba ni tchagi avun ayîna, an mba ni kagi sariyad’a kagi gak ir hagad’a hi Israel-lîd’a. Agi mba wagi ala an ni Ma didina. 11 Azì ma ngol ma wana mba mi mbut ni deina kagi d’i, agi mba mbud’ugi ni hliu ma kuruma d’uo mi. An mba ni kagi sariyad’a kagi gak ir hagad’a hi Israel-lîd’a. 12 Agi mba wagi ala an ni Ma didina, kayamba agi tid’igi nga yam gat manda d’oze agi tid’igi nga yam vun man ma hed’a d’uo d’a. Wani agi tid’igi ni yam gata handjaf suma a nguyuginid’a.
13 Ata yima an nga ni djok vun Alonina, Pelatiya Benaya goroma mi mid’a. An ge tan kä avok Alona, an er ad’un akulo ala: Alë! Salad’a Ma didina, ni ang ba, min dap Israel suma a arâ woi zu?
Alona mba mi tok suma a ndjoyôzi woina avo
14 Ma didina mi dan ala: 15 Ang gor sana, suma a nga kaka Jerusalem-ma a de mi Israel suma a yozi magomba sumala ni b’oziyongâ nandjavangû na pet ala: Ar agi kagagi sä woi dei ki Ma didina, kayam ambas sa wanda a hamizi ni mi ami ki irami fafat! 16 Ni kayam ndata ba, ang i dazi ala: Salad’a Ma didina mi dala: Le an ni izi woi dei aduk andjaf suma, le an ndjoyôzi woi yam ambasa teteng pî, an mba ni mbut yi mazi ma kaka kur ambas sa azi i kuad’a. 17 Ni kayam ndata ba, ang i dazi ala: Salad’a Ma didina mi dala: An mba ni togogï aduk suma, an mba ni yogï kur ambas sa an ndjoyôgi woi kuad’a, an mba ni hagi andagad’a hi Israel-lîd’a. 18 Fata agi hulongôgi kuruta, agi mba yogi sun nda tchod’a ki sun nda ndjendje d’a lara ge pet tei kurud’u. 19 An mba ni hagi hur ma tuna, an mba ni hagi muzuk ma awilina kurugiya, an mba ni pat hurâ hahinad’a ma kurugina woyo, an mba ni hagi hurâ hi sanina kurugi 20 tala agi tid’igi yam gat manda, agi ngomogi vun man ma hed’a mi d’a. Hina wani, agi mba mbud’ugi sum mana, an mba ni arî Alo magina mi. 21 Wani suma huruzi ve sun mazi d’a tchod’a ki sun mazi d’a ndjendje d’a lara ge petna, an mba ni hulongôzi sun mazi d’a tcho ndata kaziya. An Salad’a Ma didina ni de na.
Subura hi Ma didinid’a ti wal lei ki Jerusalem
22 Tcherebêna a nga gigingâzi woi á pira, abo pusâ mi i ki sed’ezi mi. Subura hAlona hi Israel-lîd’a ti nga akulo kazi mi. 23 Subur mamba ti tcholï hur azì ma ngolâ, ti i tchol sä woi yam ahina d’a abo ma yorogona hazì ma ngol mamid’a. 24 Muzu’â mi hlan mi i ki sed’en Babilon gen suma a yozi magombina kur vama Muzu’â hAlonina mi ndandji woi irana. Ata yi máma vama nde tam mbei iran máma mi vit iranu. 25 An de zla d’a Ma didina mi ndandji woid’a mi suma a yozi magombina pet mi.
© Azumeina Bible © Alliance Biblique du Tchad, 1999.
