Ar ei gilei Ma didina
1 Ni sawal la gile d’a kur bur ma sabatnid’a.
2 Ni vama djivina á suburung ang Ma didina,
á gileng simiyêng ang Alo ma sä akulo ma kal teglesâ!
3 Ni vama djivina á de zla
o mang nga didinda woi ki yorogo tcholola,
á de zla d’engzeng manga woi kur andjeged’a
4 kading ma ziyom dogona,
kading ma teteng ma a hle ki sawalina mi.
5 Ma didina, an nga ni le furîd’a yam sun mang nga ang lata!
An nga ni de woi yam sun nda ang lat kabonga mi.
6 Ma didina, sun mang nga ang lata ni d’a kal teglesa,
djib’er manga ni d’a ndak á sana mi wat ad’ut tuo d’a!
7 Sama bei ned’a mi ndak á wat ad’ut ti,
sama lilid’a mi ndak á humut tuo mi.
8 Le suma asa’atna a nga d’uf d’igi asuna na,
le suma bei d’ingêra a nga b’o ni,
a le hina pet ná ba woi ki irazi fafat.
9 Wani Ma didina,
ang nga kaka akulo gak didin.
10 Ma didina, gola! Mang suma djangûna pet a mba ba woyo,
suma bei d’ingêra a mba b’rau woi yayak mi.
11 Ang mbud’un ad’enga d’igi avüna na,
ang von mbul ma furîd’a kanu.
12 Iran ndi mal lei yam suma a nga kud’uguna,
human nga d’i hum zlad’a hi suma a tok tazi kan á tchana mi.
13 Suma d’ingêrâ a mba wulî d’igi amilaûna na,
a wulî d’igi agu sedre ma Liban-na na mi.
14 Azi ni d’igi agu ma nga ped’a
kur gonga hi Ma didina Alo meinid’a na,
a nga d’uf kur gulumun mama mi.
15 Kur mamarazi pî a nga vut kua,
ambirizi nga, humazi nga d’i got mi.
16 Kayam ndata, a nga tak kei ala
Ma didina ni ma d’ingêrâ;
mam mi ahina manda,
ni ma bei mbut ira atam ba na.
© Azumeina Bible © Alliance Biblique du Tchad, 1999.
