Abraham mi he Isak va ma ngat buzuna mAlona
1 Bugol ahle ndazina, Alona mi kuk Abraham, mi yum ala: Abraham!
Abraham mi hulong dum ala: An huma!
2 Alona mi dum kua ala: Ang ve gorongâ Isak ma tu gid’eng ma ang le kam heîna, ang i yam ambas sa Moriya-d’a, ang handji vama ngat buzu ma ngala yam ahina d’a an mba ni tagangzid’a.
3 Abraham mi nde iram yorogo tcholol, mi zlup koro mama, mi yo azungeî mama mbà zlapa ki goroma Isak, mi wak agu ma a ngal ki vama ngat buzunina, mi i ata yima Alona mi tagamzina. 4 Kur bur ma hindina Abraham mi hle iram akulo, mi we yi máma sä woi dei, 5 mi de mazungeî mama ala: Agi kagagi nga ka hî ki korona; ami ki gorona imi sä hî á kud’uromi Alona, ami mba hulongômi gevegi tua.
6 Abraham mi hlagu ma a ngal ki vama ngat buzunina, mi hum yam goroma Isak, mi hlakud’a ki mbigeud’a abomu; azi djak a i ad’u taziya.
7 Isak mi de mabum ala: Iba.
Abum mi hulong dum ala: An huma, gorona!
Isak mi djobom ala: Gola! Akud’a kaguna wana: Gor timi ma ei ï ngad’ama, mi nga ni lara ge?
8 Abraham mi hulong dum ala: Gorona, Alona tamba mba mi hei ini gor timina á ngata. Azi djak a nga i ad’u taziya.
9 Kid’a azi mbaza ata yima Alona mi dum kamid’a, Abraham i mi min yima ngal ahle suma ngat buzuna, mi ndja aguna kamu, mi djin goroma Isak, mi gum yam yi máma akulo yam aguna, 10 mi mat abomu, mi pat mbigeud’a á ngat goroma.
11 Ata yi máma malaikana hi Ma didinina mi yumï akulo atogo zak ala: Abraham! Abraham!
Abraham mi hulong dum ala: An huma!
12 Malaikana mi hulong dum kua ala: Ang tin abong ata gorongâ d’i, ang lum va d’uo mi. Ki tchetchemba, an wala ang nga le mandara Alona, kayam ang d’elen nga gorong ma tu gid’engâ bei hed’a d’i.
13 Abraham mi hle iram akulo, mi gol blogomu, mi we gamlâna nga tchola adivim nga haka aduk azlupa, mi vumu, mi ngad’am balum goroma Isak. 14 Abraham mi yi yi máma ala Ma didina nga mi he . Kayam ndata gak ini suma a nga dala: Ni yam ahinad’a hi Ma didinid’a ba, mam mba mi he.
15 Malaikana hi Ma didinina mi yï Abraham akulo kua yam á mbàd’a, 16 mi dum ala: Ma didina nga mi dang ala: Kayamba ang le hina ang d’elen nga gorong ma tu gid’engâ d’uo d’a, an gun tan ki an tanda, 17 an mba ni b’e vunan kangû, an mba ni zulung andjavang avok d’igi tchitchiud’a na, d’igi les ma avun alum ma ngolîna na mi. Andjavang mba mi kus yam mam suma djangûna. 18 Ni kayam andjavang ba, an mba ni b’e vunan yam suma yam andagad’ina pet, kayam ang humun vunanu.
19 Abraham azi ki Isak a hulongî gen azungeî mama, azi tchol ad’u taziya, a i Berseba ata yima mi nga kaka kuana.
Andjafâ hi Nahor-râ
20 Wani bugol ahle ndazina, sana mi mba, mi de mi Abraham ala: Gola! Milka ti vut wa gro andjofâ mi wiyengâ Nahor. 21 Gorom ma ngolâ a yum ala Us; wiyema Bus, Kemuwel Aram abumu, 22 Keset, Hazo, Pildas, Jitlaf ki Betuwel. 23 Betuwel mi vut Rebeka. Azi naklavandi suma Milka ti vud’uzi mi Nahor, Abraham wiyemina. 24 Nahor amam mba gora a yat ala Reuma, ndat ti vut grona mi; ti vud’um Teba, Gaham, Tahas ki Mäka mi.
© Azumeina Bible © Alliance Biblique du Tchad, 1999.
